كەزدەسۋدە اقپارات جانە قوعامدىق دامۋ ءمينيسترى دارحان قىدىرالى جالپى قازاقستان حالقى اسسامبلەياسى مەن ونىڭ بىرلەستىكتەرىنىڭ ەل دامۋىندا الاتىن ورنىن اتاپ ءوتىپ, مەملەكەتىمىزدىڭ بىرلىك پەن ىنتىماقتى تۋ ەتىپ وتىرعانىن جەتكىزدى. «پرەزيدەنت جولداۋىنىڭ تاقىرىبى «ادىلەتتى مەملەكەت. ءبىرتۇتاس ۇلت. بەرەكەلى قوعام» دەپ اتالعانى بەلگىلى. ەلىمىزدە بارىنە بىردەي مۇمكىندىك بەرەتىن ادىلەتتى قوعام قۇرىلىپ جاتىر. مەملەكەتتىك مۇددە جولىندا بىرگە ەڭبەك ەتۋ – ءاربىر ازاماتتىڭ مىندەتى. بۇل رەتتە ەتنومادەني بىرلەستىكتەر ەلىمىزدىڭ ىنتىماعى مەن بىرلىگى ءۇشىن ەلەۋلى ەڭبەك ەتىپ كەلەدى. ماسەلەن, قوستانايداعى ورمان ءورتى كەزىندە ەتنومادەني بىرلەستىكتەر زارداپ شەككەن جاندارعا 60 ملن تەڭگە قاراجات اۋدارىپ, 243 توننادان استام گۋمانيتارلىق كومەك كورسەتتى. بۇل ءبىزدىڭ ەل بولىپ ۇيىسا بىلەتىنىمىزدىڭ ايقىن كورىنىسى», دەدى مينيستر.
جيىندا پرەزيدەنت جولداۋىندا ايتىلعان باسىم باعىتتار تالقىلاندى. ءوز كەزەگىندە ۇيىم وكىلدەرى ۆەدومستۆو باسشىسىنا بىرقاتار ماسەلەنى جەتكىزىپ, قحا مۇشەلەرىنىڭ ەلىمىزدەگى بەيبىتشىلىك پەن كەلىسىمدى نىعايتۋداعى ءرولى, مەملەكەتتىك رەفورمالاردى قولداۋ باعىتىندا اتقارىلۋعا ءتيىس جۇمىستار تۋرالى پىكىرلەرىن ايتتى.
سونداي-اق اقپارات جانە قوعامدىق دامۋ ءمينيسترى دارحان قىدىرالى الماتىدا زاماناۋي مەديا وكىلدەرى مەن كرەاتيۆ جاستارمەن دە جۇزدەستى. ء«تۇرلى پلاتفورمالاردا شىعارماشىلىق الەۋەتىن تانىتىپ جۇرگەن جاستار جان-جاقتى ماسەلەلەردى ورتاعا سالدى. وتە پايدالى كەزدەسۋ بولدى دەپ ويلايمىن», دەپ اتاپ ءوتتى مينيستر.
