كەڭەس وكىمەتى قۇلاماي تۇرعاندا بولعان سوعىستار تۋرالى جۇرتتىڭ پىكىرى ءارتۇرلى. الايدا مايدانعا اتتانعان جىگىتتەر مەن قىزداردىڭ ەشقايسىسى باسقىنشى بولماعانى انىق. ولار وتان الدىنداعى بورىشتارىن ۇلكەن تاۋەكەلمەن وتەدى. سوعىستا اۋىر جاراقات الىپ, ءومىرىنىڭ سوڭىنا دەيىن مۇگەدەك بولىپ عۇمىر كەشىپ جاتقانداردىڭ قاراسى از ەمەس.
وسى ەكى ارداگەرلەر توبىنا قۇرمەت كورسەتۋ ماقساتىندا الماتى قالاسى قوعامدىق دامۋ باسقارماسى مەن Social project management ورتالىعى جىل بويى بىرقاتار جۇمىس اتقاردى. «ازاماتتىق بورىش» دەپ اتالاتىن جوبانىڭ اياسىندا قالاداعى ورتالىق زيراتتا جەرلەنگەن ارداگەرلەردىڭ قابىرلەرىنىڭ اينالىسىنا جوندەۋ جۇمىستارىن جۇرگىزدى. مۇندا ارداگەرلەر جەرلەنگەن زيراتتاردىڭ ناقتى سانى بەلگىسىز, ولار شوعىرلانا كومىلگەن ءۇش ورىن بار.
ورتالىق وكىلدەرى جىلداعى ءداستۇر بويىنشا «ماڭگىلىك الاۋ» ماڭىنا گۇل شوقتارىن قويىپ, سوعىس قۇرباندارىنىڭ رۋحىنا تاعزىم ەتتى. ارداگەرلەردىڭ قۇرمەتىنە كونتسەرت ۇيىمداستىرىلىپ, وندا پاتريوتتىق اندەر شىرقالدى.
كەڭەس-اۋعان سوعىسىنا 22 مىڭنان استام قازاقستاندىق قاتىسسا, ونىڭ ەكى مىڭنان استامى قازىر الماتىدا تۇرىپ جاتىر. ولار قالاداعى قوعامدىق جۇمىستار مەن ءىس-شارالارعا اۋىق-اۋىق قاتىسىپ تۇرادى. جوبا اياسىندا اۋعان سوعىسى ارداگەرلەرى وننان استام وقۋ ورنىن ارالاپ, ستۋدەنتتەرگە وزدەرىنىڭ اقىل-كەڭەستەرىن, وسيەتتەرىن ايتتى. ول ارداگەرلەردىڭ اراسىندا اۋعان سوعىسى مەن وزگە دە اسكەري قاقتىعىستاردىڭ ارداگەرلەرى مەن مۇگەدەكتەرىن ۇلەستىرۋ كەڭەسىنىڭ, اۋعان سوعىسى ارداگەرلەرى ۇيىمىنىڭ مۇشەلەرى دە بولدى. سونىمەن قاتار ۇستەل تەننيسىنەن, قازاق كۇرەسىنەن, فۋتبولدان تۋرنيرلەر ءوتىپ, جەڭىمپازدارعا باعالى سىيلىقتار مەن العىسحاتتار اۋعان سوعىسى ارداگەرلەرىنىڭ قولىمەن تابىس ەتىلدى.
جىل وتكەن سايىن ۇلى ەكىنشى دۇنيەجۇزىلىك سوعىس ارداگەرلەرى بارلىق ەلدە ازايىپ كەلەدى. ال الماتىدا نەبارى ءجۇز شاقتى عانا ارداگەر ءومىر ءسۇرىپ جاتىر. «نەمەنەگە جەتىستىڭ, بالا باتىر, قاريالار ازايىپ بارا جاتىر», دەپ مۇقاعالي اقىن جىرلاعانداي, ەندى ءبىراز جىلدان كەيىن ولاردىڭ ءبارى قاتارىمىزدا جۇرمەيتىنى اقيقات. ولارعا كوزى تىرىسىندە كومەك كورسەتكەنگە نە جەتسىن؟! وسىنى تۇسىنگەن ءبىر توپ ەرىكتى جاس ەلۋدەن استام ارداگەردىڭ ءۇيىن ارالاپ, ولارعا ازىق-ت ۇلىك قورجىندارىن ۇلەستىردى. كەيبىرىنىڭ ۇيلەرىنە جوندەۋ جۇمىستارىن جۇرگىزدى.
ەلىمىزدە ارداگەرلەرگە ارنالعان جوبالار جەتكىلىكتى. بىراق بۇل ولاردىڭ كەيىنگى ۇرپاق ءۇشىن جاساعان ەرلىكتەرىمەن سالىستىرعاندا مىسقالداي عانا نارسە. دەمەك ءبىزدىڭ ولار ءۇشىن ىستەر ءىسىمىز رياسىز, ەسەپسىز بولعانى ابزال.
الماتى
