ەرلەر اراسىنداعى جارىستىڭ شيرەك فينالىنا جولداما العان سەگىز تەننيسشىنىڭ بىردە-بىرەۋى بۇعان دەيىن «ۇلكەن دۋلىعا» ساناتىنداعى تۋرنيرلەردە توپ جارعان جوق ەدى. ال اتاق-داڭقتارى الىسقا جايىلعان ستەفانوس تسيتسيپاس, ستەن ۆاۆرينكا, فەرناندو ۆەرداسكو تۇساۋكەسەر كەزدەسۋلەرىندە جەڭىلىس تاپسا, گريگور ديميتروۆ ەكىنشى اينالىمدا ساتسىزدىككە ۇشىرادى. سول سەكىلدى دانيل مەدۆەدەۆ, رافاەل نادال, ەندي ماررەي, مارين چيليچ جانە باسقا دا دۇلدۇلدەر الىسقا شاپپادى. مىنە, سەنساتسيانىڭ «كوكەسى» وسى ەمەس پە؟!
شيرەك فينالدا رەسەيلىك كارەن حاچانوۆ (№31) اۋستراليالىق نيك كيروستى (№25), نورۆەگيالىق كاسپەر رۋد (№7) يتاليالىق ماتتەو بەررەتتينيدى №14), يسپانيالىق كارلوس الكاراس (№4) اپەننين تۇبەگىنىڭ تاعى ءبىر وكىلى ياننيك سيننەردى (№13) جانە امەريكالىق فرەنسيس تيافو (№22) ورىس ويىنشىسى اندرەي رۋبلەۆتى (№11) قاپى قالدىردى.
الكاراس پەن تيافو جانە رۋد پەن حاچانوۆ اراسىندا وتكەن جارتىلاي فينالدىق سايىستا العاشقىلارى جەڭىسكە جەتتى. اقتىق سايىستا 19 جاستاعى يسپانيانىڭ اسا دارىندى تەننيسشىسى مەن 23 جاستاعى سكانديناۆيا تۇبەگىنىڭ ساڭلاعى كۇش سىناستى. بۇل ويىنشىلاردىڭ ەكەۋى دە توپ-10-دىقتىڭ قاتارىندا. كارلوستىڭ وسى كۇنگە دەيىنگى ەڭ ۇزدىك كورسەتكىشى – اتر تۋرنيرىندە بەس مارتە توپ جارىپ, بيىل رولان گارروستىڭ شيرەك فينالىنا شىعۋى. كاسپەر بيىل رولان گارروستىڭ فينالىندا ويناپ, اسا ءىرى حالىقارالىق دودالاردا توعىز رەت دارا شىقتى. سان ميلليون جانكۇيەر تاعاتسىزدانا كۇتكەن باسەكە كەشە ءوتتى. ءۇش جارىم ساعاتقا سوزىلعان باسەكە 6:4, 2:6, 7:6, 6:3 ەسەبىمەن كارلوس الكاراستىڭ جارقىن جەڭىسىمەن اياقتالدى.
ايەلدەر اراسىندا ايتارلىقتاي توسىن ناتيجەلەر تىركەلگەن جوق. جارتىلاي فينالعا جولداما العانداردىڭ بارلىعى دا كىل مىقتىلار. بۇل مەجەدە الەمنىڭ ءبىرىنشى راكەتكاسى, پولشالىق يگا شۆيونتەك WTA تىزىمىندە جەتىنشى ورىنعا جايعاسقان بەلورۋسسيالىق ارينا سوبولەنكونى سان سوقتىرسا, مىسىرلىق ونس جابەر (№5) فرانتسيالىق كارولين گارسيانى (№17) جەڭدى. اقتىق سىننىڭ العاشقى سەتىندە شۆيونتەك وڭاي جەڭىسكە جەتسە, ەكىنشىسىندە جابەر اجەپتاۋىر قارسىلىق كورسەتتى. ويىن تاي-برەيككە ۇلاستى. دەسەك تە بۇل جولى دا پولشالىقتىڭ مىسى باسىم بولدى.
1 ساعات 50 مينۋتقا سوزىلعان باسەكە 6:2, 7:6 ەسەبىمەن اياقتالدى. وسىلايشا, 21 جاستاعى يگا «ۇلكەن دۋلىعا» ساناتىنداعى تۋرنيرلەردە ءۇشىنشى مارتە باس جۇلدەنى ولجالادى. ال 28 جاستاعى ونس قاتارىنان ەكىنشى رەت فينالدا ۇتىلدى. وسىدان ەكى اي بۇرىن عانا ول لوندوندا ۇيىمداستىرىلعان ۋيمبلدون دوداسىنىڭ اقتىق سىنىندا قازاقستاندىق ەلەنا رىباكيناعا ەسە جىبەرگەن ەدى.
US Open تۋرنيرىندە قازاقستان تەننيسشىلەرىنىڭ بىردە-بىرەۋى تابىستى ونەر كورسەتە العان جوق. بۇل جولى ءبىز ەلەنا رىباكيناعا (WTA رەيتينگىندە 25-ورىندا) زور سەنىم ارتقان ەدىك. تاياۋدا عانا ۋيمبلدوندا ايدى اسپانعا ءبىر-اق شىعارىپ, باس جۇلدەنى ولجالاعان ەلىمىزدىڭ ءبىرىنشى راكەتكاسى نيۋ-يوركتەگى ءتۋرنيردىڭ تۇساۋكەسەر كەزدەسۋىندە الەمدىك رەيتينگتە وزىنەن الدەقايدا تومەن تۇرعان فرانتسيالىق كلارا بيۋرەلگە (№131) جول بەردى. يۋليا پۋتينتسەۆا (№36) امەريكالىق اماندا انيسيموۆادان (№22) ايلاسىن اسىرعانىمەن, ەكىنشى اينالىمدا گەرمانيالىق يۋلە نيمايەردىڭ (№108) وسال تۇسىن تابا المادى. الەكساندر بۋبليك تە ءدال سول مەجەدە ءسۇرىندى. فرانتسيانىڭ وكىلى يۋگو گاستوندى (№72) جولىنان ىعىستىرعان جەرلەسىمىز ىلە-شالا يسپانيانىڭ مىقتىسى پابلو كاررەنو-بۋستادان (№15) ۇتىلدى. ال ميحايل كۋكۋشكين مەن دميتري پوپكو ىرىكتەۋ سىنىندا ءسۇرىندى.
جۇپتىق سايىستا دا جولىمىز بولمادى. اندرەي گولۋبەۆ پەن پەدرو مارتينەس-پورتەرو (يسپانيا) جانە يۋليا پۋتينتسەۆا مەن يانينا ۆيكمايەر (بەلگيا) ءبىرىنشى كەزەڭدە جەڭىلىستىڭ كەرمەك ءدامىن تاتسا, الەكساندر بۋبليك پەن حولگەر ۆيتۋس رۋنە (دانيا) جانە الەكساندر نەدوۆەسوۆ پەن ايسام ۋل-حاك كۋرەشي (پاكىستان) ەكىنشى اينالىمنان اسا العان جوق. ەڭ ءتاۋىر ناتيجەگە اننا دانيلينا قول جەتكىزدى. برازيليالىق بەاتريس حادداد-مايامەن يىق تىرەسە ويناعان ول ءۇشىنشى كەزەڭگە دەيىن جەتتى.
اتالعان جارىستا جەرلەستەرىمىز ءساتسىز ونەر كورسەتسە دە, ماتەريالدىق جاعدايلارىن ءبىراز جاقسارتىپ الدى. جەكەلەگەن جانە جۇپتىق باسەكەلەردەگى سىياقىلاردى قوسا ەسەپتەگەندە, ولاردىڭ تابىستارى مىناداي: بۋبليك – 138,9 مىڭ دوللار (65,27 ميلليون تەڭگە), پۋتينتسەۆا – 131,65 مىڭ دوللار (61,86 ميلليون تەڭگە), رىباكينا 80 مىڭ دوللار (37,59 ميلليون تەڭگە), كۋكۋشكين مەن پوپكو – 33,6 مىڭ دوللار (15,78 ميلليون تەڭگە), دانيلينا – 28,2 مىڭ دوللار (13,25 ميلليون تەڭگە), نەدوۆەسوۆ – 17,9 مىڭ دوللار (8,41 ميلليون تەڭگە) جانە گولۋبەۆ – 10,65 مىڭ دوللار (5,04 ميلليون تەڭگە). قازاقستان تەننيسشىلەرىنىڭ اقش-تىڭ اشىق بىرىنشىلىگىندە تاپقان جالپى تابىسى – 474,5 مىڭ دوللار (222,9 ميلليون تەڭگە).
ال جەكەلەگەن سايىستا باس جۇلدەنى ولجالاعان ويىنشىلار 2,6 ميلليون دوللاردان يەمدەندى. اقتىق سىندا جەڭىلگەندەر سول سومانىڭ تەڭ جارتىسىن الدى. جارتىلاي فينالعا جەتكەندەردىڭ ەسەپشوتىنا 705 000 دوللار اۋدارىلسا, شيرەك فينالعا شىققاندار 445 000-دى ەنشىلەدى. ءتورتىنشى كەزەڭدە ويناعاندار 278 000-دى يەلەنسە, ءۇشىنشى اينالىمدا سۇرىنگەندەر 188 000 دوللارعا يەلىك ەتتى.
