ۇكىمەتتىڭ 6 ماۋسىمداعى №370 قاۋلىسىنا سايكەس جازۋشى ەسىمىن ەنشىلەگەن ورتا مەكتەپتىڭ سالتاناتتى شاراسىنا جەتىسۋ وبلىستىق ءماسليحاتىنىڭ حاتشىسى گۇلنار قوجاعۇلقىزى, جازۋشىنىڭ قارىنداسى مايرا ساپارعاليقىزى, تالدىقورعان قالالىق ءماسليحاتىنىڭ حاتشىسى تەمىربولات جانبولات ۇلى شاقىرىلىپ, كەزەكپەن ءسوز الىپ, وقۋشىلاردى العاشقى قوڭىراۋمەن قۇتتىقتادى.
الدىمەن قازاقستان رەسپۋبليكاسىنىڭ مەملەكەتتىك گيمنىنە تىك تۇرىپ قۇرمەت كورسەتكەن كوپشىلىك مەكتەپ وقۋشىلارى دايىنداعان كونتسەرتتىك باعدارلامانى تاماشالاپ, جاس ونەرپازداردىڭ ونەرىنە ريزاشىلىق تانىتتى. ودان سوڭ 1-سىنىپ وقۋشىلارىنا ءبىلىم كىلتىن تابىستاعان 11-سىنىپ وقۋشىسى, «التىن بەلگىگە» ۇمىتكەر نۇراي نۇرقاپاروۆا ارتىنان ەرگەن ءىنى-سىڭلىلەرىنە جۇرەكجاردى تىلەگىن ارنادى. ودان كەيىن ارداگەر ۇستازدار اق تىلەگىن ارناپ, جاڭا وقۋ جىلىنىڭ باستالعانىن حابارلادى.
قالامگەر ەسىمىن يەلەنگەن №9 ورتا مەكتەپتىڭ سالتاناتتى اشىلۋ راسىمىنە وراي كەلگەن قوناقتار لەنتا قيىپ, وقۋ ورنىنىڭ وتاندىق بىلىمگە ولشەۋسىز ۇلەس قوسۋىنا تىلەكتەستىك تانىتتى. قوناقتاردى شاشۋمەن قارسى العان اجەلەر دە شارا شىرايىن كىرگىزدى.
مەكتەپ ديرەكتورى ءلايلا سەمباەۆانىڭ ايتۋىنشا, جازۋشى سايىن مۇراتبەكوۆتىڭ اتى بەرىلگەن ورتا مەكتەپتىڭ 1-سىنىبىنا 238 وقۋشى بارىپتى. ودان بولەك, مەكتەپتە 1 797 وقۋشى ءبىلىم الادى. ۇستازدىق قىزمەتتى اتقاراتىن 137 مۇعالىمنىڭ 60 پايىزى جاڭا تەستىلەۋدەن ءوتىپ, ءبىلىمى جوعارى ەكەندىگىن دالەلدەگەن. مەكتەپ تۇلەكتەرى بيىل ۇلتتىق بىرىڭعاي تەستىلەۋدىڭ ناتيجەسى بويىنشا 86 پايىزدى كورسەتكەن.
جەتىسۋ وبلىسى
