كورمەنىڭ اشىلۋىندا تۇڭعىش پرەزيدەنت كىتاپحاناسىنىڭ ديرەكتورى باقىتجان تەمىربولات ءىس-شارانىڭ ماڭىزىنا توقتالا كەلىپ: «ادامزات وركەنيەتىنىڭ دامۋى جازۋمەن تىعىز بايلانىستى. ونىڭ شامامەن 6 مىڭ جىل بۇرىن پايدا بولۋىمەن ادامزات تاريحىندا توڭكەرىس بولدى. جازۋ ادامدارعا بىلىمدەردى جيناقتاپ, ونى كەيىنگى ۇرپاققا قالدىرۋعا مۇمكىندىك بەردى. جازۋمەن قاتار جازبا ماتەريالدارى دا, ماسەلەن, جارتاستاعى جازۋلار, ساز تاقتايشالار, پاپيرۋستار, پەرگامەنتتەر, اعاش تاياقشالار, قىلقالامدار, قاۋىرسىندار مەن شاريكتى قالامداردان قازىرگى زامانعى گادجەتتەرگە دەيىنگى ۇزاق دامۋ جولىنان ءوتتى. بۇگىنگى ءبىزدىڭ كورمەمىزدەن مەملەكەتتىڭ جوعارى لاۋازىمدى تۇلعالارى پايدالانعان زاتتار مەن ءتۇرلى حالىقتار مادەنيەتىنىڭ وزىق ۇلگىلەرىن تاماشالاي الاسىزدار», – دەپ اتاپ ءوتتى. ودان كەيىن ءسوز العان جازۋشى, مەملەكەتتىك سىيلىقتىڭ لاۋرەاتى الىبەك اسقار: «قازىرگى جاس ۇرپاق قاعاز, كىتاپ سياقتى ءداستۇرلى ءبىلىم كوزدەرىن پايدالانا وتىرىپ, اقپارات الۋعا كوبىرەك كوڭىل بولەدى دەپ سەنەمىن», – دەپ, وسىنداي تانىمدىق كورمەنى وتكىزۋگە اتسالىسقان ازاماتتارعا العىسىن ايتتى.
كورمە ەكى بولىمنەن تۇرادى: ونىڭ ءبىرىنشى بولىمىندە تۇڭعىش پرەزيدەنتتىڭ جەكە كوللەكتسياسىنان ماڭىزدى مەملەكەتتىك قۇجاتتارعا قول قويعان جازۋ قۇرالدارى مەن ۇستەل قۇرالدارى ۇسىنىلسا, ەكىنشى بولىمدە شەت مەملەكەت كوشباسشىلارىنىڭ, كورنەكتى مەملەكەت قايراتكەرلەرىنىڭ, حالىقارالىق ۇيىمداردىڭ ديپلوماتيالىق سىيلىقتارى قويىلدى.
