ەلوردادا ءىت-ۆاكانسيالار جارمەڭكەسى وتەدى

EXPO كورمە ورتالىعىنىڭ الاڭىندا حالىقارالىق جانە قازاقستاندىق ءىت-كومپانيالار جۇمىس ىزدەۋشىلەرگە اقپاراتتىق تەحنولوگيالار، Data science، blockchain سالاسى بويىنشا 500-دەي ۆاكانسيا ۇسىنادى. 

تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى، سونداي-اق نۇر-سۇلتان قالاسى اكىمدىگى جانە Astana Hub ءىت-ستارتاپتار حالىقارالىق تەحنوپاركى ۇيىمداستىرىپ جاتقان بۇل جارمەڭكەدە 20 شاقتى كومپانيا جۇمىس ىزدەۋشىلەرگە جوعارى تەحنولوگيالار سالاسىنداعى مانساپتىق مۇمكىندىكتەر تۋرالى ايتىپ، ۇيىمدارى جايلى تولىققاندى اقپاراتپەن بولىسەدى.

«Digital Bridge 2022 ءىت-ۆاكانسيالار جارمەڭكەسى – HR-ماماندار، ءىت سالاسىنداعى الدىڭعى قاتارلى حالىقارالىق جانە قازاقستاندىق رەكرۋتەرلەر باس قوسىپ، كاسىپقويلارعا، فريلانسەرلەر مەن جاس ماماندارعا جۇمىس ورنىن ۇسىناتىن كارەرالىق مۇمكىندىكتەر الاڭى. بۇل جەردە اركىم ءوزى ماقسات ەتكەن قىزمەتىنە قول جەتكىزىپ، ارماندارىن جۇزەگە اسىرا الادى»، دەيدى Astana Hub اتقارۋشى كەڭسەسىنىڭ ديرەكتورى دانيا احمەتوۆا.

ءىت-ۆاكانسيالار جارمەڭكەسى جۇمىس ورنىن اۋىستىرعىسى كەلەتىن كاسىپقويلارعا، جاڭا جوبالارعا قاتىسقىسى كەلەتىن فريلانسەرلەرگە، جاس ماماندارعا جانە جوو، باعدارلامالاۋ مەكتەپتەرىنىڭ تاجىريبە جيناعىسى كەلەتىن ستۋدەنتتەرىنە ارنالعان. ولار Epam، Sergek، Beeline، Kazdream، Documentolog، Tech Culture، ۇات، قازاقتەلەكوم، Mytona، Freedom Finance، Halykbank، 2GIS، Coursera، KASPI، Huawei، Astana Hub جانە ت.ب. ءىرى كومپانيالاردىڭ ۇسىنىستارىن قاراستىرىپ، جۇمىسقا ورنالاسا الادى. 

ايتا كەتۋ كەرەك، بۇل جارمەڭكەگە كومپانيالار دا، جۇمىس ىزدەۋشىلەر دە تەگىن قاتىسا الادى. تەك digitalbridge.kz سايتى ارقىلى تىركەۋدەن وتسە جەتكىلىكتى. 

ء«ىت يندۋسترياسىنداعى كادرلارعا دەگەن سۇرانىس كۇن سايىن ارتىپ كەلەدى، سوندىقتان كومپانيالارعا ۇنەمى ءىت-ماماندار قاجەت. تەك قانا كاسىپقويلاردى ەمەس، الەۋەتتى جاس مامانداردى دا جوعارى جالاقى جانە قولايلى جۇمىس جاعدايىمەن قامتاماسىز ەتۋگە دايىن. بۇل ورايدا ءىت-ۆاكانسيالار جارمەڭكەسى جۇمىس ىزدەۋشىلەرگە عانا ەمەس، جۇمىس ۇسىنۋشىلارعا دا ءتيىمدى. مىسالى، بيىل جازدا وتكەن وسىنداي جارمەڭكەگە قاتىسقان ءبىزدىڭ كومپانيا بىرنەشە قىزمەتكەر تاپتى، قازىر ولار بىزدە جاپ-جاقسى جۇمىس ىستەپ جاتىر»، دەيدى Kazdream ءىت-كومپانياسى ءبولىمىنىڭ باسشىسى ماريا بەرەجنايا.