مەملەكەت باسشىسى حالىققا ارناعان بيىلعى جولداۋىندا ەكونوميكانى دامىتۋدىڭ جاڭا كەزەڭىنە ەرەكشە نازار اۋدارعانى ءمالىم. وسى رەتتە ۇكىمەت شاعىن جانە ورتا بيزنەستىڭ ۇلەسىن ارتتىرۋعا باسىمدىق بەرۋدى كوزدەپ وتىر.
وبلىس اكىمىنىڭ ورىنباسارى قازىر وتاندىق وندىرۋشىلەرگە شەكتەۋ قويمايتىن كەدەرگىسىز ورتا قۇرۋ قاجەت دەپ سانايدى.
«سامۇرىق-قازىنا» ۇلتتىق ءال-اۋقات قورىنىڭ بۇل باعىتتاعى جۇمىسىن اتاپ وتكەن ورىندى. ماسەلەن, قوردىڭ ساتىپ الۋ كولەمى 4,2 ترلن تەڭگەدەن اسىپ, بۇل شاعىن جانە ورتا بيزنەستى دامىتۋ, جەرگىلىكتى قامتۋ ۇلەسىن ارتتىرۋ جانە باسقا دا مۇمكىندىكتەردى كەڭەيتۋگە جول اشادى.
قازىر اباي وبلىسىندا وڭدەۋ وندىرىسىنە بايلانىستى 30 ينۆەستيتسيالىق جوبانى جۇزەگە اسىرۋ جوسپارلانىپ وتىر. سوعان سايكەس 7 مىڭ جۇمىس ورنى اشىلادى. ونىڭ ىشىندە بيىل 3 جوبا قولعا الىنادى. ناتيجەسىندە, 785 ادام جۇمىسپەن قامتىلادى», دەدى ا.كارىموۆ.
قازىر وتاندىق بيزنەستى دامىتۋعا ارنالعان مەملەكەتتىك قولداۋدىڭ كوپتەگەن تەتىگى بار. مىسالى, ۇكىمەتتىڭ باستاماسىمەن قولعا الىنعان ىشكى قۇندىلىقتى دامىتۋعا باعىتتالعان باعدارلاما اياسىندا يمپورتتى وتاندىق ونىمدەرمەن الماستىرىپ, قازاقستاننىڭ تاۋار وندىرۋشىلەرىنە قارجىلىق قولداۋ كورسەتۋ كوزدەلىپ وتىر.
«وتاندىق كاسىپكەرلەر مەن تاۋار وندىرۋشىلەردى قولداۋ – قوردىڭ نەگىزگى مىندەتى. قازاقستاندىق بيزنەستى تاپسىرىستار جانە باسقا دا قولداۋ تەتىكتەرىمەن قامتاماسىز ەتۋ ماقساتىندا وسى جىلى «اتامەكەن» پالاتاسىمەن بىرلەسىپ, قوردىڭ ساتىپ الۋ جۇيەسىنە ەلەۋلى وزگەرىستەر ەنگىزىلدى. وتاندىق تاۋار وندىرۋشىلەردى قولداۋدىڭ 10 شاراسى ايقىندالدى. ونىڭ ىشىندە قامتاماسىز ەتۋدى جويۋ, تولەم مەرزىمدەرىن ازايتۋ, قۇجاتتاردىڭ قىسقارتىلعان تىزبەسى جانە باسقا دا ارتىقشىلىقتار قامتىلعان», دەدى «سامۇرىق-قازىنا كونتراكت» جشس باس ديرەكتورىنىڭ ورىنباسارى دارحان رامازانوۆ.
بۇل ورايدا اباي وبلىسىنىڭ اكىمدىگى, «اتامەكەن» ۇكپ جانە «سامۇرىق-قازىنا كونتراكت» جشس اراسىندا ءۇش جاقتى كەلىسىمگە قول قويىلعانىن ايتا كەتكەن ورىندى. سونداي-اق بىرقاتار وفتەيك-كەلىسىم جاسالدى.
اباي وبلىسى
