تارقاتا ايتار بولساق, مادەنيەت جانە سپورت ءمينيسترى داۋرەن اباەۆ ماجىلىستە «قازاقستان رەسپۋبليكاسىنىڭ كينەماتوگرافيا جانە مادەنيەت ماسەلەلەرى بويىنشا كەيبىر زاڭنامالىق اكتىلەرىنە وزگەرتۋلەر جانە تولىقتىرۋلار ەنگىزۋ تۋرالى» زاڭ جوباسىن تانىستىرۋ بارىسىندا مالىمدەدى. ءمينيستردىڭ ايتۋىنشا, تۇزەتۋلەر كينەماتوگرافيا سالاسىنىڭ قارقىندى دامۋىنا نەگىزدەلگەن. «ۇلتتىق فيلمدەردى شىعارۋ كەزىندە ساتىپ الىنعان ساحنالىق-قويىلىمدىق قۇرالداردى ساقتاۋ جانە پايدالانۋ ماسەلەسىن رەتتەۋ ۇسىنىلادى. ءبىز دەكوراتسيالار, پاۆيلوندار, ساحنالىق جابدىقتار تۋرالى ايتىپ وتىرمىز», دەدى مينيستر. سونداي-اق مينيسترلىك «قازاقفيلمدى» فيلمدەردىڭ مەملەكەتتىك قورىن ساقتاۋدى جۇزەگە اسىراتىن زاڭدى تۇلعا رەتىندە بەكىتۋدى ۇسىنادى.
سونىمەن قاتار تۇزەتۋلەر اياسىندا شەتەلدىك انيماتسيالىق فيلمدەر مەن وتباسىلىق فيلمدەردى قازاق تىلىنە دۋبلياجداۋعا مەملەكەتتىك قولداۋ قاراستىرىلعان, سونداي-اق ءتۇسىرىلىم كەزىندە سۋبسيديا الۋعا ۇمىتكەر حالىقارالىق كينوستۋديالار ءۇشىن تالاپتار جەڭىلدەتىلەدى. دەپۋتاتتاردىڭ ساۋالدارىنا جاۋاپ بەرە وتىرىپ, داۋرەن اباەۆ ەلىمىزدە فيلمدەر ءتۇسىرۋ كەزىندە سۋبسيديا الۋعا ۇمىتكەر حالىقارالىق كينوستۋديالار ءۇشىن تالاپتار جەڭىلدەتىلەتىنىن اتاپ ءوتتى.
«مادەنيەت تۋرالى» زاڭعا وزگەرىستەر ەنگىزۋ شەڭبەرىندە ەل ىشىندە جانە شەتەلدە مەملەكەت ەسەبىنەن وتكىزىلەتىن مادەني ءىس-شارالاردى ۇيىمداستىرۋدا جانە قارجىلاندىرۋدا جاڭا قاعيدالار مەن تاسىلدەر بەكىتىلەدى. سول سياقتى مينيسترلىك تاريحي-مادەني مۇرانى قورعاۋ قىزمەتىن مەملەكەتتىك قورىق-مۋزەيلەرگە جۇكتەۋدى ۇسىنادى.
بۇگىندە ەلىمىزدە 12 رەسپۋبليكالىق جانە 3 كوممۋنالدىق قورىق-مۋزەي جۇمىس ىستەيدى, ولاردىڭ يەلىگىندە 500-دەن استام تاريحي-مادەني مۇرا وبەكتىسى بار. «قولدانىستاعى زاڭنامادا ولاردى قورعاۋ قىزمەتى انىقتالماعان. ءبىزدىڭ تۇزەتۋ وسى ولقىلىقتى جويۋى كەرەك», دەدى مينيستر.
