وڭىردەگى اۆتوموبيل جولدارىنىڭ ساپاسى قانداي؟ بۇگىنگە دەيىن وڭىردە قانداي جۇمىستار اتقارىلدى؟ قولعا الىنعان جۇمىستار قانداي ناتيجە بەردى؟ وبلىس اكىمدىگى جولاۋشىلار كولىگى جانە اۆتوموبيل جولدارى باسقارماسىنىڭ باسشىسى باقىتجان جانىبەكوۆكە وسى ساۋالداردى قويعان ەدىك.
باسقارما باسشىسىنىڭ ايتۋىنشا, وڭىردەگى 10 038 شاقىرىم جولدىڭ 4 376 شاقىرىمى اۆتوموبيل جولدارى بولسا, 5 662 شاقىرىم ەلدى مەكەن كوشەلەرىنىڭ جەلىسىنە تيەسىلى ەكەن. الداعى كۇندەرى وسى جول بولىكتەرىن جوندەۋ, جاڭا جول سالۋ ماسەلەلەرى نازاردان تىس قالماق ەمەس.
ء«وڭىرىمىز بويىنشا رەسپۋبليكالىق ماڭىزى بار اۆتوموبيل جولدارىنىڭ ۇزىندىعى 1 198, وبلىستىق ماڭىزى بار اۆتوموبيل جولدارى 1 756, اۋداندىق ماڭىزى بار اۆتوموبيل جولدارى 1 383 شاقىرىمدى قۇرايدى.
جەرگىلىكتى ماڭىزى بار اۆتوجولدار مەن ەلدى مەكەن كوشەلەرىنىڭ جاعدايىن جاقسارتۋ ماقساتىندا يندۋستريا جانە ينفراقۇرىلىمدى دامىتۋ مينيسترلىگىمەن 2022 جىلى رەسپۋبليكالىق جانە جەرگىلىكتى بيۋدجەتتەردەن بىرلەسىپ قارجىلاندىرۋ تاجىريبەسىن جالعاستىرۋ ارقىلى جالپى 16,2 ملرد تەڭگە ءبولىنىپ وتىر. ونىڭ ىشىندە 8,3 ملرد تەڭگە رەسپۋبليكالىق, 7,9 ملرد تەڭگە جەرگىلىكتى بيۋدجەتتەردەن قارالدى. بولىنگەن قارجى ەسەبىنەن 9,4 شاقىرىم جولدى قايتا جاڭعىرتۋ جانە 605,2 شاقىرىم جولدى ورتا جوندەۋدەن وتكىزۋ جوسپارلانعان. بۇل ساناتقا وبلىستىق ماڭىزى بار اۆتوجولداردان 194,1, اۋداندىق ماڭىزى بار 53,6, ەلدى مەكەن كوشەلەرىنىڭ 357,5 شاقىرىمى ەنگىزىلدى», دەيدى باقىتجان جانىبەكوۆ.
جاۋاپتى باسقارما باسشىسىنىڭ سوزىنە سۇيەنسەك, وڭىردەگى جولداردى قالپىنا كەلتىرۋ بويىنشا ۇزىن-ىرعاسى 252 جوبا قولعا الىنىپتى. ونىڭ ىشىندە 28 جوبا (194,1) «نۇرلى جول», 77 جوبا (169 شاقىرىم) «اۋىل – ەل بەسىگى», 2 جوبا (9,4 شاقىرىم) «وڭىرلەردى دامىتۋ-2025» باعدارلاماسى اياسىندا جۇزەگە اسسا, 145 جوبا جەرگىلىكتى بيۋدجەتتەر ارقىلى شەشىمىن تاپپاق.
«باسقارمانىڭ 3 جىلدىق جوسپارىنا كەلەر بولساق, 2025 جىلعا دەيىن Amanat پارتياسىنىڭ سايلاۋالدى پلاتفورماسىنىڭ بەكىتىلگەن ءىس-شارالار جوسپارىنا جانە وبلىستىڭ دامۋ جوسپارىنا سايكەس, 621 شاقىرىمدى قۇرايتىن جەرگىلىكتى ماڭىزداعى اۆتوجولداردى ورتا جوندەۋدەن وتكىزىپ, قاناعاتتانارلىق دەڭگەيىن 100 پايىزعا جەتكىزۋ كوزدەلىپ وتىرعانىن ايتا كەتكەن ءلازىم. ونىڭ ىشىندە 414 شاقىرىم وبلىستىق ءمانى بار, 207 شاقىرىم اۋداندىق ماڭىزى بار اۆتوموبيل جولدارى ساناتىندا. جىلدار ءبولىنىسى بويىنشا 2023 جىلى 98 پايىز مەجەنى باعىندىرۋ ءۇشىن 203 شاقىرىم (25 جوبا), 2024 جىلى 99,5 پايىزدى قامتۋ ءۇشىن 238 شاقىرىم (24 جوبا), 2025 جىلى 100 پايىز مەجەگە قول جەتكىزۋ ءۇشىن 180 شاقىرىم (16 جوبا) ورىندايتىن بولامىز.
بىزدەگى وزەكتى ماسەلە – اۆتوجولداردىڭ مەرزىمىنەن بۇرىن بۇزىلۋى. مۇنداي ولقىلىقتاردىڭ بارلىعى دا رۇقسات ەتىلگەن سالماقتىق پارامەترلەردەن اسىپ كەتەتىن جۇك كولىكتەرىنىڭ باقىلاۋسىز جۇرۋىنەن ورىن الىپ وتىر.
اۋىر جۇك كولىكتەرىنىڭ باقىلاۋسىز جۇرۋىنەن جەرگىلىكتى ماڭىزى بار اۆتوجولداردىڭ بۇزىلۋىنا جول بەرمەۋ ماقساتىندا جامبىل وبلىسى بويىنشا كولىكتىك باقىلاۋ ينسپەكتسياسىمەن بىرلەسكەن ءىس-شارالارعا سايكەس, وبلىس جولدارىندا كەزەكشىلىكتەر ۇيىمداستىرىلىپ, تەكسەرۋلەر جۇرگىزىلىپ جاتىر. 2022 جىلدىڭ 7 ايىندا جىلجىمالى كولىكتىك باقىلاۋ پوستتارىندا 69 اكىمشىلىك حاتتاما تولتىرىلىپ, 4,0 ملن تەڭگە ايىپپۇل سالىنىپ ءوندىرىلدى», دەيدى باسقارما باسشىسى جاعدايدى ءتۇسىندىرىپ.
ب.جانىبەكوۆتىڭ ايتۋىنشا, كۇرە جول بويىنداعى جول-كولىك وقيعالارىنىڭ الدىن الۋ باعىتىندا اۋقىمدى جۇمىس قولعا الىنباق. دەرەكتەرگە سۇيەنسەك, وسى جىلدىڭ التى ايىندا 709 جول-كولىك وقيعالارى تىركەلگەن. سالدارىنان 128 ازامات باقيلىق بولىپ, 1 112 ادام ءتۇرلى دارەجەدەگى دەنە جاراقاتىن العان بولاتىن. كولىك جۇرگىزۋشىلەردىڭ باسىم بولىگى جىلدامدىقتى شامادان تىس ارتتىرۋ, قاراما-قارسى قوزعالىس جولاعىنا ءوتۋى سالدارىنىڭ سوڭى قايعىلى جاعدايلارعا اكەپ وتىر.
«جول قوزعالىسى قاۋىپسىزدىگىن قامتاماسىز ەتۋ ماقساتىندا وسى جىلى «كوركەمتەلەكوم» جشس باستاماسىمەن وبلىس ورتالىعىندا قۇقىق بۇزۋشىلىقتاردىڭ الدىن الۋ ءۇشىن «تاراز قالاسىنداعى زياتكەرلىك قاۋىپسىزدىك جۇيەسى جانە جول ترافيگىن تالداۋ» سەرگەك مەملەكەت-جەكەمەنشىك ارىپتەستىگى جوباسى ىسكە اسىرىلۋدا. اتالعان جوبا جول بويىنداعى وقىس وقيعالاردى ازايتۋعا بارىنشا ىقپال ەتەتىنىنە كۇمانىمىز جوق.
جوبانى ىسكە اسىرۋ كەزەڭى 2022-2027 جىلداردى قامتيدى. جالپى قۇنى – 5 ملرد 230 ملن 430 مىڭ تەڭگەنى قۇرايدى. جوسپار بويىنشا تاراز قالاسىندا 35 جەلىلىك ۋچاسكەدەگى اپپاراتتىق-باعدارلامالىق كەشەن, 450 نىسانعا 1 250 جالپى بەينەباقىلاۋ كامەرالارى, دەرەكتەردى وڭدەۋ جانە تالداۋ ورتالىعى: سەرۆەرلەر, دەرەكتەردى ساقتاۋ جۇيەسى; كوممۋتاتسيالىق جانە باعىتتاۋشى جابدىق, 13 قيىلىسقا اپپاراتتىق-باعدارلامالىق كەشەن ورنالاستىرىلماق.
بۇگىندە مەملەكەت-جەكەمەنشىك ارىپتەستىگى شارتىمەن بەكىتىلگەن ادرەستىك باعدارلاماعا سايكەس, 130 نىساندا 413 دانا جالپى بەينەباقىلاۋ كامەراسى ورناتىلىپ, ونىڭ 165 داناسى ىسكە قوسىلدى. اتالعان جوبانىڭ قۇرىلىس جۇمىستارىن اياقتاۋ قىركۇيەك ايىنا جوسپارلانعان. سونداي-اق جۇيەنى تولىق ىسكە قوسقاننان كەيىن ۇقك مەملەكەتتىك تەحنيكالىق قىزمەتىنىڭ اقپاراتتىق قاۋىپسىزدىك جۇيەسىنىڭ تالاپتارىنا سايكەستىك راسىمدەرى جۇرگىزىلىپ, وڭ قورىتىندىسى الىنعان سوڭ, 2022 جىلدىڭ جەلتوقسانىندا نىساندى پايدالانۋ كوزدەلۋدە.
بۇدان بولەك, جامبىل وبلىسى پوليتسيا دەپارتامەنتى تاراپىنان رەسپۋبليكالىق ماڭىزى بار اۆتوموبيل جولدارىندا جىلدامدىقتى شەكتەۋ كامەرالارىن ورناتۋ ادرەسى بەكىتىلىپ, 10 دانا جىلدامدىقتى شەكتەۋ كامەرالارى ورناتىلدى.
باسقارما ايماقتاعى اۆتوجولداردىڭ ساپاسىن, قاۋىپسىزدىكتى ارتتىرۋ باعىتىنداعى جۇمىستاردى ودان ءارى دە جالعاستىرا بەرەتىن بولادى. جالپى ءوڭىر جولدارىن رەتتەۋ بويىنشا اتقارىلىپ جاتقان جۇمىستار الداعى ۋاقىتتا قارقىندى جۇرگىزىلمەك», دەيدى باسقارما باسشىسى.
جامبىل وبلىسى
