كوركەم گيمناستيكادان الەم چەمپيوناتى 1963 جىلدان بەرى ۇزدىكسىز ۇيىمداستىرىلىپ كەلەدى. العاشقى جارىستى چەحيانىڭ پراگا قالاسى قابىلدادى. ودان كەيىن اتالعان جارىس الەمنىڭ ءار قيىرىندا ءوتتى. سپورتتىڭ بۇل ءتۇرىنىڭ فاۆوريتتەرى رەسەيلىكتەر ەكەنى ەش داۋ تۋعىزباسا كەرەك. كەلمەسكە كەتكەن كسرو-نىڭ قوسا العاندا, ولار بارلىعى 286 (141 التىن+91 كۇمىس+54 قولا) جۇلدە ولجالادى. بولگاريانىڭ دا جەڭىسپەن ورىلگەن باي ءداستۇرى بار. بۇل ەلدىڭ وكىلدەرى 167 (66+53+48) رەت جەڭىس تۇعىرىنا كوتەرىلدى. ۋكراينانىڭ كورسەتكىشى دە جامان ەمەس. تاۋەلسىزدىككە قول جەتكىزگەلى بەرى ولار 89 (25+28+36) مارتە ۇزدىكتەر قاتارىنان كورىندى. سونداي-اق تورتكۇل دۇنيەنىڭ تەڭدەسسىزدەرى جينالعان تارتىستا بەلارۋس (9+24+36), يتاليا (7+15+5), يسپانيا (7+11+18), گەرمانيا (5+6+3), چەحيا (4+5+8), گرەكيا (3+1+2), سولتۇستىك كورەيا (1+2+4) جانە جاپونيانىڭ (1+1+1) ءانۇرانى شىرقالدى. ال جۇلدە العاندار قاتارىندا ازەربايجان (0+1+7), يزرايل (0+1+2), قىتاي (0+1+2), فرانتسيا (0+0+2), رۋمىنيا (0+0+1) جانە وڭتۇستىك كورەيا (0+0+1) قۇرامالارى بار.
وزدەرىڭىز بايقاعانداي, الەمدىك دودادا ولجا سالۋ باقىتى بار-جوعى 17 مەملەكەتتىڭ وكىلدەرىنە بۇيىرعان ەكەن. وكىنىشكە قاراي, سولاردىڭ قاتارىندا قازاقستاندىق بۇرىمدىلار جوق. جەرلەستەرىمىزدىڭ اراسىنان ەڭ ۇزدىك ناتيجە ءاليا يۋسۋپوۆاعا تيەسىلى. شىمكەنتتىڭ سۇلۋى الەم چەمپيوناتىندا العاش رەت 2001 جىلى مادريدتە بوي كورسەتىپ, ودان كەيىن بىرەر جىل بويى ەل نامىسىن قورعادى. العاشقى جارىسىندا يۋسۋپوۆا كوپسايىستىڭ قورىتىندىسى بويىنشا سەگىزىنشى ساتىعا تابان تىرەسە, 2003 جىلى بۋداپەشت جانە 2005 جىلى باكۋدە جەتىنشى ورىنداردى يەلەندى. 2007 جىلى پاترىدا وزىق التى گيمناسشىنىڭ قاتارىنا قوسىلدى.
ءاليانىڭ الەمدىك دودادا جولى بولماعانىمەن, وزگە بايراقتى باسەكەلەردە ەلەۋلى تابىستارعا قول جەتكىزدى. مىڭ بۇرالعان قازاق قىزى 12 رەت قۇرلىق چەمپيونى اتانىپ, ازيا ويىندارىندا ەكى التىن مەن ەكى كۇمىس مەدالدى ولجالادى. دۇنيەجۇزىلىك ۋنيۆەرسيادا مەن بۇكىلالەمدىك ويىنداردا سان مارتە جۇلدەلى ورىنداردى ەنشىلەدى. 2004 جىلى افينا وليمپياداسىندا ءتورتىنشى ورىندى يەلەنسە, 2018 جىلى بەيجىڭدە بەسىنشى ساتىعا جايعاستى. قازىرگى كەزدە ءاليا ماقسۇتقىزى قازاقستان ۇلتتىق قۇراما كومانداسىنىڭ باس باپكەرى قىزمەتىن اتقارۋدا.
سوڭعى الەم چەمپيوناتى بىلتىر جاپونيانىڭ كيتاكيۋسيۋ قالاسىندا ءوتتى. سول جارىستا ساراپقا سالىنعان توعىز التىننىڭ جەتەۋىن رەسەي قۇراماسى جەڭىپ الدى. 23 جاستاعى دينا اۆەرينا جەكەلەگەن جاتتىعۋلاردا ءتورت التىن السا, ەگىزى ارينا ەكەۋى كوماندالىق سايىستا دا الدارىنا جان سالمادى. «تاسپادا» بەلورۋسسيالىق الينا گورنوسكو توپ جاردى. توپتىق باسەكەدەگى باس جۇلدەنىڭ ەكەۋىن رەسەيلىكتەر جەڭىپ السا, بىرەۋى اپەننين تۇبەگىنەن كەلگەن ارۋلارعا بۇيىردى. كۇنشىعىس ەلىندە بارلىعى ءتورت ەلدىڭ بۇرىمدىلارى عانا جەڭىس تۇعىرىنا كوتەرىلدى. ولار – رەسەي (7+4+2), يتاليا (1+3+1), بەلارۋس (1+2+4) جانە جاپونيا (0+0+2). سول جارىستا قازاقستاننىڭ بىردە-ءبىر گيمناسشىسى ۇزدىكتەر ساناتىنا قوسىلا المادى.
