تاعىلىمدى شاراعا ەلىمىزگە بەلگىلى عالىمدار مەن اقىن-جازۋشىلار, قوعام قايراتكەرلەرى, جۋرناليستەر, سونداي-اق اقىن شىعارماشىلىعىن زەردەلەگەن ادەبيەت جاناشىرلارى قاتىستى.
شارانىڭ رەسمي بولىمىندە وتتى جىرىمەن وقىرمان جۇرەگىنەن ورىن الىپ, ادەبيەت پەن عىلىمدا, جۋرناليستيكا مەن مەملەكەتتىك قىزمەتتە ۇلتتىق تانىم بيىگىنەن تابىلا بىلگەن قالامگەرگە پرەزيدەنت قاسىم-جومارت توقاەۆتىڭ, ۇكىمەت باسشىسى ءاليحان سمايىلوۆتىڭ, قازاقستان جازۋشىلار وداعىنىڭ توراعاسى ۇلىقبەك ەسداۋلەتتىڭ قۇتتىقتاۋ حاتتارى تابىستالىپ, قازۇۋ رەكتورى جانسەيىت تۇيمەباەۆتىڭ بۇيرىعىمەن ءبىلىم ورداسىنىڭ «ەرەن ەڭبەگى ءۇشىن» التىن مەدالى تاپسىرىلدى.
بەلگىلى ادەبيەتتانۋشى, فيلولوگيا عىلىمدارىنىڭ دوكتورى, پروفەسسور قانسەيىت ابدەز ۇلى ءوز بايانداماسىندا وتەگەن ورالباي ۇلى شىعارماشىلىعىنا شولۋ جاساي وتىرىپ, مەرەيتوي يەسىنىڭ اقىندىق سىرى مەن قايراتكەرلىك قىرىنا توقتالدى.
– وتەگەن ورالباي ۇلى سىرشىل, ويلى, ليريك اقىن. ونىڭ بۇگىنگە دەيىن جارىق كورگەن ون ءتورت جيناعىنا ەنگەن بارلىق ولەڭدەرىندە, داستاندارى مەن تولعاۋلارىندا ازاماتتىق اسقاق ءۇن جاتىر. ادامگەرشىلىك, يماندىلىق, كىسىلىك سەكىلدى تاقىرىپتاردى التىن ارقاۋ ەتكەن جىرلاردىڭ ەستەتيكالىق اسەرى تەرەڭ. جارتى عاسىرعا جۋىق قازاق پوەزياسى مەن قازاق ادەبيەتتانۋ عىلىمىنىڭ قارا شاڭىراعىندا قالامىنا شاڭ جۇقتىرماي ويلى, پاراساتتى دۇنيەلەردى قازاق وقىرمانىنا ۇسىنۋمەن كەلە جاتقان جانى جايساڭ, جۇرەگى جومارت قالامگەر تىنىسى كەڭ, تولىمدى شىعارمالارىمەن ادەبيەتتەگى ءوزىنىڭ ايشىقتى ورنىن بەلگىلەدى, – دەدى قانسەيىت ابدەز ۇلى.
قازاقستان جازۋشىلار وداعى توراعاسىنىڭ ورىنباسارى مەرەكە قۇلكەنوۆ, ەڭبەك جولىن تىلشىلىك تىرشىلىكتەن باستاعان قالامگەردىڭ جۋرناليستىك جولدا تالاي تاعدىرعا اراشا بولعانىن, ولەڭ ولكەسىنە قادام باسقان قانشاما جاستىڭ تۇساۋىن كەسكەنىن تىلگە تيەك ەتتى.
«وتەگەن ورالباي ۇلى «لەنينشىل جاس» (قازىرگى جاس الاش) باسىلىمىنىڭ ادەبيەت ءبولىمىن باسقارعان تۇسىندا پوەزياعا ىڭكار قانشاما تالانتتىڭ ولەڭىن جاريالاپ, جۇرتقا تانىستىردى. سول جاس تالانتتار بۇگىنگى پوەزيانىڭ كوشىندە وزىندىك ورنى بار ەل تانىعان اقىندارعا اينالدى. ادەبيەتكە ادال ازامات مەملەكەتتىك قىزمەتتىڭ مىنبەرىنەن دە ۇلتتىڭ ءسوزىن سويلەپ, رۋحانياتتىڭ جوعىن جوقتادى», دەيدى مەرەكە قۇلكەنوۆ.
بەلگىلى عالىم تۇرسىنبەك بايمولداەۆ وتەگەن ورالباي ۇلىنىڭ سوزىنە جازىلعان اندەر ۇلتتىق مادەنيەتتىڭ جاۋھارىنا قوسىلىپ, اقىننىڭ قالامىنان ورىلگەن «جاس جۇبايلار جىرى» سەزىم بيىگىندە تابىسقان عاشىقتاردىڭ گيمنىنە اينالعانىن اتاپ ءوتتى.
جازۋشى دانداي ىسقاق ۇزاق جىلدار بويى ادەبيەت پەن مەملەكەتتىك قىزمەتتى قاتار ۇشتاستىرعان وتەگەن اقىننىڭ ازاماتتىق كەلبەتىنە توقتالىپ, بولمىسى تازا بوياماسىز جىر التاي مەن اتىراۋدىڭ, ارقا مەن الاتاۋدىڭ اراسىنداعى قالىڭ قازاقتىڭ جۇرەك تورىنەن ورىن الۋىن اقىننىڭ جان تازالىعىنا بالادى.
بۇگىنگى قازاق پوەزياسىنىڭ ءورىسى, وتەگەن ورالباي ۇلى جىرلارىنىڭ وزىنە ءتان كوركەمدىك كەڭىستىگى تۋراسىندا ءسوز قوزعاعان پروفەسسور زەينول-عابدەن بيسەنعالي, شالقار شابىتتان قۋات العان شايىردىڭ قاجىلىق ساپارى اسەرىنەن جازىلعان ءمىناجات ستيلىندەگى «قاعبانىڭ قارلىعاشتارى» جىر جيناعى ادامدى كىسىلىككە, رۋحاني كەمەلدىككە باستايتىن ايتۋلى ەڭبەك دەپ باعالادى.
وتەگەن ورالباي ۇلىنىڭ قالامىنان ورىلگەن تانىمدىق زەرتتەۋلەر, ادەبي تالداۋلار عىلىمي قوعامداستىقتىڭ يگىلىگىنە اينالىپ, بولاشاق ۇستازدار مەن جۋرناليستەر ءۇشىن ءمانى زور مۇرا ەكەنىن اتاپ وتكەن فيلولوگيا فاكۋلتەتىنىڭ دەكانى بايان جولداسبەكوۆا مەرەيتوي يەسى ءبىلىم العان فاكۋلتەت ءوز تۇلەگىن ماقتان تۇتاتىنىن ايتىپ, اقىنعا العىس ءبىلدىردى.
ءوز كەزەگىندە قازۇۋ-دىڭ عىلىمي-يننوۆاتسيالىق قىزمەت جونىندەگى پرورەكتورى حايدار تاسىبەكوۆ, جۋرناليستيكا فاكۋلتەتىنىڭ دەكانى نۇرجان قۋانتاي ۇلى, تاريح فاكۋلتەتىنىڭ دەكانى دوسبول بايقوناقوۆ, ۇستاز-عالىم سانسىزباي ماديەۆ, پروفەسسور انارباي بۇلدىباي, ۇستاز-عالىم قوڭىر مۇقاتاەۆا, تاريحشى بەرەكەت كارىباەۆ 70 جاسقا ۇلكەن شىعارماشىلىق تابىسپەن كەلگەن قالامگەردىڭ قولتاڭباسى ۇلت رۋحانياتىنا قوسىلعان سۇبەلى ۇلەس ەكەنىن ايتتى.
ادەبيەت پەن مادەنيەتتىڭ وتكەنى مەن بۇگىنى زەردەلەنگەن باسقوسۋدا فيلولوگيا فاكۋلتەتىنىڭ ستۋدەنتتەرى وتەگەن ورالباي ۇلى ولەڭدەرىن جاتقا وقىدى. كەزدەسۋدى قورىتىندىلاعان قازۇۋ-دىڭ دوتسەنتى الماسبەك ماۋلەنوۆ, وتەگەن ورالباي ۇلى تۆورچەستۆاسىن ءبىر ارنادا توعىستىراتىن ون تومدىق شىعارمالار جيناعى جارىق كورۋدى باستاعانىن جەتكىزدى.
ءىس-شاراعا كەلگەندەر مەرەيتوي يەسىمەن ەستەلىك سۋرەتكە ءتۇسىپ, كىتاپحانا الاڭىنداعى ءو. ورالباي ۇلى شىعارماشىلىعىنا ارنالعان ارنايى كورمەنى تاماشالادى.
