ايتىس ونەرىنە كەشتەۋ كەلسە دە وبلىستىق, رەسپۋبليكالىق, حالىقارالىق ايتىستاردا اتوي سالعان تاۋشەن (تاۋىركوز) جورابەكقىزى 1932 جىلى 2 ناۋرىزدا وڭتۇستىك قازاقستان وبلىسىنىڭ (قازىرگى تۇركىستان وبلىسى) ءشاۋىلدىر اۋدانىنا قاراستى (قازىرگى وتىرار اۋدانى) قوستەرەك اۋىلىندا دۇنيەگە كەلىپ, 2004 جىلى وسى اۋداننىڭ بالتاكول اۋىلىندا 72 جاسىندا قايتىس بولعان.
تاۋشەن اپا ايتىسقا تابيعاتىنداعى دارىن تالانتىنىڭ ارقاسىندا اۋىل اراسىندا بولاتىن ءتۇرلى توي-تومالاق, ونەر كەشتەرىندە, ايتتا كەزدەسەتىن قىز بەن بوزبالانىڭ ولەڭ ايتىپ ازىلدەسۋى مەن قايىمداسۋىندا, ءسوز قاعىسۋلارىندا ىسىلىپ, تاجىريبە جيناپ, كوركەمسوز قۇپياسىن تەرەڭ ۇعىنىپ, ءوز زامانىنىڭ الەۋمەتتىك ءومىرىنىڭ زەرتتەۋشىسى, ايتىس الەمىنىڭ وزىق ويشىلى دەڭگەيىندە كەلدى. سوندىقتان دا ول ايتىس ونەرىن كوركەمدىگى مەن مازمۇنى جاعىنان بايىتىپ, ونى بەلگىلى ءبىر بەلەسكە كوتەرىپ كەتتى. اقىننىڭ ايتىستاعى اقىندىق ءتاسىلى قارسىلاسىن قىسقا, ۇتقىر دا ۇشقىر, ويلى, دالەلدى جاۋاپتارمەن قىسپاققا الىپ, تۇقىرتىپ تاستايتىن.
جاسىنان ولەڭقۇمار بولعان ول كوپتەگەن قيىنشىلىقتى كورە ءجۇرىپ, اقىرى ءوزىنىڭ ارمانىنا جەتىپ, ايتىستىڭ قايناعان ورتاسىنا ءتۇستى. 1986 جىلى الماتىداعى رەسپۋبليكالىق ايتىستا ءبىرىنشى ورىندى يەلەندى. قازاقستاننىڭ حالىق اقىنى, قىزىلوردالىق ماناپ كوكەنوۆپەن, قىرعىزستاننىڭ حالىق اقىنى ءاشىرالى ايتاەۆپەن, كوكشەتاۋلىق حالىق اقىنى كوكەن شاكەەۆپەن دە ايتىسقا تۇسكەن تاۋشەن اپامىز ءوزىنىڭ وڭاي شاعىلا قوياتىن جاڭعاق ەمەس ەكەنىن انىق اڭعارتتى. تاۋشەن اقىن شىنىندا دا شارشى توپتا شاشاسىنا شاڭ جۇقتىرمايتىن شايىر, «وتىراردىڭ اقبەرەنى», «اق اناسى» دەگەن اتپەن ەل ەسىندە قالا بەرمەك.
ءسابيرا ايتباي,
مادەنيەت سالاسىنىڭ ۇزدىگى تۇركىستان وبلىسى
