سۋرەتتە: ەرنار چيمباەۆ جەڭىس تۇعىرىندا
قازاقستاندىقتار كرەمل كۋبوگىنا سوڭعى جىلدارى تۇراقتى قاتىسا باستادى. اتاپ ايتار بولساق, بۇعان دەيىن ەكى بىردەي تالانتتى سپورتشىمىز كرەمل كۋبوگىن قانجىعاسىنا بايلاعان. قانىبەك ساعىندىقوۆ – 2005, ال ءاليحان قارانەەۆ 2010 جىلى جەڭىس تۇعىرىنا كوتەرىلدى. ەندى, مىنە, ءۇشىنشى مارتە كرەمل كۋبوگى قازاقستانعا كەلدى.
جاقىندا عانا ماسكەۋدە اياقتالعان كرەمل كۋبوگىنا الەمنىڭ 9 ەلىنەن, اتاپ ايتقاندا, رەسەي, قازاقستان, قىرعىزستان, ۋكراينا, بەلارۋس, وڭتۇستىك كورەيا, وزبەكستان, مولدوۆا, ارمەنيادان 392 بيلياردشى كەلدى. بۇلاردىڭ ءبارى ءوز ەلىندە بايگەنى شاپپاي الىپ جۇرگەندەر. ءدۇبىرلى دودا 3 ءتۇرى (بىرىكتىرىلگەن پيراميدا, ەركىن پيراميدا, باسسەين) بويىنشا ءوتتى.
قازاقستاننان بارعان 11 سپورتشى, ونىڭ ىشىندە ۇلتتىق قۇرامانىڭ مۇشەسى, ەكى دۇركىن الەم چەمپيونى, حالىقارالىق دارەجەدەگى سپورت شەبەرى ەرنار چيمباەۆ بۇل جولى دا تاكتيكالىق شەبەرلىك تانىتا ءبىلدى. ول قارسىلاستارىن باسىمدىقپەن جەڭدى. اقتىق سىندا قىرعىزستاندىق داستان لەپشاقوۆتى 5:2 ەسەبىمەن ۇتىپ, مارتەبەلى كۋبوكتى يەلەندى. ەكى ءۇشىنشى ورىنعا رەسەيلىك پەن قىرعىزستاندىق يە بولدى.
بيليارد سپورتى ەلىمىزدە قارىشتاپ دامۋ ۇستىندە. قازاقستان رەسپۋبليكاسىندا بيليارد سپورتىنىڭ وركەندەۋىنە بيليارد سپورتى فەدەراتسياسىنىڭ پرەزيدەنتى اڭسارى قارانەەۆ ەرەكشە ۇلەس قوسىپ كەلەدى. بۇل كۇندەرى اتالعان ويىن ءتۇرى ەلىمىزدىڭ بارلىق وڭىرىندە دامىپ, ونىمەن شۇعىلداناتىندار قاتارى كۇن سايىن ارتا ءتۇسىپ وتىر. ماسەلەن, وسكەمەندە سوڭعى جىلدارى بىرنەشە ءدۇبىرلى جارىس ءوتتى. رەسپۋبليكا بيليارد سپورتى فەدەراتسياسىنىڭ شىعىس قازاقستان وبلىستىق فيليالىنىڭ ديرەكتورى سەرىك اقتانوۆتىڭ باستاماسىمەن وسكەمەندە ازيانىڭ اشىق چەمپيوناتى, جاقىندا عانا قوعام قايراتكەرى, جازۋشى قابدەش ءجۇمادىلوۆتى ەسكە الۋعا ارنالعان تۋرنير ءوتتى. رەتى كەلگەندە ايتا كەتۋ كەرەك, ەلىمىزدىڭ شىعىسىنداعى فەدەراتسيانى دا 2008 جىلى اڭسارى قارانەەۆ اشقان بولاتىن. ونىڭ باستاماسىمەن ءار وڭىردە حالىقارالىق تۋرنيرلەر ءوتىپ تۇرادى. كرەمل كۋبوگىنىڭ سىرتىندا الەم, ەۋروپا بىرىنشىلىكتەرىندە جەڭىپ العان جۇلدەلەر دە قوماقتى.
ەندى ەرنار چيمباەۆ تۋرالى ايتا كەتەيىك. اڭسارى قارانەەۆتىڭ پايىمداۋىنشا, ەرنار سياقتى ۇلتىن سۇيەتىن, پاتريوت ازاماتتار ەل نامىسىن ابىرويمەن قورعاي بىلەدى. ەرنار ءسابيت ۇلى 2010, 2012 جىلدارى بيلياردتان الەم چەمپيونى اتاندى. قازاقستاننىڭ بىرنەشە دۇركىن چەمپيونى, ءابسوليۋتتى جەڭىمپاز. قازاقستان مەن تۇرىكمەنستاننىڭ قۇراما كوماندالارىن جاتتىقتىرىپ ءجۇر. ەرناردىڭ ءىزباسارلارى الداعى ۋاقىتتا دا قازاقستاننىڭ كوك تۋىن جەلبىرەتە بەرمەك.
وڭداسىن ەلۋباي,
قازاقستاننىڭ قۇرمەتتى سپورت قايراتكەرى
