ءىس-شاراعا 6655 اسكەري ءبولىمىنىڭ ساربازدارى, كىتاپحانا وقىرماندارى مەن قىزمەتكەرلەرى قاتىستى. ماقساتى – حح عاسىردىڭ ءبىرتۋار ازاماتى, ءوز حالقىنىڭ ايناسى بولعان ۇلى قوعام قايراتكەرى, اقىن, ۇستاز, اعارتۋشى عالىم احمەت بايتۇرسىن ۇلىنىڭ ءومىرى مەن شىعارماشىلىعى جايلى وقىرمانداردى سۋسىنداتا وتىرىپ, ونىڭ تۋعان حالقى ءۇشىن ايانباي ەتكەن ەڭبەگىن دارىپتەۋ, ۇرپاققا ۇلگى ەتۋ.
«…وزگە وقىعان مىرزالار شەن ىزدەپ جۇرگەندە, قورلىققا شىداپ, قۇلدىققا كونىپ, ۇيقى باسقان قالىڭ قازاقتىڭ ۇلت نامىسىن جىرتىپ, ۇلتتىق ارىن جوقتاعان پاتشا زامانىندا جالعىز-اق احمەت ەدى. قازاقتىڭ ول ۋاقىتتاعى كەيبىر وقىعاندارى ۋەز, گۋبەرنيا سوتتارىنا كۇش سالىپ, ءتىلماش بولىپ, كەيبىرى ارىن ساتىپ ۇلىقتىق ىزدەپ جۇرگەندە, احمەت قازاق ۇلتىنا جانىن اياماي قىزمەت قىلدى..., حالقىنىڭ ارىن ىزدەپ, ءوزىنىڭ ويعا العان ءىسى ءۇشىن ءبىر باسىن بايگەگە تىكتى», دەپ جازدى ساكەن سەيفۋللين.
كەشكە قاتىسۋشىلار احمەت بايتۇرسىن ۇلىنىڭ كىتاپتارىنا شولۋ جاسادى. سونىمەن قاتار 5 قىركۇيەك – قازاقستان حالقى تىلدەرىنىڭ مەرەكەسىنە وراي 6655 اسكەري ءبولىمىنىڭ قاتارداعى جاۋىنگەرلەرى راسيم نيازوۆ, رينات ساليموۆ, سۋنراب نيازوۆ جينالعاندار مەن كىتاپحانا قىزمەتكەرلەرىن اتاۋلى مەرەكەمەن قۇتتىقتاپ, ىزگى تىلەكتەرىن ءبىلدىردى. ءىس-شارا سوڭىندا ساربازدار «مەن قازاقپىن» پاتريوتتىق ولەڭىن حورمەن شىرقادى. اعا لەيتەنانت التىنشاش بايمۋرزينا وسىنداي تاعىلىمدى كەش ۇيىمداستىرعان كىتاپحانا ۇجىمىنا جينالعان قاۋىم اتىنان ريزاشىلىعىن ءبىلدىردى.
لاۋرا سۇلتانبەكوۆا,
ساعي جيەنباەۆ اتىنداعى وبلىستىق جاسوسپىرىمدەر كىتاپحاناسىنىڭ كىتاپحاناشىسى
اقتوبە
