ناقتىراق ايتقاندا, بيىل قىركۇيەك ايىنىڭ سوڭىنا دەيىن وبلىستاعى اۋىل مەكتەپتەرىندە جاڭا اۆتوبۋستار پايدا بولماقشى. ال وسى ايدىڭ 15-ىنە دەيىن اباي, بۇقار جىراۋ جانە قارقارالى اۋداندارىنىڭ مەكتەپتەرى العاشقىلاردىڭ ءبىرى بولىپ تاسىمال كولىگىنە يەلىك ەتەدى.
قاراعاندى وبلىستىق ءبىلىم باسقارماسىنىڭ باسشىسى گۇلسىم قوجاحمەتوۆا وقۋ-اعارتۋ مينيسترلىگىنىڭ ەلىمىزدەگى مەكتەپ اۆتوپاركىن جاڭارتۋ جونىندەگى رەسپۋبليكالىق جوباسى اياسىندا ليزينگتىك قارجىلاندىرۋ ەسەبىنەن 27 اۆتوبۋس ساتىپ الۋ جوباسىنىڭ ىسكە اسقانىن ءمالىم ەتتى.
– وسى ماقساتتا «ونەركاسىپتى دامىتۋ قورى» اق مەن «Hyundai Trans Auto» جشس جانە «QazTehna» جشس جەتكىزۋشىلەرى اراسىندا كەلىسىمشارتتار جاسالدى, – دەدى وبلىستىڭ باس مۇعالىمى.
تاياۋدا قاراعاندى وبلىستىق ءبىلىم باسقارماسىنىڭ باسشىلىعى ارنايى كولىك قابىلداۋدىڭ العاشقى اكتىلەرىنە قول قويدى. ءتيىستى قۇجاتتاردى رەسىمدەۋ بويىنشا جۇمىستار باستالىپ كەتتى.
بىردەن ايتا كەتۋ كەرەك, وقۋشىلاردى تاسۋعا ارنالعان جاڭا اۆتوبۋستار زاماناۋي تالاپتارعا تولىق جاۋاپ بەرەدى. ولار قاۋىپسىزدىك بەلدىكتەرىمەن, مەكتەپ ريۋكزاكتارىنا ارنالعان سورەلەرمەن, ەسىك اشىق بولعان كەزىندە قوزعالىستى بۇعاتتاۋ مەحانيزمىمەن جانە ساعاتىنا 60 شاقىرىم جىلدامدىق شەكتەگىشپەن جابدىقتالعان.
– سونىمەن قاتار اۆتوبۋستاردا مۇمكىندىگى شەكتەۋلى بالالارعا ارنالعان ارنايى ورىندىقتار دا بار. مۇنىڭ بارلىعى بالالاردى مەكتەپكە جانە ۇيلەرىنە قاۋىپسىز تاسىمالداۋدى قامتاماسىز ەتەدى, – دەيدى گ.قوجاحمەتوۆا.
اتاپ وتەتىن تاعى ءبىر جايت, وبلىس بويىنشا بيىلعى وقۋ جىلىندا مەكتەبى جوق, شالعايدا ورنالاسقان 121 ەلدى مەكەننىڭ 1 628 وقۋشىسى ءبىلىم بەرۋ نىساندارىنا كۇن سايىن جانە اپتا سايىن تاسىمالداۋمەن قامتاماسىز ەتىلگەن.
قاراعاندى وبلىسى
