قىسقامەتراجدى فيلم-دەبيۋتتىڭ تۇسىرىلىمىنە ءبىر اپتا ۋاقىت كەتتى. كينوكارتينا مادەنيەت جانە سپورت مينيسترلىگىنىڭ تاپسىرىسى بويىنشا ۇلتتىق كينونى مەملەكەتتىك قولداۋ ورتالىعىنىڭ قولداۋىمەن «قازاقفيلم» كينوستۋدياسىندا ءتۇسىرىلدى. جوباعا 40-تان اسا ادام جۇمىلدىرىلعان. فيلمدە باستى رولدەردى تانىمال اكتەرلەر دۋلىعا اقمولدا مەن دانيار بەكتەنوۆ وينادى.
ءفيلمنىڭ باستى كەيىپكەرى 7 جاسار ايدار جەرگىلىكتى كاسىپكەر ساكەن مەن ءۇي شارۋاسىنداعى ايەل ءاليانىڭ جالعىز ۇلى. وقيعا جەلىسى ءومىردىڭ ءاربىر ساتتەرىن, بالالىق شاقتاعى عاجايىپ ەستەلىكتەردى ۇمىت قالدىراتىن ادام ساناسى مەن وعان قايتا اپارار جول تۋراسىندا وربىگەن. قاراپايىم وقيعادان باستاۋ الاتىن فيلم, ادام بولمىسىنداعى كىشكەنتاي فيلوسوفيانى قوزعايدى. وقيعا كورەرمەنگە ادام ونىڭ مۇراسى ەمەس, ادام جادىمىزداعى جارقىن ەستەلىك, ال بالالىق شاق – ەشقاشان قايتىپ كەلمەيتىن كەزەڭ ەكەنىن جەتكىزەدى.
«كارتينا شاعىن بولسا دا, شامالى كۇننىڭ ىشىندە كوماندا ءبىر-بىرىنە ۇيرەنىپ قالدى, جوبا ءۇشىن جۇمىلا اتسالىستى. ارينە, پروتسەسس بارىسىندا كەيبىر كۇتپەگەن قيىندىقتار تۋىنداپ جاتتى, بىراق تۇسىرىلىمگە كەرى اسەرىن تيگىزبەدى. ءبىز ءۇشىن ەڭ قيىنعا سوققانى تراسسا بويىنداعى ساحنالاردى ءتۇسىرۋ بولدى. سوعان قاراماستان ءفيلمنىڭ قويۋشى وپەراتورى ميرحات چاپاي «قازاقفيلمنىڭ» كومانداسىمەن بىرلەسە جاقسى جۇمىس اتقاردى دەپ ويلايمىن. مەن ءۇشىن العاش رەت بالا اكتەرمەن, ۇلكەن اكتەرمەن جۇمىس ىستەۋ جاڭا تاجىريبە بولدى. دۋلىعا اعانىڭ ءتۇسىرىلىم الاڭىندا كوپ كومەگى ءتيدى. اكتەرلىك قۇرام ءبىر-بىرىنە ۇيرەنىسىپ كەتكەن سوڭ, كادرداعى كوڭىل كۇي شىنايى شىقتى دەپ ويلايمىن», دەيدى ءفيلمنىڭ ستسەناري اۆتورى ءارى قويۋشى رەجيسسەرى ىڭكار كارىم.
بۇل جوباعا دەيىن, جاس رەجيسسەر جەكەمەنشىك قىسقامەتراجدى فيلمدەر ءتۇسىرىپ كەلگەن. ولاردىڭ ءبىرازى كينوفەستيۆالدەرگە قاتىسىپ تا ۇلگەردى. رەجيسسەردىڭ ايتۋىنشا, «مەرەكە» ءفيلمىنىڭ ستسەناريىنىڭ العاشقى نۇسقاسى ءسال وزگەشە بولعانىمەن, باستى يدەيا جوعالماعان. جاقىن ارادا شىعارماشىلىق توپ كارتينانىڭ مونتاجداۋ پروتسەسىنە كىرىسپەك. ء«فيلمنىڭ مونتاجداۋ پروتسەسىنە ۋاقىت سوزباي كىرىسۋىمىز قاجەت. نەگىزى مونتاجعا دەيىن سانانى سۋىتىپ, ماتەريال شامالى «دەم العان» سوڭ كىرىسكەن دۇرىسىراق دەپ ويلايمىن. الايدا الدا ءالى دىبىس, ءتۇس وڭدەۋ سياقتى كوپتەگەن تەحنيكالىق جۇمىس كۇتىپ تۇر», دەپ تولىقتىردى رەجيسسەر.
قىسقامەتراجدى «مەرەكە» فيلم-دەبيۋتى كورەرمەنگە كەلەر جىلدىڭ باسىندا جول تارتادى. ايتا كەتەيىك, «مەرەكە» دەبيۋتتىك ءفيلمى 2022 جىلعى 7-11 ماۋسىم ارالىعىندا وتكەن ۇلتتىق كينونى قولداۋ مەملەكەتتىك ورتالىعىنىڭ كەزەكتى پيتچينگىنىڭ قورىتىندىسى بويىنشا مەملەكەتتىك قارجىلاندىرۋعا يە بولدى.
