يندۋستريا جانە ينفراقۇرىلىمدىق دامۋ مينيسترلىگىنىڭ حابارلاۋىنشا, جوبالاۋ, قۇرىلىس جانە اۆتوموبيل جولدارىن پايدالانۋعا بەرۋدىڭ ساپاسىن ارتتىرۋدا جول سالاسىنداعى قۇرىلىس نورمالارى, ستاندارتتارى مەن نورماتيۆتىك-تەحنيكالىق قۇجاتتار بازالىق ءرول وينايدى. بۇگىندە ەلىمىزدە 1 200-دەن اسا سالالىق قۇجات قولدانىستا. ونىڭ ىشىندە 114 قۇرىلىس ءنورماتيۆى, 303 ۇلتتىق ستاندارت, 527 مەملەكەتارالىق ستاندارت, 17 ۆەدومستۆولىق نورما, 200 ۆەدومستۆولىق نورماتيۆتىك-تەحنيكالىق قۇجات جانە 56 باعا بەلگىلەۋ مەن سمەتالىق جيناق بار.
پروفيلدىك قۇجاتتاردىڭ شامادان تىس كوپ بولۋى مەن رەتسىزدىگى ولاردى باسىمدىقتار بويىنشا انىقتاۋ كەزىندە ءبىرشاما قولايسىزدىق تۋدىرادى. سونىمەن بىرگە قۇجاتتاردا ءجيى كەزدەسەتىن سايكەسسىزدىكتەر, قاراما-قايشى تالاپتار, قايتالاما جانە ەسكىرگەن نورماتيۆتەر جاعدايدى ودان ارمەن كۇردەلەندىرىپ, جوبالاۋ مەن قۇرىلىستا كوپتەگەن قاتەلىككە جول بەرەدى.
بۇل ورايدا قالىپتاسقان بەيبەرەكەت قازىرگى قولدانىستاعى مەملەكەتتىك ساتىپ الۋلار كەزىندەگى جاعدايدى تۋدىرىپ وتىر. بىلايشا ايتقاندا, قازىر ۇلتتىق ستاندارتتاردى, ونىڭ ىشىندە جول سالاسىنداعى ستاندارتتاردى ازىرلەۋگە كەز كەلگەن فيزيكالىق نەمەسە زاڭدى تۇلعانىڭ قاتىسۋىنا مۇمكىندىك بەرەدى. بۇل ءوز كەزەگىندە نورماتيۆتىك قۇجاتتىڭ ساپاسىنىڭ تومەندەۋىنە, ونىڭ شىنايىلىعى مەن جول مەكەمەلەرى ءۇشىن قاجەتتىلىگىنە اسەر ەتەدى.
جالپى, كەز كەلگەن قۇرىلىس ساپالى جوبالاۋدان باستالاتىنى بەلگىلى. ەلىمىزدەگى اۆتوكولىك جولدارى جۇيەلەرىن دامىتۋ بويىنشا ۇلتتىق دەڭگەيدەگى مىندەتتەمەلەردى وڭتايلى شەشۋ ءۇشىن يندۋستريا جانە ينفراقۇرىلىمدىق دامۋ مينيسترلىگى اۆتوكولىك جولى سالاسىن نورماتيۆتىك باقىلاۋعا جۇيەلى رەۆيزيا جاساۋ قاجەتتىگىنە ماڭىز بەرۋدە.
«مەملەكەت باسشىسىنىڭ بيىلعى جولداۋىندا ايتىلعان تاپسىرمالاردى ورىنداۋ ءۇشىن قازاقستان جول عىلىمي-زەرتتەۋ ينستيتۋتىنا نورماتيۆتىك بازانى قالىپتاستىرۋ بارىسىندا وزگەشە ءتاسىل قولدانۋ تاپسىرىلىپ وتىر. ۇلتتىق ستاندارتتى ازىرلەۋ الدىندا جان-جاقتى عىلىمي زەرتتەۋ جۇرگىزىلۋگە ءتيىس. سونىمەن قاتار زەرتحانالىق جۇمىستاردىڭ ناتيجەسى, تاجىريبەلىك اۋماقتار مەن پيلوتتىق جوبالارعا ۇزاق ۋاقىت بويعى مونيتورينگىنىڭ قورىتىندىسى دا نازارعا الىنۋى قاجەت», دەپ حابارلادى مينيسترلىك.
وسى تاراپتا جۇرگىزىلگەن رەفورمانىڭ ناتيجەسىندە جەتىلدىرىلگەن جاڭا قۇرىلىمدىق نورماتيۆتىك قۇجات قۇرىلۋعا ءتيىس. ونداعى قۇجاتتار سانى 50-70-تەن اسپايتىن بولادى. جاڭا پاكەتتە ستاندارتتار مەن نورماتيۆتىك-تەحنيكالىق قۇجاتتاردىڭ باسىمدىعىنا ايقىن شەكتەۋلەردىڭ ەنگىزىلۋىنە باسىمدىق بەرىلەدى. سونداي-اق جاڭا تەحنولوگيالاردىڭ پايدا بولۋىنا بايلانىستى قۇجاتتاردىڭ وپەراتيۆتىك ماڭىزدىلىعىنا دا نازار اۋدارىلماق.
