ۇيىمداستىرۋشىلاردىڭ ايتۋىنشا, جوباعا قاتىسۋعا نيەت بىلدىرگەن ايەلدەردىڭ سانى كوپ بولعان. «قاتىسۋشىلاردى قازاقستاننىڭ تۇكپىر-تۇكپىرىنەن جينالعان 342 كوشباسشىنىڭ اراسىنان تاڭداپ الدىق. ءاربىرىنىڭ جۇزەگە اسىرعان ءساتتى جوباسى, جەتىستىگى مەن جەڭىسى بار. ىرىكتەۋدەن وتكەن 30 قاتىسۋشىنىڭ بارلىعى دا باعدارلامادان كوپ ءبىلىم الادى جانە Tomiris ساياسي مانساپتارىن جاڭا دەڭگەيگە كوتەرۋگە ىقپال ەتەدى دەپ سەنەمىن», دەدى كونكۋرستىق كوميسسيا توراعاسى, Amanat پارتياسى ساياسي مەنەدجمەنت اكادەمياسىنىڭ ديرەكتورى دانيار مۇقيتانوۆ.
سونداي-اق وقۋ باعدارلاماسىنىڭ اشىلۋ سالتاناتىنا قاتىسقان پارتيا حاتشىسى داۋلەت كارىبەك جوبانىڭ ەرەكشەلىگىن ايتىپ ءوتتى. «بۇگىندە تاۋەلسىزدىگىمىزدى العاننان كەيىن تاريحىمىزعا قايتا ورالىپ, توميريس, دومالاق انا سەكىلدى تۇلعالارىمىزدىڭ دارالىعى مەن دانالىعىن دارىپتەۋ ءۇشىن وسىنداي ۇلكەن جوبانى باستاپ وتىرمىز. كوپتىڭ اراسىنان سۋىرىلىپ شىققان 30 ايەل بىلىكتىلىگىن شىڭداۋعا جولداما الدى. بۇل ولاردىڭ ۇزدىكتەردىڭ ۇزدىگى ەكەندەرىن دالەلدەيدى», دەدى د.كارىبەك.
وقۋ ناتيجەسىندە باعدارلاماعا قاتىسۋشىلار ءوز ايماقتارىنداعى الەۋمەتتىك-ەكونوميكالىق جاعدايدى جاقسارتۋعا باعىتتالعان ساياسي جوبالاردى قورعايدى. اكادەميا جىل سوڭىنا دەيىن ونلاين كوۋچينگتىك سەسسيالار ارقىلى ادىستەمەلىك قولداۋ كورسەتەدى.
كوشباسشى ايەلدەرگە ارنالعان ترەنينگ قاتىسۋشىسى, Urpaq قازاق مادەني-اعارتۋشىلىق ورتالىعىنىڭ ديرەكتورى گۇلباحشا مۇساباەۆا «مەنىڭ ماقساتىم – تۋىپ-وسكەن سولتۇستىك قازاقستان وبلىسىنىڭ الەۋمەتتىك-ساياسي جاعدايىن جاقسارتۋ ارنالعان جوبا دايىنداۋ. ايەلدەردىڭ تۇلعالىق ءوسۋى مەن ينتەللەكتۋالدىق دامۋىنا كومەكتەسكىم كەلەدى», دەگەن جوسپارىمەن ءبولىستى. ال الماتى قالاسىنان كەلگەن ايدانا سىدىقوۆا ترەنينگتە كاسىبي ءبىلىم الىپ جاتقانىن جەتكىزدى. «ترانسفورماتسيالىق كوشباسشىلىق, جوبالىق باسقارۋ, ەموتسيونالدى ينتەللەكت سەكىلدى داعدىلاردى ۇيرەنىپ جاتىرمىز. بولاشاقتا باسقارۋ جۇيەسىندە وسى بىلىكتىلىگىمىزدى قولدانا وتىرىپ, ءتيىمدى باسقارۋدى جۇزەگە اسىرامىز دەگەن جوسپارىم بار. جالپى قازىر ساياساتتا ايەلدەردىڭ ۇلەسى وتە از, ال ولاردىڭ ساياسي ورتاعا ارالاسۋى ەلىمىزدىڭ دامۋىنا زور ۇلەسىن قوسادى دەگەن سەنىمدەمىن», دەدى قاتىسۋشى.
Tomiris – پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسياسىنىڭ جانە كونراد ادەناۋەر قورىنىڭ, اقپارات جانە قوعامدىق دامۋ مينيسترلىگى مەن Amanat پارتياسىنىڭ قولداۋىمەن جۇزەگە اسىرىلىپ جاتقان ورتاق جوبا.
وقۋ باعدارلاماسىندا ءبىلىم الۋشىلار كوشباسشىلىق جانە ساياسي پروتسەستەر تۇسىنىكتەرىنەن باستاپ, كوممۋنيكاتسيا مەن جوبالاردى باسقارۋ تاقىرىپتارىن زەرتتەيدى. سونداي-اق باعدارلاما شەڭبەرىندە حدس (گەرمانيا) پارتياسىنىڭ ايەلدەر قاناتى دەلەگاتسياسىمەن كەزدەسۋ جوسپارلانىپ وتىر.
