ۇمىتكەرلەردەن ۇسىنىستار قابىلداۋ باستالدى

مەملەكەت باسشىسىنىڭ 2014 جىلعى باق سالاسىنداعى سىيلىقتارى مەن گرانتتارىن, سونداي-اق العىسىن الۋعا ۇمىتكەرلەردەن ۇسىنىستار قابىلداۋ باستالدى. بۇل تۋرالى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى حابارلادى. سىيلىقتار مەن گرانتتار الۋعا ۇمىتكەرلەردى بۇقارالىق اقپارات قۇرالدارى, شىعارماشىلىق وداقتار, قوعامدىق بىرلەستىكتەر, مەملەكەتتىك ورگاندار ۇسىنا الادى. العىس جاريالاۋعا شىعارماشىلىق ۇجىمداردى شىعارماشىلىق وداقتار, قوعامدىق بىرلەستىكتەر, مەملەكەتتىك ورگاندار ۇسىنا الادى. ءاربىر بۇقارالىق اقپارات قۇرالى, شىعارماشىلىق وداق, قوعامدىق بىرلەستىك, مەملەكەتتىك ورگان سىيلىقتار مەن گرانتتار الۋعا ەكى ۇمىتكەر عانا ۇسىنۋعا قۇقىلى. سىيلىقتار, گرانتتار الۋعا ۇمىتكەرلەردىڭ جانە العىس جاريالاۋعا شىعارماشىلىق ۇجىمداردىڭ ءوزىن-ءوزى ۇسىنۋىنا جول بەرىلمەيدى. سىيلىقتار نەمەسە گرانتتار الۋعا بۇقارالىق اقپارات قۇرالىنىڭ, شىعارماشىلىق وداقتىڭ, قوعامدىق بىرلەستىكتىڭ, مەملەكەتتىك ورگاننىڭ رەسمي بلانكىسىنە جازىلعان, ءبىرىنشى باسشى نەمەسە ونىڭ ورنىنداعى ادام قول قويعان (ا4 فورماتتاعى كولەمى 2 پاراقتان اسپايتىن) ۇسىنىس جولدانادى. وعان مىناداي قۇجاتتار قوسا ۇسىنىلادى: - سىيلىقتار نەمەسە گرانتتار الۋعا ۇسىنىلعان ۇمىتكەردىڭ اتى, اكەسىنىڭ اتى, تەگى جانە شىعارماشىلىق بۇركەنشىك ەسىمى (ەگەر بولسا), سونداي-اق اتقاراتىن لاۋازىمى كورسەتىلگەن نەگىزگى جۇمىس ورنىنان انىقتاما; - سىيلىقتار نەمەسە گرانتتار الۋعا ۇسىنىلعان ۇمىتكەردىڭ شىعارماشىلىق قىزمەتىنىڭ قىسقاشا سيپاتتاماسى; - جاريالانىمدار ماتىندەرى نەمەسە اۋديو جانە (نەمەسە) بەينەماتەريالدار; - نەگىزگى جاريالانىمدارىنىڭ ءتىزىمى جانە (نەمەسە) ولاردىڭ كوشىرمەلەرى. العىس جاريالاۋعا شىعارماشىلىق وداقتىڭ, قوعامدىق بىرلەستىكتىڭ, مەملەكەتتىك ورگاننىڭ رەسمي بلانكىسىنە جازىلعان ءبىرىنشى باسشى نەمەسە ونىڭ ورنىنداعى ادام قول قويعان بۇقارالىق اقپارات قۇرالىنىڭ قىزمەتى تۋرالى (ا4 فورماتتاعى كولەمى 2 پاراقتان اسپايتىن) ۇسىنىس ۇسىنىلادى; كونكۋرسقا ءمان-ماڭىزى جوعارى نەگىزگى جاريالانىمدار نەمەسە اۋديو جانە (نەمەسە) بەينەماتەريالدار ۇسىنىلادى. قاراۋعا 2013 جىلعى 1 ماۋسىم مەن 2014 جىلعى 1 ماۋسىم ارالىعىندا جاريالانعان جانە (نەمەسە) ەفيرگە شىققان ماتەريالدار قابىلدانادى. سىيلىقتار, گرانتتار الۋعا جانە العىس جاريالاۋعا ۇسىنىلعان ماتەريالدار مەن قۇجاتتار قايتارىلمايدى. كىتاپتار باق سالاسىنداعى ناگرادالار الۋعا ۇسىنىلعان ماتەريال رەتىندە قاراستىرىلمايدى. مەرزىمدى باسىلىمداردا جارىق كورگەن ماقالالار توپتاماسىن ۇسىنۋعا بولادى. مەملەكەت باسشىسىنىڭ سىيلىقتارىن, گرانتتارىن الۋعا جانە العىسىن جاريالاۋعا ۇسىنىستاردى قوعامدىق كوميسسيانىڭ توراعاسى – قازاقستان رەسپۋبليكاسىنىڭ مەملەكەتتىك حاتشىسى ءا.ر.جاقسىبەكوۆتىڭ اتىنا مىنا مەكەنجاي بويىنشا: 010000, استانا, سول جاعالاۋ, «اقوردا» رەزيدەنتسياسىنا 2014 جىلعى 16 ماۋسىمعا دەيىن جولداۋ قاجەت. egemen.kz دەرەككوز: قازاقستان رەسپۋبليكاسى پرەزيدەنتىنىڭ ءباسپاسوز قىزمەتى. فوتو: google.com