قىتاي قازاقستاننىڭ ەكسپو-2017 كورمەسىن وتكىزۋىن قولدايدى

استانا. 14 مامىر. ۇكىمەت باسشىسىنىڭ ءبىرىنشى ورىنباسارى باقىتجان ساعىنتاەۆ قازاقستان مەن قىتاي بالامالى ەنەرگيا كوزى بويىنشا ءوزارا ىنتىماقتاستىق ماسەلەسىن تالقىلايدى دەپ مالىمدەدى. بۇل تۋرالى ortcom.kz حابارلادى. ورتالىق كوممۋنيكاتسيالار قىزمەتىندە وتكەن بريفينگتە باقىتجان ساعىنتاەۆ قىتاي حالىق رەسپۋبليكاسى  قازاقستاننىڭ ەكسپو-2017 وتكىزۋىنە قولداۋ بىلدىرەتىنىن جەتكىزدى. سونىمەن قاتار, ول ەكى ەلدىڭ ەكونوميكالىق بايلانىستارىن دامىتۋ تۇرعىسىندا اڭگىمە وربىتە كەلە, مۇناي-گاز سالاسىنداعى بىرلەسە اتقارىلىپ جاتقان جۇمىستاردىڭ جۇيەلى تۇردە جۇرگىزىلىپ وتىرعانىنا توقتالدى. ۇكىمەت باسشىسىنىڭ ءبىرىنشى ورىنباسارى: «ەدەۋىر كولەمدەگى بازا قۇرىلدى. «بەينەۋ-بوزوي-شىمكەنت» گاز قۇبىرىنىڭ قۇرىلىسى تۋرالى كەلىسىم جاسالدى, جوبانىڭ ەكىنشى كەزەڭىن قارجىلاندىرۋ ماسەلەسى شەشىلدى, سونداي-اق, «قازاقستان-قىتاي» مۇناي قۇبىرىنىڭ ەكىنشى كەزەگىنىڭ قۇرىلىسى باستالدى», – دەدى. باقىتجان ساعىنتاەۆتىڭ كەلتىرگەن دەرەكتەرىنە قاراعاندا,  وسى جىلدىڭ باسىنا قاراي ەلىمىزگە قىتاي تاراپىنان قۇيىلعان ينۆەستيتسيا كولەمى 20 ملرد. دوللاردان اسقان. ونىڭ 5,68 ملرد. دوللارى تىكەلەي ينۆەستيتسيا. 2013 جىلى ەكىجاقتى ساۋدا كولەمى 22,5 ملرد. دوللارعا جەتكەن. مۇنىڭ 14,3 ملرد. دوللارى ەكسپورت بولسا, 8,1 ملرد. دوللارى يمپورت. جولدىباي بازار. دەرەككوز: ortcom.kz. فوتو: ortcom.kz.