ديماش اتانىڭ كىسىلىك كەلبەتى, دانالىقپەن بىتە قايناسقان قايراتكەرلىك قالپى, الىستان ارنا تارتقان اقىل-پاراساتى, بيىك ءبىلىم-بىلىگى ءوز تۇستاستارىن قايران قالدىرادى ەكەن. اسىرەسە اسا قاراپايىمدىلىعىن, وتە كىشىپەيىلدىلىگىن, ەلمەن ەتەنە, ەمەن-جارقىن سويلەسە بىلەتىندىگىن كوزىمەن كورگەندەر جىر قىلىپ ايتادى. بۇل تاماشا قاسيەتى تالاي جازۋشى, جۋرناليستەردىڭ قالامى ارقىلى دا قالىڭ جۇرتقا كەڭىنەن تارالدى.
1975 جىلى جامبىل وبلىسى, مويىنقۇم اۋداندىق پارتيا كوميتەتى عيماراتىنىڭ الدىندا تۇسىرىلگەن, جەكە مۇراعاتىمىزدا ساقتالعان مىنا سۋرەتتە دە كەمەل ويلى, كەڭ جۇرەكتى اسىل ازاماتتىڭ حالىقپەن جۇزدەسۋىنىڭ ءبىرى بەينەلەنگەن.
...ۇلكەن كىسىنى قۋانا قارسى العان قاراپايىم اۋىل قاريالارى, اق جاۋلىقتى انالار, جالىندى جاستار, جىگەرلى جىگىتتەر, قىرمىزى قىزدار, بالاۋسا بالالار... ءبارى دە د.قوناەۆقا اق تىلەگىن ارناعىسى كەلەدى, بارلىعى دا ونىڭ جىلى لەبىزىن ەستىگىسى كەلەدى... ءتىپتى اينالاسىنداعىلاردى ۇرەيلەندىرە ۇركىتىپ, جانىنا جاقىنداتپايتىن وققاعارلارى جوق ەكەندىگىن ايتساڭىزشى!..
ديمەكەڭنىڭ ارتقى جاعىندا ەكىنشى تۇرعان جامبىل وبلىستىق پارتيا كوميتەتىنىڭ ءبىرىنشى حاتشىسى, ءوڭىردىڭ ءوسىپ-وركەندەۋىنە ۇلكەن ۇلەس قوسقان مارقۇم حاسەن بەكتۇرعانوۆ. سۋرەتتىڭ اۆتورى, جاڭىلماساق, قازتاگ-تىڭ سول كەزدەگى ءفوتوتىلشىسى گەننادي كوشكينتسەۆ.
ءيا, د.قوناەۆ وسى جىلى الىستاعى اۋدان – مويىنقۇمعا بارعان بولاتىن. سول ساپارىندا رەسپۋبليكا باسشىسى ايماقتىڭ جاي-كۇيىمەن جان-جاقتى تانىسقان, اۋدان ورتالىعىنا تاياۋ جەردەگى فۋرمانوۆ اتىنداعى, سونداي-اق «تالدىوزەك» سوۆحوزىنىڭ مال قىستاۋلارىن ارالاپ, مالشىلاردىڭ ەڭبەك جانە تۇرمىستىق جاعدايىنا ءجىتى نازار اۋدارعان, سوعىستا قازا تاپقان بوزداقتارعا ارنالعان ەسكەرتكىش-وبەليسكىگە گۇل شوقتارىن قويعان.
سونىمەن قاتار مالشىلاردىڭ مارشالى, قوس جۇلدىزدى جازىلبەك قۋانىشباەۆپەن, سوتسياليستىك ەڭبەك ەرلەرى ءدىلداش يتباسوۆامەن, شومان شارىپباەۆپەن جانە 1917 جىلدان پارتيا مۇشەسى, «لاتىش اتقىشى», كەزىندە جازىقسىز قارالانىپ وسى قۇمدى ولكەگە جەر اۋدارىلىپ كەلگەن ۆيليس مارتىنوۆيچ كراستينمەن اڭگىمەلەسكەن.
ديماش اتامىز, مۇنىمەن بىرگە, اۋداندىق مۋزەيدى, كاسىپتىك-تەحنيكالىق ۋچيليششەنى, ساكەن سەيفۋللين اتىنداعى كينوتەاتردى اسىقپاي ارالاپ كورىپ, حالىقپەن جۇزدەسكەن.
بۇل, شىن مانىندە, مويىنقۇمدىقتار ءۇشىن ۇمىتىلمايتىن وقيعا بولىپ ەدى.
بەرىكباي قادىقوۆ,
جۋرناليست
الماتى وبلىسى,
قاراساي اۋدانى
