ەلىمىزدە 30-عا جۋىق اگروكاسىپورىنعا ارزانداتىلعان نەسيە بەرىلەدى

استانا. 14 مامىر. مەملەكەت ەسەبىنەن نەسيەلەردى ارزانداتۋعا بايلانىستى 28 اگروكاسىپورىننىڭ ءوتىنىمى ماقۇلداندى. بۇل تۋرالى primeminister.kz حابارلادى. «قازاگروماركەتينگ» اكتسيونەرلىك قوعامى اگروونەركاسىپ كەشەنى سۋبەكتىلەرىن قارجىلاي قولداۋ جونىندەگى كوميسسيانىڭ وتىرىسىن وتكىزدى. باسقوسۋدا كوميسسيا بىرقاتار قارجى ينستيتۋتتارى ۇسىنعان 31 ءوتىنىمدى قاراستىردى. بۇلاردىڭ اراسىندا «قازاگرو» حولدينگى قۇرامىنداعى ەنشىلەس كومپانيالار مەن ەكىنشى دەڭگەيلى بانكتەر بار. بارلىق ۇسىنىلعان وتىنىمدەر بويىنشا اگروكاسىپورىنداردىڭ قارىزى 61,9 ملرد تەڭگەنى قۇرادى.  كوميسسيا وتىرىسىنىڭ ناتيجەسىندە 28 ءوتىنىم ماقۇلداندى. ولاردىڭ ورتاق قارىزى 56,7 ملرد. تەڭگەگە جەتكەن. ال, «قازاگرو» تاراپىنان بولىنەتىن قاراجى 56,1 ملرد. تەڭگەنى قۇرايتىن كورىنەدى. جيىندا بەلگىلى بولعانداي, قارىز الۋشىلار نەگىزىنەن سولتۇستىك قازاقستان, اقمولا, قوستاناي, اقتوبە, ماڭعىستاۋ وبلىستارىنىڭ كاسىپورىندارى. 2013 جىلى قارىزى 17,7 ملرد. تەڭگەنى قۇرايتىن 27 ءوتىنىم قاناعاتتاندىرىلىپتى. جولدىباي بازار. دەرەككوز: primeminister.kz. فوتو: altaynews.kz.