ورتالىق ستاديوندا «قايرات» «توبىلدى» قابىلدادى. ءبىرىنشى تايمدا يگور سەرگەەۆ پەن ايبار جاقسىلىقوۆ ەكى گول سوعىپ, قوستانايلىقتاردى العا شىعاردى. ۇزىلىستەن كەيىن ارتۋر شۋشەناچەۆ ەسەپ ايىرماشىلىعىن قىسقارتقان كەزدە الماتىلىق جانكۇيەرلەر, ەڭ بولماعاندا, تەڭ ناتيجەگە قول جەتكىزەمىز دەپ ويلادى. بىراق سەرگەەەۆ تاعى ءبىر رەت مەرگەندىك تانىتتى. باسەكەنىڭ سوڭىندا گۇلجىگىت الىقۇلوۆ 11 مەترلىك نۇكتەدەن نىسانانى ءدال كوزدەدى. ەسەپ – 2:3. كوش باسىنداعى «اقتوبە» وسى تۋردا كوش سوڭىنداعى «قىزىلجاردى» ايقىن باسىمدىقپەن ۇتاتىنىنا ەشكىمنىڭ كۇمانى بولعان جوق. بىراق قوناقتار وڭايلىقپەن الدىرمادى. ولار كەزدەسۋدىڭ سوڭعى مينۋتتارىنا دەيىن ساۋاتتى قورعاندى. دەسەك تە مىقتىنىڭ اتى مىقتى عوي, 89 مينۋتتا جەرار گوۋ جەڭىس دوبىن سوقتى – 1:0. «استانا» ورالدىڭ «اقجايىعىنىڭ» قاقپاسىنا جاۋاپسىز ءتورت گول سالدى. ونىڭ اۆتورلارى – دەنيس پولياكوۆ, پەدرو ەۋجەنيو (ەكى رەت), مارين توماسوۆ. ءبىر عاجابى, سوڭعى ءۇش گولدى ەلوردالىق فۋتبولشىلار سوڭعى التى مينۋتتا سوقتى.
جارىس كەستەسىندە «اقتوبە» ءبىرىنشى ورىندا كەلەدى. ولار 18 ويىننان كەيىن 38 ۇپاي جيدى. ەكىنشى ورىنداعى «استانانىڭ» ودان ءتورت ۇپايى كەم. 32 ۇپايدى قورجىنعا سالعان «توبىل» ءۇشىنشى ساتىعا جايعاستى. ءتورتىنشى جانە بەسىنشى ورىنداردى «شاحتەر» مەن «قايرات» ءوزارا بولىسۋدە. ەكەۋىندە دە 27 ۇپايدان بار.
