«اققىز» دەگەن اتپەن تانىمال مۇگىلسىن احمەتقىزى قازاقتىڭ اتى اڭىزعا اينالعان دومبىراشىسى ءارى ءانشىسى. ونىڭ «قوسباسار», «سارجايلاۋ», «بەستورە» سىندى تاتتىمبەت كۇيلەرىن ورىنداۋى ەرەكشە. مۇگىلسىن احمەتقىزى «قايران ەلىم», «اققىز», «قوسباسار» جانە باسقا دا تاماشا كۇيلەردى جالعاستىرۋشى رەتىندە قازاقستان كومپوزيتورلارىنىڭ شىعارماشىلىعىنا وراسان ۇلەس قوستى. ونىڭ شاكىرتتەرىنىڭ ءبىرى ماعاۋيا ءحامزيندى دە ەل ۇلكەن تالانت دەپ تانيدى.
كەش ساحناسىندا اققىز بەن ماعاۋيا ءحامزيننىڭ – «قوسباسار», «جەتىم قىز», «قايران ەلىم», «عارىشكەرلەر ءۆالسى», «بەلگىسىز سولدات», «جايلاۋ» سىندى شىعارمالارى ورىندالدى. ع.جۇبانوۆا اتىنداعى مەملەكەتتىك ىشەكتى اسپاپتار كۆارتەتى قازاقستاننىڭ ەڭبەك سىڭىرگەن قايراتكەرى ەرنار مىڭتاەۆتىڭ جەتەكشىلىگىمەن ونەر كورسەتتى. فيلارمونيا كۇيشىلەرى ارمان جايىموۆ پەن قۋات شىلدەباەۆتىڭ زاماناۋي ينتەرپرەتاتسياسىندا تاتتىمبەت پەن تولەگەن مومبەكوۆتىڭ كۇيلەرىن ورىندادى.
«سارىارقا» ءانسامبلىنىڭ كوركەمدىك جەتەكشىسى توعجان جاحين سازدى كەشتى تارقاتا كەلە ءداستۇرلى مۋزىكانىڭ تاريحىنا توقتالدى.
«ەكى بيىك تۇلعانى ءبىر كونتسەرتتە بىرىكتىرگەنىمىز بەكەر ەمەس. ويتكەنى اققىز ماعاۋيا ءحامزيننىڭ تالىمگەرى. ەكەۋى دە ارقا ورىنداۋشىلىق دومبىرا مەكتەبىنىڭ مۇراگەرلەرى, شەرتپە ءداستۇرىن جالعاستىرۋشىلار. ەكى كۇيشى دە رەپەرتۋارىن وزدەرى شىعارعان كۇيلەرمەن تولتىردى. كونتسەرتتە «سارىارقا» ءانسامبلىنىڭ ورىنداۋىندا اققىز بەن ماعاۋيا ءحامزيننىڭ كۇيلەرى مەن شەرتپە ءداستۇرىنىڭ جارقىن سوليستەرى – جانعالي جۇزباەۆ, قايرات ايتباەۆ, مارات نوكەەۆ, ەربولات ساپۋانوۆ, امانگەلدى ءسادۋوۆ, رۇستەم نۇركەنوۆ ونەر كورسەتتى. سونداي-اق كەشتە ارنايى شاقىرىلعان قوناقتار – اققىزدىڭ شاكىرتى قالكەن قاسىموۆ پەن كۇيشى, اققىز كۇيلەرىن ورىنداۋشى بولات تاكىشەۆ بولدى», دەيدى ول. سونداي-اق ونىڭ ايتۋىنشا, حح عاسىر قازاق كۇيلەرى ءۇشىن قيىن كەزەڭ بولدى. ارقانىڭ كوپتەگەن ونەرپازى قۋعىن-سۇرگىن, اشارشىلىق, سوعىس ورتىندە قىرىلدى.
«سەمبەك, تاتتىمبەت سەكىلدى كۇيشىلەر كەتىپ قالدى. سوندىقتان اققىز ارقا كۇيلەرىنىڭ مۇراگەرى بولىپ قالادى. دينا شەشەمىز قۇرمانعازىنىڭ كۇيلەرىن جەتكىزگەن بولسا, اققىز تاتتىمبەتتىڭ مەكتەبىن جەتكىزدى. ال ماعاۋيا حامزينمەن بىرىكتىرگەن سەبەبىمىز, ماعاۋيا اققىزدىڭ شاكىرتى, سودان كەيىن ول ءوزىنىڭ ورىنداۋشىلىق ءستيلىن قالىپتاستىرۋشى. بۇرىنعى كۇيشىلەر نوتامەن ەمەس, قۇيما قۇلاق ارقىلى ۇيرەنگەن ەدى. سول كەزدە قۇيما قۇلاق كۇي ويناعان كەزدە, 100 % ورىنداۋ مۇمكىن ەمەس, 70% ورىنداي الادى. سوندىقتان ءوزىنىڭ تابيعاتىمەن, ساۋساقتارىنىڭ ەرەكشەلىگىمەن وزىندىك ءبىر ستيل قالىپتاستىرادى. تاريحتان بىلەمىز, قۇرمانعازىنىڭ ءستيلىن دينا جالعاستىرسا, دينانىڭ ءوزىنىڭ بولەك مەكتەبى بار. سول سەكىلدى, اققىز دا ءوز مەكتەبىن قالىپتاستىردى», دەپ اتاپ ءوتتى ت.جاحين.
