پارتيا مۇشەلەرى اۋرۋحانادا جاتقان امانقاراعاي اۋىلىنىڭ تۇرعىنى تەمىر ءجۇسىپوۆتىڭ جاعدايىن سۇراپ باردى. ءورت كەزىندە اۋىلداسىن ەۆاكۋاتسيالاۋعا كومەكتەسىپ جۇرگەندە ونىڭ ەكى قولىن كۇيىك شالعان. «بۇل – ناعىز ەرلىك. ول ءوز دەنساۋلىعىنا قاۋىپ ءتونىپ تۇرعانىنا قاراماستان, جاقىنىنا كومەكتەستى. تەزىرەك ساۋىعىپ كەتۋىن تىلەيمىز», دەدى امانجول ءالتاي.
بۇدان سوڭ, پارتيالىقتار لەسنوە جانە وزەرنوە اۋىلدارىنىڭ تۇرعىندارىمەن جۇزدەسىپ, ازىق-ت ۇلىك پەن ءبىرىنشى كەزەكتە قاجەتتى تاۋارلاردى تاپسىردى.
لەسنوە اۋىلىنىڭ تۇرعىنى فارۋاز ءابدىراحمانوۆ ورتتەن زارداپ شەككەن جانداردىڭ بارلىعى وتانداستارىمىزدىڭ, مەملەكەتتىڭ قولداۋىن سەزىنەتىنىن اتاپ ءوتتى. «پرەزيدەنت باسپاناسىنان ايىرىلعان ادامداردىڭ بارلىعىنا جاڭا ءۇي سالىنىپ بەرەدى دەپ سەندىردى. ەڭ باستىسى – وسى. سونداي-اق جينالعان گۋمانيتارلىق كومەك ءۇشىن حالىققا ايرىقشا العىس ايتامىن», دەدى ول.
ءورت سوندىرۋشىلەرمەن كەزدەسۋدە وسى سالاداعى قىزمەتكەرلەردىڭ ماتەريالدىق-تەحنيكالىق بازاسىن, ەڭبەك جاعدايىن جانە الەۋمەتتىك قامتاماسىز ەتىلۋىن جاقسارتۋ سىندى وزەكتى ماسەلەلەر تالقىلاندى.
«اپاتتىڭ العاشقى ساعاتىنان باستاپ تىنىمسىز ەڭبەك ەتكەن ءورت سوندىرۋشىلەرگە, قۇتقارۋشىلارعا, اسكەرگە, پوليتسياعا, دارىگەرلەرگە, ەرىكتىلەرگە بارلىق ازاماتتاردىڭ اتىنان العىس بىلدىرەمىز», دەپ اتاپ ءوتتى پارتيا حاتشىسى رينات كەرتاەۆ.
پارتيانىڭ ءباسپاسوز قىزمەتىنىڭ مالىمەتىنشە, اماناتتىقتار زارداپ شەككەندەرگە 807 توننا گۋمانتيارلىق كومەك جينادى. «جاستار رۋحى» جاستار قاناتىنىڭ 300 ۆولونتەرى توتەنشە جاعداي ورنىندا جۇمىس ىستەپ جاتىر. سونداي-اق 1200-دەن استام ەرىكتى گۋمانيتارلىق كومەك جيناۋ پۋنكتتەرىنە جۇمىلدىرىلدى.
