سەگىز اي بويى جالعاسقان «امانات» كوميسسياسى جۇمىسىنىڭ قورىتىندىسى رەتىندە پرەزيدەنتكە قاڭتار وقيعاسىنىڭ قاتىسۋشىلارىنا ءبىر رەتتىك راقىمشىلىق جاساۋ جونىندە ۇسىنىس بىلدىرگەن ەدىك. ادامداردىڭ تاعدىرىنا, جاستاردىڭ ومىرىنە الاڭداپ, اربىرەۋىنىڭ جاعدايىنا ءۇڭىلىپ, مەملەكەت باسشىسىنا امنيستيا جاساۋ جونىندە تىلەك ايتتىق.
ۇسىنىس قولداۋ تاپتى! كىشكەنتاي عانا ۇيىمنىڭ جۇمىسى نازارعا الىنىپ, ۇسىنىسىمىز ەڭ جوعارعى دەڭگەيدە قولداۋ تاۋىپ, قاڭتار وقيعالارىنا قاتىسىپ, قاپاسقا قامالعان ازاماتتارىمىزعا قاتىستى ءبىر رەتتىك راقىمشىلىق جاساۋ جايىندا ءتيىستى شەشىم قابىلدانعانى پرەزيدەنت اۋزىمەن پارلامەنت قابىرعاسىندا قالىڭ ەلگە جاريالاندى. مىڭداعان جانعا قۋانىش سىيلاعان بۇل ءسۇيىنشى حاباردى ءبىز ادىلەتتىڭ سالتانات قۇرۋى, گۋمانيزم اكتىسى دەپ قابىلدايمىز. مەملەكەتىمىزدىڭ ىرگەتاسىن نىعايتۋعا باعىتتالعان قادام دەسەك, ارتىق ايتقانىمىز ەمەس.
ارينە, جاستار ءبىر رەت جازا باستى ەكەن دەپ ۇزاق جىلعا سوتتاپ جىبەرۋ دۇرىس بولماس ەدى. ول ازاماتتاردىڭ بالا-شاعاسى بار, تۋىستارى بار, جاعىمسىز ءىس-ارەكەت ولاردىڭ مەملەكەتكە دەگەن سەنىمىنە سەلكەۋ ءتۇسىرىپ, تەرىس اينالدىرار ەدى. مەملەكەتتىڭ باستى قۇندىلىعى – ادام بولسا, بۇل شەشىم ماڭىزدى شەشىم – ادامنىڭ تاعدىرىن ويلاۋعا دەگەن تالپىنىسىنىڭ كورىنىسى. بۇل – «ادىلەتتى قازاقستان» تۇجىرىمداماسىنا سايكەس كەلەتىن ۇيعارىم.
مەملەكەت باسشىسىنىڭ راقىمشىلىق جاريالاۋ تۋرالى ۇسىنىسىن «امانات» كوميسسياسى جۇمىسىنىڭ شەشۋشى قورىتىندىسى دەپ قابىلدادىق. الايدا ءبىزدىڭ جۇمىسىمىز مۇنىمەن اياقتالمايدى, الداعى ۋاقىتتا كوميسسيامىز راقىمشىلىق تۋرالى زاڭنىڭ جاساقتالۋىنا, قولدانىلۋىنا قاتىستى زاڭ ورىندارىمەن بىرگە جۇمىس ىستەيدى. ءبىز ءوز اتىمىزدان جانە قاڭتار وقيعالارىنا قاتىستى قاماۋدا بولعان ازاماتتار مەن ولاردىڭ تۋما-تۋىستارىنىڭ اتىنان مەملەكەت بولاشاعىن ەسكەرىپ, ادامدار تاعدىرىنا قاتىستى وسىنداي ءادىل شەشىم قابىلداعانى ءۇشىن پرەزيدەنت قاسىم-جومارت توقاەۆقا ۇلكەن العىس ايتامىز!
ۋايس ەرسايىن ۇلى,
«امانات» تاۋەلسىز كوميسسياسىنىڭ مۇشەسى
