بۇعان دەيىن «تەمىر اتىمەن» تالاي بەلەستى باعىندىرعان ەرنات مەلس ۇلى وسى جولعى ۆەلوشەرۋىن احمەت اتامىز تۋعان توپىراقتان باستاپ, ازەربايجان مەن گرۋزيانى باسىپ, ساپارىن تۇركيانىڭ ىستانبۇل قالاسىنداعى اتاقتى تاەكۆوندوشى مۇستافا وزتۇرىكتىڭ زيراتىنا ءتاۋ ەتۋىمەن تۇيىندەمەك.
«ۆەلوشەرۋگە جالعىز شىعىپ بارامىن. 55 كۇندە 5555 شاقىرىمدى ەڭسەرسەم دەپ ويلايمىن. بۇل ساپارىمدا ۇلت ۇستازىن ۇلىقتاۋمەن بىرگە ەلىمىزدىڭ ازەربايجان, گرۋزيا, تۇركيامەن ارادا ديپلوماتيالىق قارىم-قاتىناستىڭ ورناعانىنا 30 جىل تولۋىن ناسيحاتتاپ, ءوز ۇلەسىمدى قوسسام دەيمىن. سونداي-اق باكۋ, تبيليسي, انكارا, ىستانبۇلداعى اباي اتامىز اتىنداعى كوشەلەردى كوزبەن كورىپ, سونداعى اقىن ەسكەرتكىشىنە تاعزىم ەتۋدى جوسپارلاپ وتىرمىن», دەدى ۆەلوشاباندوز.
ايتا كەتەيىك, بيىلعى جىل باسىندا ەرنات مەلس ۇلى ۇلت ۇستازىنىڭ ايتۋلى مەرەيتويىنا ارناپ «150 جىلدىققا – 150 شاقىرىم» اتتى قىسقى ۆەلوماروفون وتكىزىپ, ەلورداداعى ترياتلون پاركىندە ەلۋ اينالىم جاساپ, 150 شاقىرىمدى ەڭسەرگەن ەدى. ول ەلىمىزدەگى العاشقى قىسقى ماروفون رەتىندە قازاقستاننىڭ رەكوردتار كىتابىنا تىركەلدى.
