اقش تەلەارنالارى حابارلاعانداي, ورمانعا جاقىن اۋىل تۇرعىندارى بىردەن قاۋىپسىز جەرگە كوشىرىلگەن. سيسكيۋ اۋدانىنىڭ شتات گۋبەرناتورى گەۆين نيۋوم اۋىلدىق وكرۋگتە توتەنشە جاعداي جاريالاپ, ءورت سالدارىنان بىرنەشە تۇرعىننىڭ زارداپ شەككەنىن مالىمدەدى. «ولار قازىر جاقىن ماڭداعى اۋرۋحانادا ەم-دوم قابىلداپ جاتىر», دەدى شتات باسشىسى. ءتىلسىز جاۋ 4 مىڭ گەكتارعا جۋىق اۋماقتى قىزىل جالىنعا وراعان. سەنبى كۇنى ءورت 20 پايىزعا ەۆاكۋاتسيالانعان. قاۋىپسىزدىك قىزمەتكەرلەرى قاجەتتى ءىس-شارالار جالعاسىپ جاتقانىن ايتادى.
Euronews تەلەارناسىنىڭ مالىمەتىنشە, بيىل ەۋرووداق ەلدەرىندەگى ورمان ورتتەرى رەكوردتىق كورسەتكىشكە جەتكەن – 700 مىڭ گەكتار اۋماق. ەۋروپالىق ورمان ءورتىنىڭ اقپاراتتىق جۇيەسىنىڭ (EFFIS) دەرەكتەرى بويىنشا يسپانيا ورمان ورتىنەن ەڭ قاتتى زارداپ شەككەن, ەلدىڭ 283 000 گەكتاردان استام جەرى ورتەنىپ كەتكەن. ودان كەيىن رۋمىنيا (150 735), پورتۋگاليا (86 631), فرانتسيا (62 102) جانە يتاليا (42 835) تۇر.
ماماندار سوڭعى جىلدارى الەمدەگى ءورت سانى كۇرت وسكەنىن ايتادى. ماسەلەن, تامىز ايىنىڭ ورتاسىندا دۇنيە جۇزىندە 2 300-دەن استام ءورت تىركەلگەن, بۇل 2006-2021 جىلداردا تىركەلگەن 1 349 ءورت وقيعاسىنىڭ ورتاشا كورسەتكىشىنەن ءبىرشاما جوعارى.
«اۋا تەمپەراتۋراسىنىڭ جوعارىلاۋى, كليماتتىڭ وزگەرۋى, قۇرعاقشىلىق جايلاپ, جاۋىن-شاشىننىڭ از ءتۇسۋى ورمان ورتتەرىنىڭ باستى سەبەبى بولىپ تۇر», دەيدى ماماندار. ەۋروپالىق كوميسسيانىڭ بىرلەسكەن زەرتتەۋ ورتالىعى بۇل سوڭعى 500 جىلداعى ءورتتىڭ ەڭ جوعارعى كورسەتكىشى ەكەنىن مالىمدەدى.
