– شىركىن-اي, ءسىز تۋرالى ءدال ءوز كۇيىڭىزدەي مولدىرەتىپ تۇرىپ جازعىم كەلەدى, بىراق جازا المايمىن, – دەپ ەدىم مەن ابەكەڭە, ءابدىمومىن جەلدىباەۆقا.
– نەگە؟ – دەپ شالت سۇراعان كۇيشى سوندا كوبىنە اقىندارعا ءتان ۇشقىرلىقپەن.
– ويتكەنى دەڭگەيىم جەتپەيدى. كۇيدىڭ تابيعاتىن تەرەڭ تۇسىنبەيمىن.
– ونىڭ دۇرىس ءىنىم. كۇيدى اشا الماساڭ وقىرمانىڭا دا, كۇيشىگە دە وبال, – دەپ ەندى جاۋابىن سالماقپەن بەرگەن لەزدە ويلى كەيپىنە
اۋىسا قالعان ابەكەڭ.
اڭگىمە بۇدان 48-49 جىل بۇرىن بولعان ەدى. ابەكەڭ ءوزىنىڭ ەسىمىن الەمگە جايعان «ەركە سىلقىمىن» وبلىستىق دراما تەاترىنىڭ ساحناسىندا تۇڭعىش رەت ورىنداپ, ول كىسىنى كەۋ-كەۋلەگەن جازۋشى-جۋرناليستەر ەندى «جامبىل» قوناقۇيىندەگى بولمەسىنە كەلىپ كىرگەنبىز. ورىندىققا ەلدىڭ الدىمەن جايعاسقان جازۋشى ءالديحان قالدىباەۆ اعامىز:
– ىلعي ايتىپ ءجۇرمىن عوي مەن سىزدەرگە, ءبىزدىڭ وبلىستا ءابدىمومىننان اساتىن كۇيشى جوق. ەندى كوزدەرىڭىز جەتكەن شىعار, – دەپ بارىمىزگە ماڭعازدانا قارادى. ماڭعازداناتىنىنداي دا, ماقتاناتىنىنداي دا ءجونى بار-دى. ويتكەنى ابەكەڭمەن ءبىر اۋىلدا تۋىپ-وسكەن, «التىندى شىققان جەردەن قاز» دەگەندەي شۋ اۋدانى جامبىل اتىنداعى بۇل اۋىل شىنىندا دا تالانتتىڭ كەنى ەكەنىن كۇنى بۇگىنگە دەيىن كورسەتىپ كەلەدى. اتالمىش ەكەۋىنەن بولەك جازۋشىلار قاراۋىلبەك قازيەۆ پەن مۇرات سىزدىق, بەلگىلى ديريجەر ۇيالباي نۇسىكوۆ, قازاقستاننىڭ ەڭبەك سىڭىرگەن قايراتكەرى, رەجيسسەر قادىر جەتپىسباەۆ تا وسى اۋىلدىڭ پەرزەنتتەرى. ال ءالديحاننىڭ وبلىستا ابدىمومىنعا جەتەتىن كۇيشى جوق دەپ كۇيگەلەكتەۋىنىڭ دە وزىندىك ءمانى بار-دى. بۇل ءوزى «ەل ءىشى – ونەر كەنىشى» ەكەنىنە شىن كوز جەتكىزگەن جىلدار بولدى. وبلىستىق «ەڭبەك تۋى» گازەتىندە ءالديحان وسىنداي ايدارمەن ءابدىمومىن تۋرالى ماقالا دا جازعان. ماقالاسىن وقىعانداردىڭ ىشىندە «جالعىز تالانت» وسى جىگىت قانا ما ەكەن. «كورەرمىز ءالى اۋسەلەسىن» دەگەندەر دە بولعان. ولاردىڭ سوزىندە دە ءبىر شىندىق بار-دى. تالاي تالانتتار تانىلىپ ۇلگەرگەن بۇل كەزدە. اسىرەسە وبلىس ورتالىعىنداعى ءتۇرلى وركەستر-انسامبلدەردە تارازدىق سادىحان اۋباكىروۆتىڭ كۇيلەرى كوپ ورىندالاتىن. مايدانگەر اعامىز تۋراش ابەزوۆ تە ارا-تۇرا ءوز كۇيلەرىمەن ءتانتى ەتىپ قوياتىن. ال تالاستىڭ تومەنگى بويىندا تۇراتىن بورانقۇل كۇيلەرى رەسپۋبليكالىق راديودان دا ورىندالىپ جۇرگەن-ءدى. سوندىقتان دا وبلىس ورتالىعىنان شالعايداعى شۋ ايماعىندا تۇراتىن قاتارداعى اۆتوكلۋب مەڭگەرۋشىسىنە وبلىس اۋديتورياسىن جاۋلاۋ وڭاي ەمەس-ءتى. دەسە دە بۇل جەردە ابەكەڭنىڭ ورىنداۋشىلىق شەبەرلىگى ايرىقشا ءرول اتقارادى دەپ ويلايمىن وسى كۇنى. قاناتىن قومداعان قارشىعاداي قاسى-كوزى كەرىلىپ, يىعى قوزعالاقتاپ بۇكىل بولمىسىمەن بەرىلە ورىندايتىن ول كۇيدى. اسىرەسە ساۋساعىن ايتىڭىز. ول ساۋساعىن قاققاندا دومبىرا ءۇنى ەرەكشە ءبىر سىرشىل, نازىك بولىپ ەستىلەتىن ماعان. اسىرەسە وسى جولى «ەركە سىلقىمدى» ورىنداعاندا ءتىپتى ءتانتتى ەتتى ءدۇيىم جۇرتتى. سوندىقتان دا ءوزى دە داۋلەسكەر كۇيشى, جازۋشى مەيىرحان قۋانىشباەۆ اعامىز كوپ سويلەمەيتىن ادەتىمەن ءىنىسىن كوپ ۋاقىتقا دەيىن بوساتپاي ءۇنسىز قۇشاقتاي بەرگەن-ءدى. بىراق اسەرشىل اقىن جاقسىلىق ساتىبەكوۆ كەلىپ جاقىن بارىپ «كەلشى ەركە سىلقىمىم مەنىڭ» دەپ قۇرداسىنىڭ بەتىنەن ەمىرەنە ءسۇيدى. ابەكەڭ سيقىم رۋىنان ەدى. ءتىلىنىڭ ۇشىنا كەلىپ قالعان سىلقىم مەن سيقىم دەگەن ۇيقاستى ىركىپ قالسا اقىن بولار ما؟ ايتىپ تا جىبەردى جاقاڭ. ء«پالى, سەن ءورىسىن تىم تارىلتىپ جىبەردىڭ عوي. ءابدىمومىن ءبىر سىلقىمنىڭ ەمەس, بۇكىل قازاق ەلىنىڭ ەركەسى بولادى ءالى», – دەپ بارىمىزدەن جاسى ۇلكەن اعامىز قازاق راديوسىنىڭ مەنشىكتى ءتىلشىسى جازۋشى كارىم باياليەۆ تا قۋانىشىن بىلدىرەدى ءداپ سول كەزدە.
ستالين ءداۋىرىنىڭ سالقىنىن ءوزى دە سەزىنگەن ساق كارەكەڭ جاقاڭنىڭ ءسوزىن زامانىنىڭ ساياساتىنا قارسى تۇرا الدىم دەسە دە, اۋزى دۋالى ەكەن, ءدال ايتىپتى. جىلدار ءوتتى... شىنىندا دا ءابدىمومىن ەلىنىڭ ەركەسىنە اينالدى. ءوزى ەركەلەمەسە دە كۇيى ەركەلەپ تۇر قازاققا...
ارينە, مەن بۇگىندە ول كۇيلەردىڭ ەرەكشەلىكتەرىن سارالاپ بەرەتىن مۋزىكا ساراپشىسى ەمەسپىن. بىراق ۇزاق جىلدار ىشىندە ابەكەڭ شىعارماشىلىعى تۋرالى تىڭدارمان رەتىندە ءوز كوزقاراسىم قالىپتاستى. سودان سوڭ بۇل مەزگىل ىشىندە ول كىسى تۋرالى ەل پىكىرىن دە ازدى-كوپتى ەستىپ ءجۇردىم. سوندىقتان دا ايتىلعان جەرىندە قالىپ قالعان سول پىكىرلەردى بۇگىن جادىمنان جاڭعىرتىپ ەل نازارىنا ۇسىنسام دەگەن ويعا بەكىندىم. ويتكەنى شاعىن داستارقان باسىندا ايتىلعانىمەن, بۇكىل ەل بىلۋگە لايىقتى پىكىرلەر ەدى.
وتكەن عاسىردىڭ 70-80-جىلدارى قاراتاۋ – جامبىل فوسفوريت كەنىشىنىڭ باسشىلارى رەسپۋبليكا بۇقارالىق اقپارات قۇرالدارىنىڭ باسشى-قوسشىلارىن شاقىرىپ, كەنىشتەر مەن زاۋىتتارىن تانىستىراتىن دا, ارتىنان ۇلكەن جيىن وتكىزەتىن. ونى رەسپۋبيكالىق لەزدەمە دەپ اتايتىنبىز بىزدەر, جۋرناليستەر. مىنە, سول باق وكىلدەرىنە تاراز قوناقۇيىنىڭ شاتىرىنداعى كافەدە قوناقاسى بەرىلدى. ال ءدام ۇستىندە وبلىس ونەرپازدارى كونتسەرت كورسەتتى. ءبىر كەزدە ۇمىتپاسام جامبىل مادەني-اعارتۋ ۋچيليششەسىنىڭ ءانسامبلى بولۋ كەرەك, ابەكەڭنىڭ «ەركە سىلقىمىن» توگىلتە جونەلدى. راسىن ايتقاندا, كوپشىلىك بۇعان دەيىن ءوز «قىزىعىمەن» وتىرعان. ال «ەركە سىلقىم» وينالعاندا, اسىرەسە قازاقتار جاعى كىلت توقتادى. ءبىزدىڭ ء«بىلىم جانە ەڭبەكتىڭ» باس رەداكتورى اقسەلەۋ سەيدىمبەك تە قىزۋ ايتىپ جاتقان اڭگىمەسىن دوعارىپ, قالت جىبەرمەي تىڭدادى. تىڭدادى دا «ويپىرماي, مىناۋ ءوزى تابيعاتى بولەك قوي, ءتۇبى ءبىزدىڭ ارقادان شىققان-اۋ, كىمدىكى ءوزى؟» دەپ جان-جاعىنا قاراعىشتاپ, قوزعالاقتاپ كەتتى. كۇي بىتكەن سوڭ اقاڭ ورىنداۋشىلاردى وزىنە شاقىرىپ الىپ, كۇي مەن كۇيشى تۋرالى سۇراستىردى. ولار شىعارمانىڭ اۆتورى – ءابدىمومىن جەلدىباەۆ دەگەن جەرگىلىكتى كومپوزيتور ەكەنىن ايتتى. «بۇل جەردە جوق پا؟» دەپ سۇرادى اقاڭ. ول كىسى شۋ اۋدانىندا تۇرادى. اۆتوكلۋب مەڭگەرۋشىسى بولىپ جۇمىس ىستەيدى دەگەن جاۋاپ بەرىلدى وعان سول كەزدە-اق.
اقسەلەۋدىڭ وسى ساپارداعى ەڭ ۇلكەن ولجاسى «ەركە سىلقىم» مەن ونىڭ اۆتورىن تانىپ-بىلگەنى بولدى-اۋ دەپ ويلايمىن وسى كۇنى.
بۇل وقيعادان ءبىراز جىل وتكەن سوڭ تاكەن الىمقۇلوۆ اعامىزدى مويىنقۇم اۋدانىندا ۇشىراتىپ, ءبىر كۇن ساپارلاس بولدىم.
قونالقادا اۋلادا وتىر ەدىك, كورشىلەردىڭ بىرىنەن «ەركە سىلقىم» وينالدى. سوندا باياعى اقسەلەۋدىڭ اڭگىمەسى ەسىمە ءتۇسىپ, مەن تاكەن اعامىزدان وسى كۇيدىڭ توركىنى, جالپى جەلدىباەۆ كۇيىنىڭ ەرەكشەلىگى تۋرالى سۇرادىم.
– مۇنداي كۇيدىڭ شۋ بويىندا تۋى ابدەن مۇمكىن قۇبىلىس, – دەدى اعامىز ءسال جوتكىرىنىپ الىپ. شۋ بويى – قازاقتىڭ ءۇش ءجۇزىنىڭ مادەنيەتى توعىسقان جەر. ونىڭ حالقى جازدا ارقاعا اسىپ بارىپ جايلاعان. ال قىستا, كەرىسىنشە ارقالىقتا, شۋدىڭ قالىڭ قامىسىنىڭ ىقتاسىنىن قونىس ەتىپ, قاراتاۋدى قارا تۇتقان. مىنە, سول كەزدەن-اق باتىستىڭ توكپە كۇيىن دە, ارقانىڭ شەرتپە كۇيىن دە, جەتىسۋدىڭ اڭىز ءۇندى ەركە قاعىستارىن دا شۋ حالقى ەجەلدەن ەستىپ بويىنا ءسىڭىرىپ وسكەن. ءابدىمومىن كۇيلەرىندە بارلىق كۇي قاعىستارى كوزدەسەتىنى سودان, – دەپ توقتادى تاكەڭ. سودان سوڭ, ء«وزى ءبىلىمى بار جىگىت پە؟» دەپ سۇرادى. مەن ء«يا, جامبىل مادەني-اعارتۋ ۋچيليششەسىن, سودان سوڭ الماتىدا كونسەرۆاتوريا بىتىرگەن» دەپ جاۋاپ بەردىم. «ونەردىڭ باعىن اشاتىن حالىق قوي, سول حالقىنىڭ ورتاسىنان كەتكىسى كەلمەگەن عوي بۇل جىگىت» دەپ ءتۇيدى اڭگىمەسىن تاكەڭ.
– دەگەنمەن استانادا تۇرعاننىڭ ارتىقشىلىعى كوپ قوي. كۇيلەرى قۇرمانعازى وركەسترىنە ءتۇسىرىلىپ, قازاق راديوسى مەن تەلەديدارىنان ءجيى بەرىلىپ جاتار ەدى, – دەدىم مەن.
حالقىنىڭ كوكەيىنە قونعان تۋىندى جەردە قالمايدى. ىزدەۋشىسى مىندەتتى تۇردە شىعادى دەپ قىسقا جاۋاپ بەرگەن تاكەڭ اڭگىمەنى ءارى سوزباي سالۋلى توسەگىنە جانتايا كەتتى...
ءابدىمومىن كۇيلەرىنىڭ ىزدەۋشىسى سول حالقىنىڭ ءوزى بولىپ, بۇكىل مەكتەپ, كلۋب كوركەمونەرپازدارى بىرىنەن كەيىن ءبىرى ءىلىپ اكەتىپ, ورىنداپ جاتتى. وسىلاي شۋ بويىندا تۋعان كۇيلەر بۇكىل قازاقستانعا قانات قاقتى.
قازىرگى تەحنيكالىق مۇمكىندىكتىڭ ارقاسىندا ونىڭ كۇيلەرىن قازاق مەكەن ەتەتىن جەردىڭ بارلىعىنان, كورشى رەسپۋبليكالاردان, ەۋروپا ەلدەرىنەن, ءتىپتى مۇحيتتىڭ ارجاعىنداعى امەريكادان دا ەستىپ ءجۇرمىز.
ءابدىمومىننىڭ كۇيلەرى ەلىمىزدىڭ قۇرمانعازى اتىنداعى باس وركەسترىنىڭ رەپەرتۋارىنا ەنگەنىنە دە ءبىراز جىل بولدى. ال بيىل ول كۇيلەرىن ەلوردا وركەسترىنە ءتۇسىرىپ, ەسەپتى كونتسەرتىن بەردى. اۋىلدا تۇرسا دا ونىڭ كۇيلەرى وسىلاي كەڭ تارالىپ جانە جوعارى باعالانىپ, حالقىنىڭ جۇرەگىن جاۋلاپ الۋمەن بىرگە كىرپياز مۋزىكا ماماندارىن دا مويىنداتتى.
مىنە, سوندىقتان دا ءابدىمومىننىڭ كەيبىر كۇيلەرى حالىق كۇيىنە اينالىپ, ءوزىن ناعىز حالىق كومپوزيتورى رەتىندە قابىلدايتىن بولدى.
مۇنداي قۇرمەت شىعارماشىلىق ادامدارىنىڭ ىشىندە ىلۋدە بىرەۋىنە عانا بۇيىرادى. ول ۇكىمەتتىڭ اتاق-ماراپاتتارىنان كەندە ەمەس. «قازاقستاننىڭ ەڭبەك سىڭىرگەن قايراتكەرى».
جاي كومپوزيتور ەمەس, ونەرىن كورسەتىپ بولعاننان كەيىن داستارقان باسىندا شەشىلە سويلەپ, قۇلاق اتالى سوزگە ساۋساعان كوپتىڭ قۇرىشى قاندىرا بىلەتىن ەل اقساقالدارىنىڭ ءبىرى دە ول بۇل كۇندە.
سازگەردىڭ مۇنداي قوشەمەتتەرى ونىڭ شىعارماشىلىعىنا تۇك تە كەدەرگى كەلتىرمەي قايتا مازمۇنىن ارتتىرا تۇسەتىن. ورىندالىپ جۇرگەن وتىزدان استام كۇيلەرىنىڭ اتتارىنا قاراپ تۇرىپ-اق بايقاۋعا بولادى. «بوزجىگىت», «ىدىرىس», «جەتىسۋ», «كوكشولاق», ء«ومىر-داستان», «تولعاۋ», «سامعاۋ», «شابىت», «اۋليە اتا», «تولە بي تولعاۋى», «تۇران ەلى» بولىپ كەتە بەرەتىن. بۇل تىزىمنەن كۇيشىنىڭ, اسىرەسە ەلىمىز تاۋەلسىزدىك العاننان سوڭ شامىرقانىپ, ازاتتىقتىڭ ءۇنى باسىم بولعانى بايقالادى. ءان جانرىندا دا وسى جىلدارى كوپ ەڭبەك ەتتى ء(«سۇلۋتور», «بايدىبەكتىڭ جايلاۋى», ت.ب.). الايدا بۇل تۋىندىلارى ءتىپتى دە جالاڭ ۇران ەمەس-ءتى. قايتا ۋاقىت پەن كەڭىستىكتى قوسقان تەڭدىكپەن سەزىنىپ, وسىناۋ ءۇش توعاندى تەڭ تايپالاتقان ناعىز دۇلدۇلدەر.
جۇزبەن, مىڭمەن عانا شەكتەلىپ قالماي ءابدىمومىن كۇيلەرىنىڭ ميلليونداردىڭ جۇرەگىنە جول تابا ءبىلۋىنىڭ سىرى وسىندا جاتىر. الايدا تالانتتىڭ شىن باعاسىن تالانت قانا بەرەدى. سوندىقتان دا قۇر تامسانۋدى دوعارىپ, مۋزىكا مامانى كومپوزيتور ۆلاديمير پيتەرتسەۆتىڭ پىكىرىن كەلتىرگەندى ءجون كورىپ وتىرمىز.
«مەن جايشىلىقتا ءبىر كۇيدى وركەستردە بىرنەشە اي تۇسىرمەۋشى ەدىم, ال «تولە بي تولعاۋىن» جيىرما كۇندە-اق ءتۇسىردىم. ويتكەنى كۇي مەنى ءوزىنىڭ تەرەڭدىگىمەن, اۋقىمدىلىعىمەن قاتتى باۋرادى. ءسىز, قازاق كۇيىن جانرلىق جاعىنان كەڭەيتتىڭىز. «تولە بي تولعاۋى» ءۇش بولىمنەن تۇراتىن سيمفونيا دەۋگە بولادى» دەگەن ەكەن اۆتوردىڭ وزىنە. سودان سوڭ, «بىلەسەڭ بە, مەن «ەركە سىلقىمعا» عاشىق بولعانىم سونشا, ونى ءوزىم ورىنداۋ ءۇشىن دومبىرا تارتۋدى ۇيرەندىم» دەپتى. بۇدان ارتىق قانداي باعا كەرەك؟!
ءابدىمومىن شىعارماشىلىعىنا بەرىلگەن وتە جوعارى باعا ەكەنىن مەن جازۋشى رەتىندە بىلاي تۇسىندىرگىم كەلەدى. ماسەلەن, كلاسسيك اتانۋدىڭ انىقتامالارى مەن شارتتارى بىرنەشەۋ. ونىڭ ىشىندە ەڭ قيىنى حالىق جاقسى قابىلداعان شىعارما تۋدىرىپ قانا قويماي, سول شىعارماسىنىڭ تۇرىندە (فورماسىندا) جانە مازمۇن-يدەياسىندا ەرەكشە جاڭالىق بولۋ شارتى. ۆ.پيتەرتسەۆتىڭ پىكىرىنە سۇيەنسەك, ءابدىمومىن كۇي فورماسىن كەڭەيتىپ, كەرەمەت وزگەرىس اكەلگەن. قازاقتىڭ ءداستۇرلى كۇيىن داستانعا, ۇزىن سارىن تولعاۋعا اينالدىرعان. ەكىنشى جاعىنان ول قازاق كۇيلەرىنىڭ مازمۇنىن بايىتقان. ماسەلەن, جوعارىدا ءسوز بولعان «تولە بي تولعاۋىندا» ەلىمىزگە جوڭعارلاردان تونگەن قاۋىپ پەن ونى تەرىس سەزىنگەن تولە ءبيدىڭ تولعانىستارى جانە جانتالاسقان ارەكەتتەرى, ودان ءارى ءومىر مەن ءولىمنىڭ جان الىپ, جان بەرىسكەن شايقاستارى, سوڭىنداعى جەڭىس شاتتىعى ءبارى تۇتاسقاندا ءبۇتىن ءبىر ءداۋىر كۇي بولىپ كۇمبىرلەپ كەتەدى. ال تۇرىك حالىقتارىنىڭ ءبىر ەمەس بىرنەشە ءداۋىرىن قامتيتىن «تۇران ەلىنىڭ» اۋقىمى وزگەشەلىگى مەن سونى مازمۇن-يدەيا وسىنداي-اق بولار دەگىزەتىندەي تىم كەڭ. بۇرىنعى «زار زاماندا» شابارماندار مەن پوشتابايلاردان جەگەن تاياعىن جىرلاۋدان ارىگە مۇمكىندىگى بولماي قالعان قازاق سازگەرلەرىنىڭ ناعىز شىمىرقانعانىنىڭ كورىنىسى بۇل.
الايدا ءابدىمومىن كۇيلەرىنىڭ ىشىندە وزگە ۇلت وكىلدەرىنىڭ ءوزىن دومبىرا تارتۋدى ۇيرەنۋگە «مۇساپىرلەگەن» «ەركە سىلقىمنىڭ» ورنى مۇلدە بولەك. مۇندا ۋاقىت تا, كەڭىستىك تە جوق, دالىرەك ايتقاندا جىلجىمايدى, ياعني ماڭگىلىك! ەسەسىنە وندا تەك سانالىلارعا عانا ءتان ۇلى سەزىم – ءسۇيۋ بار. سوپىلىق ءىلىم بويىنشا ءسۇيۋ ەكى ساتىلى. ونىڭ ءبىرىنشىسى – ماحاببات. بۇل جان-تانىمەن ءسۇيۋ. ال ەكىنشىسى تانمەن سۇيۋدەن الدەقايدا بيىكتەپ كەتكەن, تەك جانمەن, ياعني رۋحىڭمەن ءسۇيۋ, «يشك» دەپ اتالاتىن بۇل ءسۇيۋدىڭ ەڭ شەگى اللاعا عاشىقتىق, جاراتقانعا رۋحىڭمەن جاقىنداۋ, قوسىلۋ. مىنە, وسى ءسۇيۋدىڭ ءبىرىنشى ساتىسى – ماحابباتقا ەلدە جوق كۇي-ەسكەرتكىش ورناتپاق بولعان ابەكەڭ وعان ءومىرىنىڭ جيىرما جىلىن ارناپتى. ارينە, مۇنشاما ۋاقىتتا اۆتور ەر جەتىپ, ەسەيگەن, تانىم-تۇسىنىگى كەڭەيىپ, تالانتى تارلان تارتقان. سوندىقتان دا ونىڭ كۇيى قىز بەن جىگىتتىڭ اراسىنداعى عاشىقتىقتان بيىكتەپ, ناعىز رۋحاني ۇلى ءسۇيۋدىڭ تيپتىك وبرازىنا اينالعان. شىعارماشىلىق ادامدارىنىڭ شىن شابىتقا ەنۋى دە سوپىلىقتىڭ بەلگىلى ءبىر دەڭگەيى ەكەنىن ەسكەرسەك, بۇل ابدەن مۇمكىن جاعداي. تەك جۇرەك كىرلەمەسە بولعانى.
سولاي, ابەكەڭ تىڭدارمانىن ىنتىقتىرىپ, ۇزدىكتىرىپ, قانىن قىزدىرىپ بارىپ, «ەي, كۇناھار پەندە جاراتۋشى جالعىز عانا بەرگەن ۇلى ءسۇيۋدى – ماحابباتتى قادىرلە, ۇدەسىنەن شىق. باسىڭداعى باعىڭنىڭ كىلتى ءوزىڭنىڭ سول ماحابباتىڭدا» دەيدى.
ادامزات الەمىنىڭ مايەگى – ماحاببات بولسا, ءابدىمومىن الەمىنىڭ مايەگى – «ەركە سىلقىم».
ەلەن ءالىمجان,
جازۋشى-دراماتۋرگ
جامبىل وبلىسى,
شۋ اۋدانى
