اتاپ ايتساق, ۇكىمەت دەنساۋلىق ساقتاۋ سالاسىن جانە جالپى الەۋمەتتىك سالانى قارجىلاندىرۋ جۇيەسىن قايتا قارايدى; ەكى جىلدا ەلىمىزدەگى 650 ەلدى مەكەندە مەديتسينالىق جانە فەلدشەرلىك-اكۋشەرلىك بولىمشە سالىنىپ, قاجەتتى قۇرال-جابدىقپەن تولىق قامتاماسىز ەتىلەدى; مەديتسينالىق جوعارى وقۋ ورىندارىنىڭ الەۋەتىن پايدالانۋ كەڭەيتىلەدى, الداعى ءۇش جىلدا رەزيدەنتۋراعا بولىنەتىن گرانت سانى 70 پايىزعا كوبەيەدى; بالاباقشامەن قامتاماسىز ەتۋ ماسەلەسىنىڭ تۇپكىلىكتى شەشىلۋى; تاربيەشىلەردىڭ الەۋمەتتىك مارتەبەسىنىڭ ارتىپ, جالاقىسى كوبەيۋى, ءۇش اۋىسىممەن وقيتىن مەكتەپ ماسەلەسىن تولىق شەشۋ تۋرالى تاپسىرمالار ەلىمىزدەگى ايەلدەر مەن بالالاردىڭ جاعدايىن جاقسارتۋعا باعىتتالعان.
ەڭ تومەنگى جالاقى دەڭگەيىن كوتەرۋ تۋرالى, زەينەتاقىنىڭ وسۋىنە, ايەلدەردىڭ زەينەت جاسىن ازايتۋعا بايلانىستى جانە بالا كۇتىمى مەرزىمىن ۇزارتۋ تۋرالى شەشىمدەر دە حالىقتىڭ, ەڭ الدىمەن, ايەلدەر تابىسىنىڭ ۇلعايۋىنا تىكەلەي اسەر ەتپەك. بۇل ماسەلەلەر قازاقستان پرەزيدەنتىنىڭ جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ كۇن تارتىبىندە تۇرعانىن, تۇجىرىمدى تالقىلاۋلار مەن ساپالى ۇسىنىستار ايتىلعانىن دا اتاپ ءوتۋ كەرەك.
ۇلتتىق قورعا تۇسكەن قاراجاتتىڭ يگىلىگىن بالالارىمىز تىكەلەي كورەتىنى تۋرالى باستاما, جەمقورلاردىڭ زاڭسىز تاپقان قارجىسىنىڭ مەملەكەتكە ءوتىپ, تۇگەلدەي مەكتەپ قۇرىلىسىنا جۇمسالۋعا ءتيىس دەگەن پرەزيدەنت باستامالارى – ەلىمىزدىڭ الەۋمەتتىك ادىلەتتىلىك ورناتۋىنا باعىت الۋىنىڭ ايشىقتى كورىنىسى.
الەۋمەتتىك قورعاۋ جۇيەسىندە بۇرىن-سوڭدى بولماعان, ۇلتتىق قوردان بالالار الاتىن قاراجات تۋرالى باستامانى ايتا كەتۋ كەرەك. ەڭ باستىسى, پرەزيدەنت تۇجىرىمدامالىق تۇردە ۇلتتىق قوردىڭ تابىسى حالىققا تىكەلەي باراتىن مەحانيزمدى ۇسىندى.
جولداۋ – ادىلەتتى قازاقستاندى قۇرۋدىڭ ەكونوميكالىق, الەۋمەتتىك جانە ساياسي دامۋىنىڭ بولاشاق جۇيەسى, ماۋسىمدا وتكەن رەفەرەندۋمدا حالىق قولداعان كونستيتۋتسيالىق وزگەرىستەردى ناقتى ىسكە اسىرۋ باعدارىن ايقىندادى.
پرەزيدەنتتىڭ پىكىرىمەن ايتساق, «ادىلەتتى قازاقستاندى قۇرۋ ءىسى ەندى عانا باستالدى. الداعى جولدىڭ قيىندىعى كوپ. قول قۋسىرىپ وتىراتىندار مەن قاساقانا كەدەرگى جاسايتىندارعا ورىن جوق». ويتكەنى قازىرگىدەي مەملەكەتىمىز ءۇشىن تاعدىرشەشتى كەزەڭدە, «مۇمكىندىكتەر ءدالىزى» اشىلعان ساتتە ارقايسىسىمىز بار كۇش-جىگەرىمىز بەن قۋاتىمىزدى حالقىمىزدىڭ ءال-اۋقاتىن جاقسارتۋعا, قازاقستاننىڭ العا باسۋىنا, ادام كاپيتالىن دامىتۋعا, جاستارىمىزدىڭ جارقىراپ وسۋىنە باعىتتالعان رەفورمالاردىڭ ساپالى وتۋىنە ۇلەس قوسۋىمىز اسا ماڭىزدى فاكتورلاردىڭ ءبىرى بولماق.
وسى جىلدىڭ سوڭىنا دەيىن كونستيتۋتسيالىق جاڭاشىلدىقتار نەگىزىنەن زاڭناماعا ەنگىزىلەدى. پارلامەنت دەپۋتاتتارىنىڭ قازىرگى ماقساتى مەملەكەت باسشىسى قويعان باستامالاردى زاڭنامالىق نەگىزدە ەنگىزۋگە باعىتتالىپ وتىر. رەفەرەندۋمدا قابىلدانعان قۇندىلىقتار ءتيىستى زاڭدار شەڭبەرىندە تولىققاندى قىزمەت ەتكەندە عانا قوعامدىق قاتىناستاردىڭ جاڭارۋىنىڭ جۇزەگە اسۋ پروتسەسى باستالماق.
«ساياساتكەرلەر الداعى سايلاۋ ناۋقانى تۋرالى, ال تۇلعالار ەلىنىڭ كەلەشەگى تۋرالى ويلايدى», دەگەن ءسوز بار. پرەزيدەنت ق.توقاەۆ قازاق ەلىنىڭ, قازاقستاننىڭ الداعى اۋقىمدى كەزەڭدەگى جاڭارۋ, جاڭعىرۋ پروتسەسىنە باستاماشىلىق جاساپ وتىر, ال وسى باستامالاردى قولداۋ, جۇزەگە اسىرۋ ءۇشىن ەڭبەك ەتۋ ارقايسىسىمىزعا سىن جانە جاۋاپكەرشىلىك.
ءلاززات سۇلەيمەن,
سەنات دەپۋتاتى
