جاڭا الەمدىك سىن-قاتەرلەر, گەوساياسي احۋال, سىرتقى اسەردەن تۋىنداعان كۇردەلى ەكونوميكالىق قۇبىلىستار ەل ەكونوميكاسىنا اسەر ەتىپ جاتقان ۋاقىتتا قابىلدانعان ستراتەگيالىق قۇجاتتا مەملەكەت باسشىسى قوعامدا ورىن العان بارلىق تۇيتكىلدى مۇقيات تالداپ قانا قويماي, شۇعىل شەشۋ جولدارىن ۇسىندى. بۇل – ەڭ الدىمەن حالقىمىزدىڭ ءومىر ساپاسىنىڭ جاقسارۋىنا, بالالارىمىزدىڭ ءبىلىم الۋى مەن جاستار كاسىپكەرلىگىن نىعايتۋعا باعىتتالعان ماقساتتى جۇمىستار.
جولداۋدا اۋىل تۇرعىندارىن ساپالى مەديتسينالىق كومەكپەن قامتۋ جوباسى ناقتى ايتىلدى. الداعى جىلدارى 650 ەلدى مەكەندە مەديتسينالىق جانە فەلدشەرلىك-اكۋشەرلىك پۋنكتتەر سالىنادى. سونىڭ ارقاسىندا اۋىلدا دارىگەرلىك كومەك ساپاسى جاقسارماق. نازار اۋدارارلىق جايت, جولداۋدا ايتىلعان «ۇلتتىق قور – بالالارعا» باعدارلاماسى. ەندىگى جەردە ۇلتتىق قوردىڭ جىل سايىنعى ينۆەستيتسيالىق كىرىسىنىڭ 50 پايىزى بالالاردىڭ 18 جاسقا تولعانعا دەيىن ارنايى جيناقتاۋشى شوتتارىنا اۋدارىلماقشى. وسى ارقىلى جاستار بولاشاعىنا جول اشامىز. بۇل – ەرتەڭىن ويلايتىن جۇرتتىڭ قادامى.
ەل پرەزيدەنتىنىڭ تاعى ءبىر ماڭىزدى شەشىمى – الداعى جىلى ءماجىلىس پەن بارلىق دەڭگەيدەگى ماسليحاتتارعا سايلاۋ وتكىزۋ. جاڭا قاتىناستار جاعدايىندا ازاماتتاردىڭ كەڭ توپتارىنىڭ مۇددەسىن قورعايتىن جانە ءماسليحاتتار مەن پارلامەنت جۇمىسىنىڭ تيىمدىلىگىن ارتتىراتىن پارلامەنت قۇرامىن جاڭارتۋ وتە ماڭىزدى. ەل دامۋىنىڭ جاقىن اراداعى باعىتتارىن ايقىندايتىن جولداۋدا كورسەتىلگەن باعىتتاردى اسقان جاۋاپكەرشىلىكپەن ىسكە اسىرۋ ەل ازاماتتارى ءۇشىن سىن ەكەنىن, ول ءۇشىن بىرلىگىمىزدى بەكەمدەپ, حالقىمىزدىڭ ءال-اۋقاتىنىڭ ارتۋى ءۇشىن ايانباي جۇمىس ىستەۋىمىز قاجەت ەكەندىگىن باسا ايتقىم كەلەدى.
امانگەلدى نۇعمانوۆ,
اقتوبە وبلىستىق ءماسليحاتىنىڭ حاتشىسى
