ايتۋلى كۇي مەرەكەسى الدىمەن كۇي اتاسىنىڭ ەڭسەلى ەسكەرتكىشىنە گۇل شوعىن قويۋمەن باستالدى. ودان كەيىن «كۇي اناسى» قوعامدىق قورىنىڭ توراعاسى, قوعام قايراتكەرى تولەگەن قۋانىشەۆ ءسوز الىپ, مادەني ءىس-شارانىڭ ماڭىزىنا توقتالدى.
– ءبىز بۇگىنگە دەيىن ايگىلى كۇيشى دينا نۇرپەيىسوۆانىڭ استاناداعى ەسكەرتكىشى جانىندا ءۇش كۇي جارمەڭكەسىن وتكىزدىك. ال بيىلعى ءتورتىنشى كۇي مەرەكەسىن «كۇي اناسى» قوعامدىق قورىنىڭ جانىنان قۇرىلعان اقساقالدار القاسىنىڭ شەشىمىمەن قۇرمانعازى بابامىزدىڭ ەسكەرتكىشى جانىندا وتكىزۋدى ۇيعاردىق. كۇي دەسە كەز كەلگەن قازاق ەلەڭ ەتە قالادى. ءبىر جاعىنان, قازىرگى جاستاردى قۇر سوزبەن تاربيەلەۋ قيىن. سوندىقتان اتادان بالاعا جالعاسىپ كەلە جاتقان عاجايىپ كۇي ونەرىمىز ارقىلى جاس ۇرپاقتىڭ بويىنا وتانشىلدىق رۋحتى دارىتا بىلسەك دەيمىن. مىسالى, بۇگىنگى ءىس-شاراعا قاتىسۋعا, تىڭداۋعا كەلگەن كوپتەگەن جاستى كورىپ, كوڭىلىم تولىپ وتىر. وسىنىڭ ءوزى العا قويعان ماقساتىمىزدىڭ از دا بولسا ورىندالعانى دەپ بىلەمىن, – دەدى ول.
ايتا كەتەيىك, بۇگىندە رەسپۋبليكالىق «كۇي اناسى» قوعامدىق قورى ءبىراز يگى ىستەرگە مۇرىندىق بولىپ ءجۇر. وسى قوردىڭ باستاماسىمەن تانىمال شەبەرلەر جاساعان 185 دومبىرا ونەر مەكتەپتەرىنە تەگىن تاراتىلدى. سونداي-اق تولەگەن قۋانىشەۆ ءوز سوزىندە دينا نۇرپەيىسوۆانىڭ باس قالاداعى ەسكەرتكىشى جانىنان «كۇيشىلەر» اللەياسىن اشىپ, سول جەرگە بەلگى تاس قويىپ, وعان ءتول ونەرىمىزدىڭ دامۋىنا زور ۇلەس قوسقان داڭقتى كۇيشىلەردىڭ ەسىمىن جازىپ قويۋدى جوسپارلاپ وتىرعانىن جەتكىزدى. ودان سوڭ بەلگىلى كۇيشى, ونەر زەرتتەۋشىسى, قازاقستاننىڭ ەڭبەك سىڭىرگەن قايراتكەرى ايتجان توقتاعان قۇرمانعازى بابامىزدىڭ ءومىر جولى مەن مۇراسى تۋرالى پاراساتتى وي ءوربىتتى.
قازاقتىڭ رۋحىن كۇيمەن تەربەگەن جارمەڭكەنى تۇرار الىپباەۆ, انار مۇزداحانوۆا, نۇرلان بەكەنوۆ سەكىلدى ايتۋلى كۇيشىلەر باستاپ, ونى ءارى قاراي جاس تالانتتى دومبىراشىلار قوستاپ, كۇي اتاسىنىڭ رۋحتى, وتتى, ەكپىندى كۇيلەرىمەن ەلوردا اسپانىن كۇمبىرلەتتى. ءىس-شارا بارىسىندا ۇلتتىق ءداستۇرىمىزدىڭ تاماشا ۇلگىلەرى دە ۇمىت قالمادى. مادەنيەت قايراتكەرى, ديريجەر نۇرلان بەكەنوۆ قازاقى ءجون-جوبامەن اسلان ەسىمدى جاس بالاعا دومبىرا سىيلادى.
سونىمەن قاتار مازمۇندى مەرەكە كۇيشىلەردىڭ كۇي تارتىسىنا ۇلاسىپ, وعان كورەرمەندەر اراسىنان دا ازاماتتار قاتىسىپ, قۇرمانعازى بابامىز بەن باسقا دا تارلان كۇيشىلەردىڭ تۋىندىلارىن توگىلتىپ, كۇيگە سۋساپ جۇرگەن قاۋىمنىڭ قۇمارىن قاندىردى. كۇي تارتىسىندا وزا شاپقان كۇيشىگە ۇكىلى دومبىرا تابىس ەتىلدى.
