وبلىستىق تاريحي-مادەني مۇرانى قورعاۋ جانە پايدالانۋ ورتالىعىنىڭ قىزمەتكەرلەرى ءار توبەسىنىڭ استىندا كونە تاريحتىڭ كومبەسى بۇعىپ جاتقان بۋراباي ءوڭىرىن بارلاعان. شىنىن ايتۋىمىز كەرەك, بۇل جەرلەردىڭ باسىم بولىگى اۋىل شارۋاشىلىعى ماقساتىندا پايدالانىلۋدا. كەزىندە تالاي قۇندى دۇنيەنىڭ قۇردىمعا كەتكەنى دە راس. كونەنىڭ كوزىن, ارىداعى جۇرتتىڭ ءىزىن بارلاعان ۋاقىتتا بۇل اۋماقتا «رەگيون دورستروي» سەرىكتەستىگىنە بولىنگەن جەردەن ات باسىنداي ولجا تابىلادى دەپ كىم ويلاعان. اۋەلى ورتالىق قىزمەتكەرلەرى جاڭاجول اۋىلىنىڭ ماڭىندا جيدەك تەرىپ جۇرگەن ادامدارمەن تىلدەسكەن. ولار وسى ماڭدا تىلسىم تاريحتىڭ تۇنىق سىرى بۇعىپ جاتقان جەر كەزىگۋى مۇمكىن دەپ ءجون سىلتەسە كەرەك. دەر شاعىندا تاۋىپتى, ايتپەسە, جەتى قات جەردىڭ استىنداعى قۇندى جادىگەرلەردىڭ تابيعي جانە انتروپوگەندىك سەبەپتەردىڭ اسەرىنەن جويىلىپ جاتقانى دا جاسىرىن سىر ەمەس قوي.
– زەرتتەۋ بارىسىندا قورعانداعى شۇڭقىردان تەمىر داۋىرىندە كۇن كەشكەن ساق جاۋىنگەرىنىڭ ءمايىتى تابىلدى. جانىنان دوڭەس تىرەۋىشتەرى بار اۋىزدىق, جۇگەندى اشەكەيلەگەن ارقيلى بۇيىمدار, سۇيەكتەن جاسالعان زاتتار ءتارىزدى جادىگەرلەر شىقتى. قۇستىڭ باسى تاڭبالانعان, كۇن قۇدايىنىڭ بەلگىسى كوشىرىلگەن جاپسىرمالار دا بار. قانجار, پىشاق, تاسقايراق, ون دانا ساق-سكيفتىك ۇلگىدەگى جەبەنىڭ ۇشتارى, قىسقا قىلىش تا عالىمدار نازارىن اۋدارىپ وتىر, – دەيدى ورتالىق ديرەكتورى جاسۇلان ۋكەەۆ.
تابىلعان جادىگەرلەر تولىق زەردەلەنىپ, زەرتتەلگەننەن كەيىن وبلىستىق تاريحي-ولكەتانۋ مۋزەيىنە تاپسىرىلماق.
اقمولا وبلىسى
