31 جاستاعى پابلو كاررەنو اتر تۋرنيرلەرىن جەتى مارتە ۇتىپ, 2017 جانە 2020 جىلدارى ءدال وسى جارىستىڭ جارتىلاي فينالىندا ونەر كورسەتتى. رولان گارروستىڭ شيرەك فينالىنا دەيىن جەتىپ, بيىل اۋستراليانىڭ اشىق بىرىنشىلىگىنىڭ ءتورتىنشى كەزەڭىندە ءسۇرىندى. بىلتىر توكيودا الاۋى تۇتانعان وليمپيا ويىندارىندا قولا مەدالدى قورجىنعا سالدى. كەزىندە US Open دوداسىنىڭ جۇپتىق سايىسىنىڭ فينالىندا ونەر كورسەتتى. قازىرگى كەزدە بۋستا الەمدىك رەيتينگتە 14-ورىندى يەلەنۋدە. بۇل ويىنشىنىڭ جولى بۋبليكپەن ءۇش مارتە قيىسىپ, سول باسەكەلەردىڭ بارلىعىندا يسپانيالىق ويىنشى جەڭىسكە جەتكەن ەدى. بۇل جولى دا سول جاعداي قايتالاندى. ەكى تەننيسشى ءبىر-بىرىمەن ءۇش ساعات بويى ايقاستى. ناتيجەسىندە, پيرەنەي تۇبەگى وكىلىنىڭ مەرەيى ۇستەم بولدى. ەسەپ – 4:6, 6:4, 6:3, 7:6.
بيىلعى اقش-تىڭ اشىق بىرىنشىلىگى توسىن ناتيجەلەرگە تولى بولايىن دەپ تۇر. بۇعان دەيىن ءبىز رۋمىنيالىق سيمونا حالەپ, رەسەيلىك داريا كاساتكينا, گرەكيالىق ستەفانوس تسيتسيپاس سىندى ساڭلاقتار تۇساۋكەسەر كەزدەسۋلەرىندە سۇرىنگەنى جايىندا جازدىق. ىلە-شالا ەمما رادۋكانۋ دا جەڭىلىستىڭ كەرمەك ءدامىن تاتتى. بىلتىر US Open تۋرنيرىندە الدىنا جان سالماعان ۇلىبريتانيانىڭ ارۋى الەمدىك رەيتينگتە وزىنەن الدەقايدا تومەن تۇرعان فرانتسيالىق اليزە كورنەگە ەسە جىبەردى.
تاعى ءبىر ايتا كەتەرلىك جايت, اتالعان جارىستىڭ جاسوسپىرىمدەر اراسىنداعى تۋرنيرىندە قازاقستاننىڭ ءۇش بىردەي ورەنى باق سىنايدى. ولار – ماكسيم باتيۋتەنكو, ارۋجان ساعىندىقوۆا جانە ساندۋعاش كەنجەباەۆا. بۇل ويىنشىلاردىڭ بارلىعى دا Team Kazakhstan اكادەمياسىنىڭ تۇلەكتەرى. جاس ورەندەردىڭ دوداسى 4-10 قىركۇيەك ارالىعىندا وتەدى.
