مەكتەپ سول كىسىنىڭ جوباسى نەگىزىندە 1936 جىلى سالىنسا, وقۋ ورداسىنىڭ قۇرىلىسىن جۇرگىزۋگە جەرگىلىكتى حالىقتىڭ جەكەمەنشىك كۇش كولىگى پايدالانىلىپتى.
1920-1930 جىلدارى اۋىلدان وقۋ ىزدەپ, اۋەلى قوستانايدان مۇعالىمدىك كۋرستى, ىلە قىزىلورداداعى پەداگوگيكالىق تەحنيكۋمدى تامامداعان ول «قىزىل مۇعالىم» اتانىپ تۋعان جەرىنە ورالادى, سول جەردە ەڭبەك جولىن باستايدى. 1942 جىلدىڭ 5 مامىرىندا ءوزى تىلەنىپ مايدانعا اتتانىپ, ەرلىكتىڭ ەرەن ۇلگىسىن كورسەتەدى. جەڭىسپەن بەرلينگە جەتىپ, براندەنبۋرگ قاقپاسىنا اتى-ءجونىن جازىپ قالدىرادى.
قازاق, ورىس, اراب تىلدەرىنە وتە جەتىك بولعان اعامىزدىڭ مايدان دالاسىندا, گوسپيتالدا جازعان ەستەلىك ولەڭدەرى قىم-قيعاش جورىق وقيعالارىنا تولى. ونىڭ رەيحستاگتا تۇسكەن سۋرەتى مەن «مايدان كۇندەلىگى» داپتەرى بۇگىندە ارقالىق قالاسىنىڭ مۇراجايىندا ساقتاۋلى تۇر. قان كەشىپ ءجۇرىپ سوعىسقان جاۋىنگەردىڭ «قىزىل جۇلدىز», «وتان سوعىسى» وردەندەرى مەن باسقا دا ماراپاتتارى مۇراجايدان ورىن العان.
بەيبىت ومىرگە ورالعان عابدول-عازيز اعامىز ۇستازدىق جولىن قايتا جالعاستىرادى. ەڭبەك ەتە ءجۇرىپ, قىزىلوردا قالاسىنداعى پەدينستيتۋتتى سىرتتاي وقىپ بىتىرەدى. جەرلەستەرى ونى ومىراۋى وردەن, مەدالعا تولى مايدانگەر عانا ەمەس, سونىمەن قاتار اۋدان, وبلىس, رەسپۋبليكالىق باسىلىمداردا ولەڭ-جىرلارى ءجيى جارىق كورەتىن اقىن رەتىندە دە قۇرمەتتەپ, باعالايدى. تابيعاتىنان تۋما تالانت يەسى ايتىس اقىنى رەتىندە دە جاقسى تانىلعان. «حالىققا ءبىلىم بەرۋ ءىسىنىڭ ۇزدىگى» دەگەن اتاققا دا العاشقىلاردىڭ ءبىرى قاتارىندا يە بولدى.
سوعىستا العان اۋىر جاراقاتىنىڭ سالدارىنان 55 جاسىندا قوس قۇلاعىنان ايىرىلىپ, مۇگەدەك بولىپ قالسا دا ول ون ەكى مۇشەسى ساۋ ادامداي الداعى كۇنگە يەك ارتا, ۇمىتپەن, ارماندى تىلەكپەن ءۇن قاتۋدان جالىقپادى. 31 جىل تاعدىر تارتقىزعان تەپەرىشكە قاسقايا قارسى تۇرىپ, رۋحىن تۇسىرمەي, تۋعان ەلىنە قىزمەت ەتتى. بۇگىندە ءومىرىن, ومىرلىك داعدى-مۇراتىن ۇرپاققا ونەگە عىپ تاراتسا, كانە! ال وسىناۋ كەمەڭگەر ادامنىڭ اتىندا نە ءبىر كوشە, نە ءبىر مەكتەپ جوق. بۇل – ەلگە سىن, ەلدى باسقارعان ەرگە سىن.
گ.قالمىرزاتەگى
قوستاناي وبلىسى,
امانگەلدى اۋدانى
