بۇل قازالى حابار كوپشىلىكتىڭ قابىرعاسىن قايىستىردى. اسىرەسە قادىر قارقابات ۇلىمەن بىرگە قىزمەتتەس بولعان, يا كوزكورگەندەرگە قيىن ءتيدى. ويتكەنى قادىر اعا كەزدەسكەن جاننىڭ ەشقايسىسىن بەيجاي قالدىرمايتىن. ونىڭ جارقىن ءجۇزى, اشىق مىنەزى, جىلى ءسوزى كەز كەلگەن ادامنىڭ جانىن باۋراپ الاتىن.
قادىر قارقابات ۇلى 1944 جىلى تامىزدىڭ ونى كۇنى شىعىس قازاقستان وبلىسى كۇرشىم اۋدانى كۋماشكينو اۋىلىندا دۇنيەگە كەلگەن.
ەڭبەك جولىن ينجەنەردەن باستاعان قادىر اعا 1985-1991 جىلدارى قازاقستان كومپارتياسى الماتى وبكومىنىڭ حاتشىسى, قازاق كسر مينيسترلەر كەڭەسى توراعاسىنىڭ ورىنباسارى, الماتى قالالىق پارتيا كوميتەتىنىڭ ءبىرىنشى حاتشىسى جانە الماتى قالالىق كەڭەسىنىڭ توراعاسى قىزمەتتەرىندە بولعان. 1991-1993 جىلدار ارالىعىندا قازاقستان رەسپۋبليكاسى پرەمەر-ءمينيسترىنىڭ ورىنباسارى قىزمەتىن اتقاردى.
قادىر اعانىڭ ەسىمى مۇنايگاز سالاسىندا اڭىزعا اينالعان. ونىڭ ەسىمىن ەستىگەن ادامدار ول كىسىنىڭ قازاقستاننىڭ ءبىرىنشى ەنەرگەتيكا جانە وتىن رەسۋرستارى ءمينيسترى بولعانىن بىردەن ەسكە تۇسىرەدى. ودان كەيىن الەمگە پاش ەتكەن «عاسىر كەلىسىمشارتى», ياعني قازاقستان مەن «شەۆرون» كومپانياسى اراسىنداعى كەلىسسوزدەر جۇرگىزۋ جۇمىس توبىن باسقاردى, قاراشىعاناق گازكوندەنساتى كەن ورنىن يگەرۋ, كاسپي قايراڭىن بارلاۋ جانە كاسپي قۇبىر كونسورتسيۋمىن قۇرۋ جوبالارىنا جەتەكشىلىك ەتتى. قادىر قارقابات ۇلى – تەڭىز-نوۆوروسسيسك مۇناي تاسىمالداۋ قۇبىرىنىڭ سالىنۋىنا باس-كوز بولىپ, جوبانىڭ ءساتتى جۇزەگە اسۋىنا ىقپالداسقان تۇلعا.
قادىر اعا ءار كەز بەلسەندى ەدى. وسى ۋاقىتقا دەيىن ينجينيرينگتى كومپانيالار وداعىن, قازاقستان جۇمىسشىلارى كونفەدەراتسياسىن باسقارىپ كەلدى. ۇزاق جىلدار بويى كاسپي قۇبىر كونسورتسيۋمىنىڭ اتقارۋشى ديرەكتسياسىنىڭ قۇرامىندا بولدى.
ءتۇرلى لاۋازىم يەسى بولسا دا, بيىك بەلەستەردى السا دا, قادىر اعانىڭ تۇلا بويىنان ءبىر ساتكە دە قاراپايىمدىلىق, كورەگەندىلىك, دانالىق قاسيەتتەرى كەتكەن ەمەس.
«كاسپي قۇبىر كونسورتسيۋمى» اكتسيونەرلىك قوعامىنىڭ ۇجىمى مەملەكەتتىك جانە ساياسي تۇلعا, مۇنايگاز سالاسىنىڭ ارداگەرى, قادىرلى قادىر قارقابات ۇلى بايكەنوۆتىڭ جاقىندارىنا قايعىلارىنا ورتاقتاسىپ كوڭىل ايتادى. جاتقان جەرى جايلى, توپىراعى تورقا بولسىن.
«كاسپي قۇبىر كونسورتسيۋمى» اق
