ء«اربىر اۋداننىڭ وزىنە ءتان كۇردەلى ءارى شەشىلۋى ءتيىس ماڭىزدى پروبلەمالارى بار. ماسەلەن بايقوڭىر اۋدانىنىڭ كۇلتەگىن كوشەسىندە جوعارى ۆولتتى ەلەكتر بەرۋ جەلىسى (ەبج) ورنالاسقان. بۇل ماسەلە 26 جىل بويى شەشىمىن تاپپاعان. اۋدان تۇرعىندارىمەن كەزدەستىك. ۇيلەر كەزەڭ-كەزەڭىمەن بۇزىلاتىن بولادى. ەڭ الدىمەن ەلەكتر بەرۋ جەلىسى جانىندا ورنالاسقان كۇلتەگىن, اسان قايعى, سىرداريا, لەرمونتوۆ كوشەلەرىندەگى ۇيلەرگە باسا ءمان بەرىلەدى. وسىعان ۇقساس جۇمىس الداعى ۋاقىتتا ىرگەلەس اۋماقتا دا جۇرگىزىلەدى. الايدا بۇل ءبىر كۇندىك نەمەسە ءبىر جىلدىق جۇمىس ەمەس», دەپ جازدى اكىم الەۋمەتتىك جەلىدەگى پاراقشاسىندا.
التاي كولگىنوۆتىڭ ايتۋىنشا, جوبا ورتاشا ەسەپپەن العاندا 3 جىلدان 5 جىلعا دەيىن سوزىلادى.
«بىلتىر ەلەكتر بەرۋ جەلىسىن شىعارۋ بويىنشا جوبالىق-سمەتالىق قۇجاتتامانى دايىنداۋدى قولعا الدىق, قازىر ول ساراپتامادان ءوتىپ جاتىر. ال بيىل كۇزدە اۋقىمدى جوبانى ىسكە اسىرۋعا كىرىسەمىز. ءبىرىنشى كەزەكتە, جولداردىڭ جانە ينجەنەرلىك جەلىلەردىڭ قۇرىلىسى جوسپارلانعان ۋچاسكەلەردەگى ۇيلەر, سول سياقتى ەلەكتر بەرۋ جەلىسى استىنداعى ۇيلەر بۇزىلادى. بۇعان قوسا بۇزىلاتىن ۇيلەردىڭ قۇنىن بەلگىلەۋ, ولاردى ساتىپ الۋ جانە بۇزۋ جۇمىستارى جۇرگىزىلەدى», دەپ جازدى قالا باسشىسى.
اكىم اسان قايعى كوشەسىندە قوسىمشا ەلەكتر قۋاتى قوسىلعاننان كەيىن كۇلتەگىن كوشەسىندەگى ەلەكتر جەلىسى دەمونتاجدالاتىنىن جەتكىزدى.
«باس جوسپاردا ەگجەي-تەگجەيلى جوسپارلاۋ جوباسىن ازىرلەدىك. جەكە سەكتوردىڭ ورنىنا الەۋمەتتىك نىساندار, تۇرعىن ءۇي كەشەنى, قوعامدىق كەڭىستىكتەر بوي كوتەرەدى. اسان قايعى كوشەسىنىڭ وزىندە 200-دەن استام ءۇي ورنالاسقان. مۇندا ءبىز ءۋاليحانوۆ كوشەسىنە پاراللەل, ينجەنەرلىك جەلىلەرى تولىق سەگىز جولاقتى جول سالۋدى جوسپارلاپ وتىرمىز. مىنە وسىدان كەيىن شاعىناۋدان ينۆەستورلار ءۇشىن دە تارتىمدى بولماق. وسىلايشا, بيىلدان باستاپ كۇلتەگىن, اسان قايعى, سىرداريا جانە ت.ب. كوشەلەردەگى ۇيلەردى كەزەڭ-كەزەڭىمەن بۇزۋدى باستايمىز», دەلىنگەن حابارلامادا.
