كەزدەسۋ بارىسىندا مادەنيەت جانە ونەر سالاسىنداعى جوعارى ءبىلىم بەرۋ ۇيىمدارىنىڭ وقىتۋشىلارىنا لاۋازىمدىق ەڭبەكاقىعا كوەففيتسيەنت ەكى ەسەگە ارتقانى حابارلاندى. ەڭبەككە اقى تولەۋدىڭ جاڭا ەرەجەلەرى ءتورت شىعارماشىلىق جوعارى وقۋ ورنىنا قولدانىلادى, ولار: تەمىربەك جۇرگەنوۆ اتىنداعى قازاق ۇلتتىق ونەر اكادەمياسى, قۇرمانعازى اتىنداعى قازاق ۇلتتىق كونسەرۆاتورياسى, قازاق ۇلتتىق ونەر ۋنيۆەرسيتەتى, قازاق ۇلتتىق حورەوگرافيا اكادەمياسى.
ورتالىق كوممۋنيكاتسيالار قىزمەتىنىڭ الاڭىندا قر مسم مادەنيەت كوميتەتىنىڭ توراعاسى روزا كارىبجانوۆا, سونداي-اق شىعارماشىلىق جوعارى وقۋ ورىندارىنىڭ رەكتورلارى ەنگىزىلگەن وزگەرىستەر مەن جاڭا وقۋ جىلىنا دايىندىق بارىسى جايلى ايتىپ بەردى.
«بۇگىندە مينيسترلىك مادەنيەت جانە ونەر سالاسىنا قاجەت كادرلاردى دايارلاۋ بويىنشا اۋقىمدى جۇمىس اتقارۋدا. بولاشاق كادرلاردى دايارلاۋدى قازاقستاننىڭ ەڭبەك سىڭىرگەن جانە حالىق ارتىستەرى, شىعارماشىلىق ينتەلليگەنتسيانىڭ كورنەكتى وكىلدەرى جۇزەگە اسىرادى. سونىمەن قاتار ستۋدەنتتەر ەلىمىزدىڭ ۇزدىك مادەنيەت ۇيىمدارىندا تاجىريبەدەن وتۋگە مۇمكىندىك الادى. وقۋ ورىندارىنىڭ زامانعا ساي ينتەگراتسيالانۋىنىڭ ارقاسىندا ەلىمىزدىڭ مادەني لاندشافتىنا باسەكەگە قابىلەتتى جانە سۇرانىسقا يە ماماندار قوسىلاتىنىن سەنىممەن ايتا الامىز. ال ەڭبەكاقىعا قاتىستى ايتساق, وقىتۋشىلارىمىزعا لاۋازىمدىق ەڭبەكاقىعا كوەففيتسيەنتتىڭ 1.75-تەن 3.5-كە دەيىن ارتۋىن ەسكەرە وتىرىپ, قايتا ەسەپتەۋ جۇرگىزىلەدى», دەدى روزا كارىبجانوۆا.
ماسەلەن, پروفەسسوردىڭ ەڭبەكاقىسى 267 754 تەڭگەدەن 435 373 تەڭگەگە دەيىن ءوستى, ال جوو دوتسەنتى 243 451 تەڭگە ەمەس, 395 855 تەڭگە الاتىن بولادى.
روزا كارىبجانوۆانىڭ ايتۋىنشا, مادەنيەت مينيسترلىگىنە قاراستى بارلىق ءبىلىم بەرۋ ۇيىمدارى جاڭا وقۋ جىلىنىڭ باستالۋىنا دايىن.
قازاق ۇلتتىق ونەر ۋنيۆەرسيتەتىنىڭ رەكتورى ايمان مۇساقوجاەۆا شىعارماشىلىق جوعارى وقۋ ورىندارى ەلىمىزدىڭ قازىرگى جانە بولاشاق مادەنيەتىن دامىتۋ ۇردىستەرىن قالىپتاستىراتىن عىلىمي, شىعارماشىلىق جانە اعارتۋشىلىق قىزمەت ورتالىقتارى رەتىندە جۇمىس ىستەيتىنىن حابارلادى.
جيىنعا جۇرگەنوۆ اتىنداعى قازاق ۇلتتىق ونەر اكادەمياسىنىڭ رەكتورى ازامات ساتىبالدى مەن قۇرمانعازى اتىنداعى قازاق ۇلتتىق كونسەرۆاتورياسىنىڭ رەكتورى ارمان جۇدەباەۆ قاتىستى.
ايتا كەتسەك, جاڭا وقۋ جىلىندا مەملەكەتتىك ءبىلىم بەرۋ تاپسىرىسىن ىسكە اسىرۋعا مينيسترلىككە باعىنىستى ءبىلىم بەرۋ ۇيىمدارىنا 2 365 ءبىلىم گرانتى ءبولىندى. اتاپ ايتقاندا: باكالاۆريات ءۇشىن – 890 گرانت, ماگيستراتۋرا ءۇشىن – 152 گرانت, دوكتورانتۋرا ءۇشىن – 23 گرانت, جوعارى وقۋ ورىندارى جانىنداعى كوللەدجدەرگە – 200 گرانت, كوللەدجدەرگە – 300 گرانت. سونىمەن قاتار حالىقارالىق تۋريزم جانە قوناقجايلىلىق ۋنيۆەرسيتەتىنىڭ باكالاۆرياتىنا 800 ورىن بولىنگەن.
