مينيستر كەزدەسۋ «حالىق ۇنىنە قۇلاق اساتىن مەملەكەت» تۇجىرىمداماسىن ىسكە اسىرۋ, ازاماتتىق قورعاۋ سالاسىنداعى وزەكتى ماسەلەلەردى جەدەل شەشۋ قاجەتتىگى اياسىندا ءوتىپ جاتقانىن اتاپ ءوتتى. ءوزىنىڭ سوزىندە يۋ.يلين: «مينيسترلىكتىڭ بولىمشەلەرى توتەنشە جاعدايلاردى جويۋعا بيىل عانا 44 مىڭنان استام رەت شىقتى. 14 مىڭنان استام ادام قۇتقارىلدى, ەكى مىڭ جەتى جۇزگە جۋىق زارداپ شەككەن ادامعا العاشقى مەديتسينالىق كومەك كورسەتىلدى. ەلىمىزدە توتەنشە جاعدايلار مەن وقيعالاردىڭ سانى ازايدى», دەدى.
كەزدەسۋ اياسىندا مينيستر باق جانە ۇكىمەتتىك ەمەس ۇيىمدار وكىلدەرىمەن دە كەزدەسىپ, ۆەدومستۆونىڭ جۇمىسى, ازاماتتىق قورعاۋ جۇيەسىن دامىتۋ پەرسپەكتيۆالارى, ونىڭ الدىندا تۇرعان مىندەتتەردى شەشۋ تۋرالى ايتىپ بەردى. ودان كەيىن مينيستر توتەنشە جاعدايلاردىڭ الدىن الۋ جانە ولاردى جويۋ سالاسىنا قاتىستى ماسەلەلەر بويىنشا جۇگىنگەن ازاماتتاردى جەكە قابىلداپ, ولاردى تولعاندىرعان ماسەلەلەرگە جاۋاپ بەردى. كەيبىر ماسەلە بويىنشا ءتيىستى كومەكشىلەرىنە ناقتى تاپسىرمالار بەردى.
سولتۇستىك قازاقستان وبلىسى تج دەپارتامەنتى بولىمشەلەرىنىڭ جەكە قۇرامىمەن كەزدەسۋ بارىسىندا يۋري يلين مينيسترلىك قىزمەتىنىڭ نەگىزگى باعىتتارىن ءتۇسىندىردى, بەيىندى بولىمشەلەر باسشىلارىنىڭ جۇرگىزىلگەن جۇمىسى تۋرالى ەسەپتەرىن تىڭدادى, ەرەكشە كوزگە تۇسكەن قىزمەتكەرلەرگە, توتەنشە جاعدايلاردىڭ الدىن الۋ جانە ولاردى جويۋ ىسىنە ۇلەس قوسقان ازاماتتارعا ۆەدومستۆولىق ناگرادالار مەن العىس حاتتار تابىس ەتتى.
سونداي-اق ول وبلىس ورتالىعىنا جاقىن جەردە سالىنىپ جاتقان جەدەل قۇتقارۋ جاساعىنىڭ كەشەنىنە, «بەرەكە» شاعىن اۋدانىنداعى ءورت ءسوندىرۋ دەپوسى كەشەنىنىڭ قۇرىلىسىنا بارىپ, ىستەلگەن جۇمىستارمەن تانىستى. پەتروپاۆل قالاسىنىڭ №3 ءورت ءسوندىرۋ بولىمىندە ءورتتى جويۋعا جانە اۆاريالىق-قۇتقارۋ جۇمىستارىن جۇرگىزۋگە ارنالعان ءورت سوندىرۋشىلەر مەن قۇتقارۋشىلاردىڭ تەحنيكاسى مەن جابدىقتارىن كوزىمەن كوردى. وسى بولىمشەنىڭ اۋماعىندا قىزمەتتىك بورىشىن ورىنداۋ كەزىندە قازا تاپقان ازاماتتىق قورعاۋ ورگاندارى قىزمەتكەرلەرىن ءبىر مينۋت ۇنسىزدىكپەن ەسكە الۋ, ولاردىڭ مەموريالىنا گۇل شوقتارىن قويۋ ءراسىمى ءوتتى.
يۋري يلين ءوزىنىڭ سوزىندە ولاردىڭ ەسىمدەرى مەن تاعدىرلارى تجم تاريحىنا ماڭگى جازىلاتىنىن ايتتى. «وسىدان تۋرا ءبىر جىل بۇرىن جامبىل وبلىسىنداعى بايزاق اۋدانىندا ءورت ءسوندىرۋ كەزىندە 10 ءورت ءسوندىرۋشى قازا بولدى. ءبىز ولاردىڭ ەسىمدەرىن ەشقاشان ۇمىتپايمىز. جالپى, ەلىمىز تاۋەلسىزدىگىن العان جىلداردا 50-دەن ارتىق قۇتقارۋشىلارىمىز ەلدىڭ اماندىعى جولىندا كوز جۇمدى. ولار وزدەرىنىڭ انتىنان تايماي, ءتىلسىز جاۋمەن كۇرەستە ەرلىك پەن قاھارماندىقتىڭ ۇلگىلەرىن كورسەتىپ كەتتى. سونىڭ ىشىندە, ارامىزدا تۇرعان, قۇرمەتتى جانار ءابدىراحمانوۆانىڭ كۇيەۋى التىنبەك ءابدىراحمانوۆ تا بولدى. ءبىز التىنبەكتىڭ ەرلىگىن ۇمىتپاي, ارقاشان ءوزىمىزدىڭ قىزمەتكەرلەرىمىزگە ۇلگى ەتەمىز. ءسىزدىڭ قايعىڭىزعا ورتاقپىز», دەدى ول.
وسىدان كەيىن مينيستر وبلىستىق توتەنشە جاعدايلار جونىندەگى دەپارتامەنتكە بارىپ, اۋماقتىق بولىمشەنىڭ كۇندەلىكتى جۇمىستارىمەن تانىسىپ, كەزەكشىلىكتەگى ديسپەتچەرلەرمەن اڭگىمەلەستى.
سولتۇستىك قازاقستان وبلىسى
