ءدال وسى كۇنى كوكشەنىڭ كۇزگى اسپانى دا جادىراپ, شۋاق قۇيىپ تۇر ەدى. ورتالىقتاعى مادەنيەت سارايىنا اتا زاڭ كۇنىمەن رۋحتانعان, جارقىن ءجۇزدى جۇرتشىلىق كوپ جينالدى. ءبىرىن-ءبىرى اتا زاڭ كۇنىمەن قۇتتىقتاپ, مارە-سارە. مادەنيەت سارايىنىڭ كىرەبەرىسىنە تاقىرىپتىق كورمە ۇيىمداستىرىلىپتى. اتا زاڭنىڭ نەگىزىندە جۇزەگە اسىرىلىپ جاتقان سان شارۋا قامتىلعان.
ءماندى مەرەكەلىك ءىس-شارا تاۋەلسىز ەلىمىزدىڭ تىڭداعان جاننىڭ بويىنا ماقتانىش سەزىمىن سىيلاپ, ولشەۋسىز كۇش-قۋات قۇياتىن انۇرانمەن اشىلدى. وبلىس اكىمى ەرمەك مارجىقپاەۆ قاۋىمدى كونستيتۋتسيا كۇنىمەن قۇتتىقتاي كەلە, ىزگى تىلەگىن جولدادى. ول ءوز سوزىندە قازاقستان حالقى ءداستۇر ساباقتاستىعىن جالعاستىرعان, ءوزىن ەركىندىك پەن تەڭدىك جانە تاتۋلىق مۇراتتارىنا بەرىلگەن بەيبىتشىل ازاماتتىق قوعام رەتىندە تانىتىپ وتىرعاندىعىنا توقتالدى.
بۇگىندە قازاقستان پوستكەڭەستىك كەڭىستىكتەگى مەملەكەتتەردىڭ اراسىندا كوشباسشى ەلدەردىڭ ءبىرى بولىپ تابىلادى. العا ۇمتىلعان ازات ەلدىڭ قول جەتكىزگەن تولايىم تابىستارىنا اقمولالىقتار دا زور ۇلەس قوسۋدا. مەملەكەتتىك قولداۋدىڭ ارقاسىندا ءوڭىردىڭ ىشكى جالپى ءونىم كولەمى قارقىندى دامۋدا. وسى ارادا ءبىر عانا مىسال كەلتىرە كەتەلىك, 2020 جىلى ونەركاسىپ ءوندىرىسىنىڭ كولەمى 1 تريلليون تەڭگەنى قۇراسا, ۇستىمىزدەگى جىلى بۇل كورسەتكىش 1 تريلليون 300 ميلليارد تەڭگە كولەمىندە بولادى دەپ مەجەلەنۋدە. استىقتى ءوڭىر ءاربىر ەكىنشى كومبايندى, ءاربىر ەكىنشى تراكتوردى, قۇس ەتىنىڭ ۇشتەن ءبىرىن وندىرەدى. بۇگىنگى تاڭدا وبلىس جارتىلاي وڭدەلگەن التىن ءوندىرىسى بويىنشا ەلىمىزدىڭ الدىڭعى قاتارىنا شىعىپ وتىر. ءسال تاراتىپ ايتاتىن بولساق, التىننىڭ ءاربىر ءۇشىنشى تونناسى, پوليپروپيلەن مەن پوليەتيلەننەن جاسالعان بارلىق بۋىپ-ءتۇيىپ زاتتارىنىڭ بەسىنشى بولىگى, ءاربىر ونىنشى كىرپىش ءبىزدىڭ وڭىردە دايىندالادى.
وبلىستا ءتورت ءىرى التىن ءوندىرۋ كومپانياسى, ەكى ۋران ءوندىرۋ جانە قايتا وڭدەۋ كاسىپورنى ورنالاسقان. تامىلجىعان تابيعاتى تامام ەلگە بەلگىلى, تۋريستىك بيزنەستى ايرىقشا قارقىنمەن دامىتۋعا ارنالعان ششۋچينسك-بۋراباي كۋرورتتى ايماعىنىڭ اجارى جىل وتكەن سايىن جاقسارىپ كەلەدى. يندۋستريالاندىرۋ كارتاسىن ىسكە اسىرۋ اياسىندا سوڭعى 12 جىلدىڭ ىشىندە وبلىستا 440 ميلليارد تەڭگەدەن استام سومانى قۇرايتىن 113 جوبا جۇزەگە اسىپ وتىر. وتكەن جىلى قارجىلاندىرۋدىڭ بارلىق كوزدەرى ەسەبىنەن 700 مىڭ شارشى مەترگە جۋىق تۇرعىن ءۇي سالۋ كوزدەلگەن. تىلگە تيەك ەتىپ وتىرعان بۇل كورسەتكىشتەر وڭىردەگى جارقىن جەتىستىكتەردىڭ ءبىر پاراسى عانا.
سالتاناتتى جيىن بارىسىندا وبلىستىڭ الەۋمەتتىك-ەكونوميكالىق سالاسىن دامىتۋعا زور ۇلەس قوسىپ, وزدەرىنىڭ اق ادال ەڭبەگىمەن وزگەگە ۇلگى-ونەگە بولىپ جۇرگەن وزاتتار العىسحاتپەن ماراپاتتالدى. «مەرەيلى وتباسى» جالپىۇلتتىق بايقاۋىنىڭ وبلىستىق كەزەڭىنىڭ جەڭىمپازدارى ساناتىنداعى 7 وتباسىنا 500 مىڭ تەڭگەگە دەيىن سىيلىق تابىس ەتىلدى. باس جۇلدەگە اقكول اۋدانىندا تۇراتىن بوجەن قۇرمەتبەكتىڭ وتباسى لايىق دەپ تانىلدى.
مەرەيلى مەرەكە سوڭى وبلىستاعى شىعارماشىلىق ۇجىمداردىڭ كونتسەرتىنە ۇلاستى.
اقمولا وبلىسى
