سپورت • 29 تامىز, 2022

ۇزدىكتەر تىزىمىنەن ءوز ورەندەرىمىزدى كورگىمىز كەلەدى

233 رەت
كورسەتىلدى
3 مين
وقۋ ءۇشىن

ارالاس جەكپە-جەكتەن الەمدەگى ەڭ بەلدى پروموۋشەن – UFC وزدەرىنىڭ ەڭ ۇزدىك سپورتشىلارىنىڭ جاڭارتىلعان رەيتينگىن جاريا ەتتى. بۇل جەردە ەشكىمنىڭ سالماق دارەجەسى ەسكەرىلگەن جوق. وكىنىشكە قاراي, ولاردىڭ تىزىمىندە, ازىرشە دەيىك, قازاق ەلىنىڭ وكىلدەرى بايقالار ەمەس.

ۇزدىكتەر تىزىمىنەن ءوز ورەندەرىمىزدى كورگىمىز كەلەدى

كوش باسىنا جارتىلاي جەڭىل سالماقتىڭ چەمپيونى الەكساندر ۆولكانوۆسكي كوتەرىلدى. كەلەسى ايدىڭ اياعىندا 34 جاسقا تولعالى وتىرعان اۋستراليالىقتىڭ وسى سپورت ءتۇرىن سەرىك ەتكەنىنە 10 جىلدان استى. ونىڭ الدىندا ۆول­كانوۆسكي گرەك-ريم كۇرەسى جانە رەگبيمەن شۇعىلدانعان. 2013 جىلدىڭ مامىر ايىندا ول مەل­بۋرندە ءوزىنىڭ وتانداسى كوري نەل­سوننان ۇتىلىپ قالعان بولاتىن. سودان كەيىن بىردە-ءبىر رەت جە­ڭى­لىستىڭ كەرمەك ءدامىن تاتقان ەمەس.

الەكساندر بارلىعى 25 كەزدەسۋدە جەڭىسكە جەتىپ, 15 قار­سىلاسىن ايقىن باسىمدىقپەن ۇتتى. 2016 جىلدان بەرى UFC-دە كۇش سىناسىپ ءجۇر. ارادا ءۇش جىل وتكەن سوڭ لاس-ۆەگاستا جەرگىلىكتى فايتەر ماكس حەل­لوۋەيدى ۇپاي سانىمەن ۇتىپ, چەمپيوندىق بەلبەۋدى يە­لەندى. سودان كەيىن تاعى بەس رەت ءوز اتا­عىن ءساتتى قورعادى. جا­سىل قۇر­لىقتىڭ وكىلى ءار جىلدارى شەين يانگ, ميدزۋتو حيروتو, دار­­رەن ەلكينس, چەد مەندەس, جو­زە الدۋ, برايان ورتەگا, چون چحان سون سىندى ساڭلاقتاردى سان سوق­تىر­دى. ال اتاقتى حەللوۋەيدىڭ وزى­نەن ۆولكانوۆسكي ءۇش مارتە باسىم ءتۇستى.

اتاعى جەر جارعان يسراەل ادە­سانيا مەن چارلز وليۆەيرا ۇزدىك ۇشتىكتىڭ ساناتىندا. 33 جاس­تاعى يسراەل 1989 جىلى ني­گەريادا دۇنيەگە كەلىپ, كەيىننەن جاڭا زەلان­ديا­عا قونىس اۋداردى. ول دا ءدال الەك­ساندر ۆولكانوۆسكي سەكىلدى ءوزى­نىڭ سپورتتىق كارەرا­سىندا ءبىر رەت قانا جەڭىلدى. بىلتىر كوكتەمدە ادەسانيا جار­تىلاي اۋىر سالماققا اۋى­سامىن دەپ, پول­شالىق يان بلاحوۆيچكە ۇپاي سانىمەن ەسە جىبەردى. وزگە 23 جەكپە-جەگىن تەگىستەي ۇتىپ, 15 قارسىلاسىن نو­­كاۋتقا جىبەردى. قازىرگى كەزدە ول – ورتا سالماقتىڭ چەمپيو­نى. ارالدىق فايتەردەن تاياق جەگەندەر اراسىندا اندەرسون سيلۆا, كەلۆين گاستەلۋم, روبەرت ۋيتتاكەر, يوەل رومەرو, پاۋلۋ كوس­تا, مار­­ۆين ۆەتتوري جانە دجارەد كان­نونە سىندى الەمگە اي­گىلى سپورتشىلار بار.

جارتىلاي ورتا سالماقتا كۇش سىناسىپ جۇرگەن 32 جاستاعى چارلز وليۆەيرانىڭ ارالاس جەكپە-جەككە مىقتاپ دەن قويعانىنا 15 جىلعا جۋىقتادى. بارلىعى 42 رەت وك­تاگونعا شىققان ول 33 مار­تە جەڭىس تويىن تويلاپ, 30 قارسىلاسىن ەسىنەن تاندىردى. ول دجيۋ-دجيتسۋدىڭ حاس شەبەرى. قارسىلاستارىنىڭ دەنىن چارلز قىلقىندىرىپ تاستاعانىن سان مارتە كوزىمىز كوردى. بۇل جىگىتتەن ويسىراي ۇتىلعاندار اراسىندا دونالد سەررونە, نيك لەنتس, ەنتوني پەتتيس, دجيم ميللەر, كە­ۆين لي, توني فەرگيۋسون, مايكل چەندلەر, داستين پورە, دجاستين گەتجي جانە تاعى باس­قالار بار.

ال ۇزدىكتەر تىزىمىندەگى ودان كەيىنگى ورىنداردى كامارۋ ۋس­مان (اقش), فرەنسيس نگاننۋ (فران­تسيا), لەون ەدۆارس ( ۇلى­بريتانيا), الدجامەين ستەرلينگ (اقش), داستين پورە (اقش), دەيۆەسون فيگەرەدو (برازيليا) جانە يرجي پروحازكا (چەحيا) يەلەندى.

سوڭعى جاڭالىقتار