ماقالا گازەتتە جارىق كورگەن سوڭ باسقارما وكىلدەرى بىردەن حابارلاسىپ, اتالعان ماسەلە بويىنشا شارالاردى قولعا الىپ جاتقاندارىن ءمالىم ەتتى. حاتتىڭ ءماتىنىن تولىق جاريالاۋدى قۇپ كوردىك.
«قازىرگى ۋاقىتتا «مايكۋبەن-ۆەست» اق-دان وزدىگىنەن الىپ كەتۋ ارقىلى ساتىپ الىناتىن كومىر باعاسى ققس-مەن قوسا ەسەپتەگەندە 7 500 تەڭگەنى, «گامما سارىكول» جشس-نان (ققس-مەن) 5 500 تەڭگەنى قۇرايدى. بۇل باعالار ءۇش جىل بويى وزگەرگەن جوق جانە الداعى جىلىتۋ ماۋسىمىنىڭ سوڭىنا دەيىن ارەكەت ەتەتىن بولادى. سونىمەن قاتار وبلىستىڭ ەنەرگەتيكا جانە تكش باسقارماسى «مايكۋبەن-ۆەست» اق جانە «گامما سارىكول» جشس باسشىلىعىنا باياناۋىل اۋدانىنىڭ تۇرعىندارى ءۇشىن كومىر باعاسىن تومەندەتۋ مۇمكىندىگىن قاراۋ تۋرالى حاتتار جولدادى. قازىرگى ۋاقىتتا بۇل حاتتار قاراستىرىلۋدا» دەلىنگەن حاتتا.
باياناۋىلدىق جۇرتتى جىلدار بويى الاڭداتقان ماسەلەگە جەرگىلىكتى بيلىكتىڭ نازارى اۋىپ, كومىر كەنىشتەرىن يەلەنىپ العان ينۆەستورلارعا حالىق تالابىن جەتكىزىپ جاتقانى قۋانتارلىق جاعداي دەپ باعالايمىز. كوپتىڭ كوكەيىندە جۇرگەن تىلەككە كەنىشتەردىڭ قۇرىلتايشىلارى دا ءۇن قاتادى دەپ ۇمىتتەنەمىز. تۇرعىندار بۇل ماسەلەگە ءوڭىر باسشىسى ابىلقايىر سقاقوۆ ارالاسىپ, وڭىردە ءتيىستى شارالار قولعا الىنادى, ەل كوڭىلىنەن شىعاتىن شەشىم قابىلدانادى دەپ سەنەدى.
پاۆلودار وبلىسى
