قازاقستان باسشىسى باكۋگە شاقىرعانى جانە كورسەتىلگەن قوناقجايلىلىق ءۇشىن ازەربايجان باسشىسىنا ريزاشىلىعىن ءبىلدىردى. ق.توقاەۆ شاعىن قۇرامدا وتكەن كەزدەسۋ بارىسىندا مەملەكەتتەر اراسىنداعى ىنتىماقتاستىقتىڭ ءارتۇرلى سالالارىنداعى ءوزارا ءىس-قيمىلىنىڭ بارلىق ماسەلەلەرى بويىنشا جان-جاقتى پىكىر الماسۋ بولعانىن اتاپ ءوتتى. ول سونداي-اق گۋمانيتارلىق ىنتىماقتاستىقتى دامىتۋدىڭ قولايلى پەرسپەكتيۆالارىنا نازار اۋداردى.
ءوز كەزەگىندە ازەربايجان پرەزيدەنتى ارىپتەسىنە شاقىرۋدى قابىل العانى ءۇشىن العىس ايتتى. سونىمەن قاتار ازەربايجان پرەزيدەنتى جاقىندا سۋمگايت قالاسىنىڭ ورتالىق كوشەلەرىنىڭ بىرىنە قازاق حالقىنىڭ كورنەكتى ۇلى, اعارتۋشى, تۇركىتانۋشى احمەت بايتۇرسىن ۇلىنىڭ ەسىمى بەرىلگەنىن ەسكە سالدى. ول باۋىرلاس ەكى ەل اراسىنداعى قارىم-قاتىناستاردىڭ تابىستى دامۋىنا سەنىم ءبىلدىردى. قازاقستان پرەزيدەنتىنىڭ تاپسىرماسىمەن ازەربايجاننىڭ فيزۋلي قالاسىندا قۇرمانعازى اتىنداعى بالالارعا ارنالعان شىعارماشىلىقتى دامىتۋ ورتالىعى سالىنادى.
