مۇنداي جامان ادەتتەن الماتى وبلىسىنىڭ جاس تۇرعىندارى دا ادا ەمەس ەكەن. دەرەككە جۇگىنسەك, جىل باسىنان بەرى كامەلەتكە تولماعانداردىڭ قاتىسۋمەن جاسالعان قىلمىس سانى 64-كە جەتىپتى. بىلتىر مۇنداي 46 وقيعا تىركەلگەن ەكەن. ياعني تارتىپسىزدىك پەن تەنتەكتىك ۇلەسى ارتقان. وسى قىلمىستارعا تالداۋ جاساعان قۇقىق قورعاۋشىلار بيىل قاراساي اۋدانىندا ءتارتىپ بۇزۋ دەرەگى كوبەيگەنىن ايتادى, وتكەن التى ايدا 29 وقيعا تىركەلگەن. ال جامبىلدا – 13 وقيعا, تالعار اۋدانىندا – 9 جاعداي جانە ەڭبەكشىقازاق اۋدانىندا 8 دەرەك انىقتالىپتى.
تاعى ءبىر قارالى حاباردى دا جاسىرىپ قالۋعا بولماس. ايماقتا وتكەن التى ايدا 7 بالا ءوز-وزىنە قول جۇمساپ, ومىرمەن قوشتاسقان كورىنەدى. قىرشىننان قيىلعان جەتى جاس عۇمىردىڭ ەكەۋى ەڭبەكشىقازاق اۋدانىندا, ەكەۋى ۇيعىر اۋدانىندا تۇرعان بولسا, جامبىل, ىلە جانە قاراساي اۋداندارىندا ءبىر-ءبىر وقيعادان تىركەلگەن ەكەن. ال وزىنە قول سالۋعا وقتالعان 11 بالا قۇتقارىلىپتى.
وكىنىشكە قاراي, جول اپاتىنان زارداپ شەككەن بالا سانى دا ارتىپ وتىر. جىل باسىنان بەرى جاسوسپىرىمدەردىڭ قاتىسۋىمەن 207 جول اپاتى بولىپ,
9 بالا قازا بولعان. تاعى 300 بالا ءارتۇرلى دەنە جاراقاتىن الدى.
– بالالار جولدا ءجۇرۋ ەرەجەسىن ءسىز بەن بىزدەن ۇيرەنەدى. بالالار ۇلكەندەردىڭ ءجۇرىس-تۇرىسىنىڭ جاقسى جاعىن دا, جامان جاعىن دا قابىلدايدى. كوپ جاعدايدا بالالار جولدا جاراقات الىپ, ءتۇرلى جاعدايعا ۇشىراپ جاتاتىنى كولىك جۇرگىزۋشىلەرىنىڭ عانا كىناسىنەن ەمەس, ول كوبىنەسە بالالاردىڭ جول ءجۇرۋ ەرەجەسىن بىلمەگەندىگىنەن دە بولادى. بالالارعا جولدا ءجۇرۋ ەرەجەلەرىن ۇيرەتىپ, ۇنەمى وعان ۇلگى كورسەتىپ جانە ءجۇرىس-تۇرىسىن قاداعالاپ, بالالاردى كوشەدە بولاتىن قاۋىپتى جاعدايلاردان ساقتاندىرۋ ءاربىر اتا-انانىڭ مىندەتى, – دەيدى الماتى وبلىستىق اكىمشىلىك پوليتسيا باسقارماسىنىڭ باستىعى نۇرلان ىسقاقوۆ.
الماتى وبلىسى
