كورمە ەكسپوزيتسياسىنا اۆتوردىڭ 2005-2014 جىلدار ارالىعىندا سالعان 30-دان استام گرافيكالىق تۋىندىسى ەنگەن. اتاۋى ايتىپ تۇرعانداي, كورمە ۋ.شەكسپيردىڭ وتانى – انگلياعا ارنالعان. تۋىندىگەر اتاعى الەم تاريحىنان ورىن العان ايگىلى مەكەندە پلەنەردە جۇمىس ىستەي ءجۇرىپ, لوندون پەيزاجدارىنىڭ وزىندىك ەرەكشەلىگىن نازىك يىرىممەن جەتكىزە بىلگەن. مۇقاتوۆ زاماناۋي قالانىڭ كۇندەلىكتى ءومىرىنىڭ كوپقىرلى سيپاتىن, وندا تۇراتىن ادامداردىڭ بەت-بەينەسىن, ولاردىڭ تۇرمىس-تىرشىلىگىن ءدال بەدەرلەۋگە كۇش سالعان.
كۇندەلىكتى ءومىر شىندىعىن قاراپايىم, دەموكراتيالىق موتيۆتەرمەن دالەلدەي وتىرىپ, ول «ۆاتەرلوو كوپىرىندەگى جەلدى كۇن», «ەۋستون كوشەسىندەگى جاڭبىر», «سوحو الاڭىنداعى قىزىل ءۇي» اكۆارەلدەرىندە سۋرەتتىڭ شىنايى سەنىمدىلىگىنە قول جەتكىزەدى. اۆتور «كەشكى تەمزا جاعاسىندا», «قىزىل اۆتوبۋستى كوشە» كارتينالارىندا ەستەتيكالىق تۇرعىدان شىنايى, زاماناۋي ءومىردى ءوزىنىڭ تابيعيلىعىمەن, بارلىق بايلىعى مەن تۇستەرىنىڭ جارقىراۋىمەن كورسەتەدى. كوز الدىنداعى الەمدى وزىنە ءتان تۇراقتى قۇبىلمالىلىعىمەن سيپاتتاي وتىرىپ, ادام مەن ونىڭ قورشاعان ورتاسىنىڭ بىرلىگىن قايتا جاسايدى. اسىرەسە كەزدەيسوق كوزگە تۇسكەن ءومىردىڭ ۇزدىكسىز اعىمىنىڭ وتپەلى ساتىنە نازار اۋدارادى.
«ت.مۇقاتوۆ «جاۋىن الدىندا», «كوگالدا», «ورمانداعى الاڭقاي», «باقتا» پەيزاجدارىندا جەكەلەگەن بولشەكتەرگە بوي الدىرماي, كورىلگەن نارسەنىڭ قايتالانباس سيپاتىن «ساقتاپ قالۋعا» مۇمكىندىك بەرەتىن «العاشقى اسەردىڭ» ايقىندىعىن, كۇشى مەن جاڭالىعىن ساقتاۋعا تىرىسادى», دەيدى كورمە جەتەكشىسى ەركەجان وماروۆا.
تابىلدى مۇقاتوۆ كوپشىلىك قاۋىمعا كىتاپ يلليۋستراتورى رەتىندە دە جاقسى تانىس. ول بەزەندىرگەن ەڭبەكتەر قازاق اقىن-جازۋشىلارىنىڭ شىعارمالارىنداعى بىرقاتار ۇلتتىق بەينەنى جاساۋعا سەپتىگىن تيگىزدى. م.اۋەزوۆ, ءى.جانسۇگىروۆ, س.ءجۇنىسوۆ سياقتى بەلگىلى جازۋشىلاردىڭ جيناقتارىن رەسىمدەۋمەن اينالىسقان شەبەر كىتاپتاردىڭ ەستەتيكالىق ءھام كوركەمدىك قۋاتىن ارتتىرۋعا زور ۇلەس قوستى. ماحامبەت وتەمىس ۇلىنىڭ 200 جىلدىعىنا وراي جارىق كورگەن اقىن ولەڭدەرىنىڭ بىرەگەي باسىلىمى 2003 جىلى يۋنەسكو-نىڭ التىن مەدالىنە يە بولدى. قازاق پەرزەنتىنىڭ قولتاڭباسى بولگاريا, دانيا, گەرمانيا, انگليا, فرانتسيا ەلدەرىندەگى كوركەم كوللەكتسيالاردا جارقىراپ تۇر. سۇلۋ ونەردەن قول ۇزبەگەن سۋرەتشى قازىر الماتىدا تۇرادى.
الماتى
