بيىل قازاقستان مەن ازەربايجان اراسىندا جاڭا ساراپشىلار كەڭەسى قۇرىلدى. سونداي-اق ەكى ەلدىڭ ديپلوماتيالىق قاتىناستارىنىڭ ورناعانىنا دا 30 جىل تولىپ وتىر. «تاۋەلسىزدىك جىلدارىندا نۇر-سۇلتان مەن باكۋ اراسىنداعى ىنتىماقتاستىق ستراتەگيالىق وداقتاستىقتىڭ جاڭا دەڭگەيىنە كوتەرىلدى», دەدى ساراپشىلار كەڭەس وتىرىسىندا.
ازەربايجان – قازاقستان ءۇشىن سەنىمدى وداقتاس, وڭتۇستىك كاۆكاز وڭىرىندەگى ستراتەگيالىق ماڭىزدى سەرىكتەس. ازەربايجان ارقىلى ەلىمىز تۇركياعا, ودان ءارى ەۋرووداققا جانە تاياۋ شىعىسقا تىكەلەي شىعا الادى. بۇگىندە قازاقستاندا ازەربايجان كاپيتالى بار 500-دەن استام كومپانيا تىركەلگەن. ال ازەربايجاندا قازاقستاندىق كاپيتالى بار 145-كە جۋىق مەكەمە جۇمىس ىستەيدى. وتكەن جىلى ەكى ەل اراسىنداعى تاۋار اينالىمى 332,2 ملن دوللاردى قۇرادى.
الايدا ساراپشىلاردىڭ ايتۋىنشا, ەكى ەل اۋىل شارۋاشىلىعى سالالارىندا ءوزارا مۇددەلەرى مەن مۇمكىندىكتەرى بار ەكەنىنە قاراماستان مۇناي-گاز, ونەركاسىپتىك كووپەراتسيا, كولىك جانە لوگيستيكا, «جاسىل ەنەرگەتيكانى» دامىتۋدا ءوز الەۋەتىن تولىق ىسكە اسىرا المادى. «قازىرگى گەوساياسي جاعداي كەرىسىنشە بىزگە نەعۇرلىم تىعىز ساۋدا-ەكونوميكالىق كووپەراتسيانىڭ قاجەتتىگىن كورسەتىپ وتىر. الەمدىك داعدارىس جاعدايىندا ىنتىماقتاستىقتىڭ ماڭىزدى مۇمكىندىكتەرىن كەيىنگە قالدىرۋعا بولمايدى. وسى ۋاقىتتا بىزگە پىكىر الماسۋ جانە ساراپتامالىق دەڭگەيدەگى تۇراقتى بايلانىستار وتە ماڭىزدى جانە پايدالى. ءبىزدىڭ مىندەتىمىز – قازاقستان-ازەربايجان ساراپشىلار كەڭەسى اياسىندا ەلدەرىمىزدىڭ باسشىلىعىنا ءىس جۇزىندە ناتيجە بەرەتىن ۇسىنىستار ازىرلەۋ», دەدى پرەزيدەنت جانىنداعى قازاقستان ستراتەگيالىق زەرتتەۋلەر ينستيتۋتىنىڭ ديرەكتورى ەركىن تۇقىموۆ.
ازەربايجاننىڭ حالىقارالىق قاتىناستاردى تالداۋ ورتالىعىنىڭ باسقارما توراعاسى فاريد شافيەۆ نۇر-سۇلتان مەن باكۋ ەكىجاقتى ىنتىماقتاستىقتى ودان ءارى دامىتۋ ءۇشىن ۇلكەن الەۋەتكە يە ەكەنىن ايتتى. «ورتا ءدالىزدى دامىتۋدىڭ ماڭىزدىلىعىن اتاپ وتكىم كەلەدى. گەوساياسي جاعداي تاۋار اينالىمىن ارتتىرۋعا مۇمكىندىك بەرەدى. قازاقستان مەن ازەربايجان كولىكتىك حاب رەتىندە الەۋەتىن كۇشەيتۋى كەرەك. قازىردىڭ وزىندە ءارتۇرلى بيۋروكراتيالىق پروتسەدۋرالاردى جەڭىلدەتۋ بويىنشا شارالار قابىلدانۋدا. كولىك بايلانىستارى تۋرالى ايتا وتىرىپ, ءبىز تەك ناقتى ءبىر سالاعا قۇرىلعان كەلىسىمدەردى عانا ەمەس, سونىمەن قاتار كەڭ ماعىناداعى بايلانىستاردى, سونىڭ ىشىندە تالشىقتى-وپتيكالىق, ەنەرگەتيكالىق رەسۋرستاردى تاسىمالداۋ سەكىلدى سالالاردى دامىتۋدى نازارعا الامىز», دەدى ف.شافيەۆ.
ال ءماجىلىس دەپۋتاتى ايدوس سارىم ناقتى ىنتىماقتاستىقتى دامىتۋدىڭ وزەكتى تۇستارىن ەرتەرەك قولعا الىپ, زاڭنامالىق تۇرعىدان بەكىتۋ قاجەت دەپ سانايدى. «شىنايىلىق ەكى ەلدىڭ زاڭ شىعارۋشىلارىنان مۇلدە جاڭا قارقىندى, بەلسەندىلىك پەن بولجامدى سيپاتتاعى جاڭا جۇمىس ءستيلىن تالاپ ەتەدى. پارلامەنتتەر ءبىر جاعىنان, جاڭا ينفراقۇرىلىم سالۋ, جاڭا كولىك دالىزدەرىن قۇرۋ جوبالارىن جەدەل قاراستىرۋعا جانە راتيفيكاتسيالاۋعا, ەكىنشى جاعىنان, قابىلدانعان كەلىسىمدەردىڭ ءتيىمدى ورىندالۋىنا قوعامدىق-پارلامەنتتىك باقىلاۋدى جۇزەگە اسىرۋعا دايىن بولۋى كەرەك», دەدى ول.
ءوز كەزەگىندە Talap قولدانبالى زەرتتەۋلەر ورتالىعىنىڭ ديرەكتورى راحىم وشاقباەۆ ەكى ەل اراسىنداعى ءوزارا ءىس-قيمىل فورماتىن كەڭەيتۋدى ۇسىندى. «ازەربايجان مەن قازاقستان ەڭ ۇلكەن ينۆەستيتسيالىق الەۋەتى بار ەلدەر رەتىندە ەكىجاقتى ىنتىماقتاستىق شەڭبەرىنەن شىعىپ, ايماقتا تاندەمدىك كوشباسشىلىق ۇلگىسىن قۇرا الادى. مەن سونداي-اق جاڭا تەحنولوگيالىق قۇرىلىمدار مەن تسيفرلىق ەكوجۇيەلەردىڭ ماڭىزدىلىعىن اتاپ وتكىم كەلەدى. وسى تۇرعىدا احقو ازەربايجاندىق كومپانيالارعا ەكوجۇيەنى پايدالانۋ تۋرالى ۇسىنىس جاساي الادى. ءبىزدىڭ ۆەنچۋرلىق كومپانيالار ءۇشىن ازەربايجاندىق ستارتاپتاردىڭ تاجىريبەسىن زەرتتەۋ قىزىقتى بولار ەدى», دەگەن پىكىرىن ءبىلدىردى ر.وشاقباەۆ.
كەڭەستە ءبىلىم بەرۋ ماسەلەسى دە ءسوز بولدى. ازەربايجان ديپلوماتيالىق اكادەمياسىنىڭ پرورەكتورى فاريز يسمايلزادە ەكى ەل اراسىنداعى ءبىلىم بەرۋ سالاسىنداعى ىنتىماقتاستىقتىڭ كەلەشەگىنە, سونىڭ ىشىندە قوس ديپلومدىق ءبىلىم بەرۋ باعدارلامالارىن ازىرلەۋ, عالىمدار مەن زەرتتەۋشىلەردىڭ قىسقا مەرزىمدى ساپارلارىن ۇيىمداستىرۋ, سونداي-اق عىلىمي ەڭبەكتەردى بىرلەسىپ باسىپ شىعارۋدىڭ جولدارىنا توقتالدى. ازەربايجاننىڭ ميللي مەدجليس دەپۋتاتى ەلشاد ميرباشيروعلۋ ەكى ەل اراسىنداعى ىنتىماقتاستىقتىڭ تابىستى بولاتىنىنا سەنىم ءبىلدىردى. سونداي-اق ءسوز العان ميللي مەدجليس دەپۋتاتى راسيم مۋسابەكوۆ ەكى ەل اراسىنداعى باۋىرلاستىق قارىم-قاتىناستا داۋلى تۇستار جوق, بۇل كەز كەلگەن سالادا تابىستى ءوزارا ءىس-قيمىل جاساۋعا مۇمكىندىك بەرەتىنىن اتاپ ءوتتى.
نەگىزى كەمە جاساۋ, مۇناي وندىرۋگە ارنالعان قۇرال-جابدىقتاردى ءوندىرۋ جانە قۇبىرلاردى تارتۋ ەكى ەل اراسىنداعى ناتيجەلى جۇزەگە اساتىن سالالار بولىپ تابىلادى. الداعى ۋاقىتتا وسى باعىتتار بويىنشا جوبالار قولعا الىنىپ, ناقتى كەلىسسوزدەر جۇرگىزىلمەك.
