بۇل جوبانى جەرگىلىكتى كاسىپكەر ارمان ساعىناەۆ ىسكە اسىرۋدى كوزدەپ وتىر. قازىر ول نان قالدىقتارىن جيناۋعا ارنالعان كونتەينەر جاساپ شىعاردى. مۇنايلى شاھارداعى نۇرسايا, اۆانگارد, ۆوكزال ماڭى اۋداندارى مەن ق.ساتباەۆ كوشەسىنە وسىنداي 50 كونتەينەردى ورناتتى. ەندى تاعى دا 200 كونتەينەردى ورناتۋدى كوزدەپ وتىر.
– ەكى كۇن سايىن كونتەينەردەن نان قالدىعىن جيناپ الامىز. ونى كەپتىرىپ, سۇرىپتاپ, ارنايى تسەحقا جىبەرەمىز. تسەحتاعى جابدىقتا نان قالدىقتارىنان ءىرى قارا مەن ۇساق مالعا ارنالعان تۇيىرشىكتەلگەن جەم دايىندالادى. جەم شارۋا قوجالىقتارى مەن باسقا دا كاسىپكەرلەرگە ساتىلادى, – دەيدى ارمان ساعىناەۆ.
كاسىپكەردىڭ بۇل جوباسىنا اتىراۋ قالالىق اكىمدىگى قولداۋ ءبىلدىرىپ وتىر. ول جوباسىن ىسكە اسىرۋ ءۇشىن بانكتەن نەسيە العان. بۇرىن قولدانىستا بولعان بوشكەلەردەن كونتەينەردى ءوزى جاساپ, جاسىل تۇسكە بوياعان. جوبانىڭ شىعىنى مەن پايداسىنا قاجەتتى جابدىقتاردىڭ باعاسىنا الدىن الا زەرتتەۋ جۇرگىزگەن.
– قىتاي ەلىنەن جەم دايىنداۋعا ارنالعان قۇرال-جابدىقتى الدىرۋعا تاپسىرىس بەردىم. وڭىردەگى جەمنىڭ باعاسىنا مونيتورينگ جۇرگىزدىم. بۇل جوبانى ىسكە اسىرۋ ارقىلى بىرنەشە ماقساتتى كوزدەدىم. بىرىنشىدەن, قالدىقتى دا كادەگە اسىرۋعا بولاتىنىنا كوز جەتكىزگىم كەلدى. اسىرەسە نان قالدىعىنىڭ قوقىس الاڭىندا جاتۋىنىڭ الدىن الۋ. ويتكەنى شاھار تۇرعىندارى نان قالدىعىن قايدا تاپسىرارىن بىلمەي, امالسىزدان قوقىسقا تاستاۋعا ءماجبۇر بولادى. ەكىنشىدەن, نان قالدىعىنان دايىندالعان جەمنىڭ باعاسى قىمبات ەمەس, – دەيدى ا.ساعىناەۆ.
اتىراۋ وبلىسى
