ەسكە سالا كەتەيىك, ء«ولىارا» تولىقمەتراجدى كوركەم ءفيلمنىڭ ءتۇسىرىلىمى 2021 جىلعى 28 قازان مەن 7 جەلتوقسان ارالىعىندا الماتى وبلىسىندا جۇرگىزىلدى. ال 2022 جىلدىڭ شىلدە ايىندا كينوكارتينانىڭ مونتاجداۋ-ارلەۋ كەزەڭى باستالعان.
فيلم ستسەناريىنىڭ اۆتورى – نۇرلان سانجار. ءفيلمنىڭ جەلىسى XX عاسىردىڭ وتىزىنشى جىلدارىنداعى ناۋبەت, قازاق حالقىن جاپپاي قىرعىنعا ۇشىراتقان اشارشىلىق قاسىرەتى باياندالادى.
ءفيلمنىڭ اتقارۋشى پروديۋسەرى جانسەرىك شونا ۇلىنىڭ ايتۋىنشا, كينو كارتينانىڭ سيۋجەتىندە «ساياسي كىناسىن» وتەۋ ءۇشىن قازاق جەرىنە جىبەرىلگەن يشتۆان مادياردىڭ كۋا بولعان ايانىشتى جاعداياتتار سۋرەتتەلەدى.
باس كەيىپكەر – يشتۆان ماديار قازاق جەرىنە كەلگەن سوڭ قارابايدىڭ جەدەل وتريادىنا ءتۇسىپ, كۋلاك مالىن ىزدەۋمەن جانە تاركىلەۋمەن اينالىسادى. سول كەزدە ءوز كوزىمەن اشارشىلىققا ۇشىراعان حالىقتىڭ ازاپتى ءومىرىن, جاسانعان جانالعىشتاي جاۋىنگەرلەردىڭ قاتىگەزدىگىن كورىپ, توڭكەرىس تۋرالى كوزقاراسىن وزگەرتەدى.
يشتۆان ماديار قازاق دالاسىنداعى جان توزگىزسىز جاعدايعا كۇيزەلىپ, اقىرىندا جەرگىلىكتى تۇرعىندارعا جاقتاسىپ, سولارمەن بىرگە قىزىل يمپەريانىڭ وزبىر ساياساتىنا قارسى كۇرەسەدى. باس كەيىپكەر نەبىر وتكەلەكتەردەن امان قالىپ, قازاق حالقىنىڭ ۇلى قاسىرەتى تۋرالى شىندىقتى جەتكىزۋگە بار كۇشىن سالادى.
فيلمگە ەكى ەلدىڭ تانىمال اكتەرلەرى قاتىسقان. باستى رولدەردە ماجار ەلىنىڭ تەاتر جانە كينو اكتەرى پيتەر بارنا, بەلگىلى قازاقستاندىق اكتەرلەر الدابەك شالباەۆ, ەرجان نۇرىمبەت جانە باسقالار ويناعان.
كارتينانىڭ ۇلكەن ەكرانعا شىعۋى 2023 جىلعا جوسپارلانىپ وتىر.
ايتا كەتەيىك, ء«ولىارا» تولىقمەتراجدى كوركەم فيلم شاكەن ايمانوۆ اتىنداعى اق «قازاقفيلم» كينوستۋدياسىندا ۇلتتىق كينونى قولداۋ مەملەكەتتىك ورتالىعىنىڭ قولداۋىمەن قازاقستان رەسپۋبليكاسى مادەنيەت جانە سپورت مينيسترلىگىنىڭ تاپسىرىسى بويىنشا تۇسىرىلگەن.
