ايماقتار • 22 تامىز، 2022

حرومتاۋدا جەل ەلەكتر ستانساسى سالىنادى

68 رەت كورسەتىلدى

حرومتاۋ قالاسىنا جاقىن، 150 گەكتار اۋماقتا 24 جەل گەنەراتورى پاركى بوي كوتەرمەكشى. 155 مەگاۆاتت ەلەكتر قۋاتىن وندىرەتىن جاسىل ەنەرگەتيكا جوباسىن ىسكە اسىرۋشى – ERG كومپانياسى.

2024 جىلى قۇرىلىسى اياقتالاتىن وسى جوباعا كاپسۋلا قالاۋ ءراسىمى ءوتىپ، وعان وبلىس اكىمى وڭداسىن ورازالين، ERG ديرەكتورلار كەڭەسىنىڭ توراعاسى الەكساندر ماشكەۆيچ پەن مۇشەلەرى – پاتوح شوديەۆ، شۋحرات يبراگيموۆ قاتىستى. «حرومتاۋ» جەل ەلەكتر ستانساسى جوباسىنا ERG كومپانياسى 110 ملرد تەڭگە كولەمىندە ينۆەستيتسيا سالدى. ستانسانىڭ قۇرىلىسى كەزىندە 300-گە تارتا جۇمىس ورنى اشىلىپ، ول ىسكە قوسىلعاننان كەيىن 30 ادام تۇراقتى جۇمىس ىستەيدى دەپ جوسپارلانىپ وتىر.

«قازاقستان پرەزيدەنتى قاسىم-جومارت توقاەۆ ەنەرگيانىڭ بالامالى، جاڭارتىلعان كوزدەرى ارقىلى ەلىمىزدە جاسىل ەكونوميكانىڭ ۇلەسىن 80 پايىزعا دەيىن جەتكىزۋدى تاپسىردى. وسى تاپسىرمانى ورىنداۋ اياسىندا وڭىرىمىزدە اۋقىمدى جۇمىستار جۇرگىزىلۋدە. حرومتاۋ اۋدا­نىندا ىسكە اسىرىلاتىن قۋاتتى جەل ەلەكتر ستانساسىنىڭ قۇرىلىسى – اقتوبە وبلىسى ءۇشىن ماڭىزدى وقيعا. ءوڭىرىمىزدىڭ الەۋمەتتىك-ەكونوميكالىق دامۋىنا ىقپال ەتەتىن ERG، «قازحروم» كومپانيالارىنىڭ قارقىندى دامىپ جاتقانىن كورۋ قۋانىشتى»، دەدى وبلىس اكىمى وڭداسىن ورازالين كاپسۋلا قالاۋ سالتاناتىندا.

كاپسۋلا قالاۋ راسىمىنەن سوڭ ERG ديرەكتورلار كەڭەسىنىڭ توراعاسى الەكساندر ماشكەۆيچ حرومتاۋدا شەتەلدىك، وتاندىق جانە جەرگىلىكتى باق وكىلدەرىمەن ءباسپاسوز ءماسليحاتىن وتكىزدى. وندا حالىقارالىق وقيعالاردىڭ كومپانيا جۇمىسىنا اسەرى، تەمىر كەنى ەكسپورتى جانە تاسىمالداۋدا ورىن العان قيىنشىلىقتار تۋرالى ايتتى. الەم ەنەرگەتيكالىق وتپەلى كەزەڭگە اياق باسقان كەزدە، ERG كومپانياسى جاسىل تەحنولوگياعا كوشۋ جوباسىن ىسكە اسىرىپ، وسى سالاعا ينۆەستيتسيا سالۋعا كوشكەنىن حابارلادى. وعان پرەزيدەنت قاسىم-جومارت توقاەۆتىڭ قازاقستاننىڭ 2060 جىلعا دەيىن كومىرتەگى بەيتاراپتىعىنا قول جەتكىزۋ تۋرالى تاپسىرماسى سەبەپ بولىپ وتىر. الەكساندر ماشكەۆيچ پرەزيدەنت تاپسىرماسىن قولدايتىنىن، وسى باعىتتا ترانسۇلتتىق ءىرى مەتاللۋرگيالىق كومپانيا ارنايى باعدارلاما ازىرلەگەنىن حابارلادى. «ERG كومپانياسى الداعى بەس جىلدا قازاقستان ەكونوميكاسىنا 7 ملرد دوللار ينۆەستيتسيا قۇيۋدى جوسپارلاپ وتىر. ءبىز، مىنە، ەڭ العاشقى بولىپ حرومتاۋدا 155 مەگاۆاتت جەل ەلەكتر ستانساسىنا قارجى قۇيدىق»، دەدى.

ءبىز ERG كومپانياسى اقتوبە وبلىسىنداعى كەننىڭ «تاريحي قالدىقتارىنان» تازارتۋ جوباسىن ناقتى قاشان قولعا الاتىنىن جانە اقتوبە قالاسىنداعى فەرروقورىتپا زاۋىتىنان اۋاعا شىعارىلاتىن لاستاۋشى زاتتاردى ازايتۋ جايىن سۇرادىق. ERG ديرەكتورلار كەڭەسىنىڭ توراعاسى: «ERG كومپانياسى 2030 جىلدىڭ سوڭىنا دەيىن قازاقستاننىڭ ەكولوگياسىن ساۋىقتىرۋ شارالارىنا 900 ملرد تەڭگە جۇمساۋدى جوسپارلاپ وتىر. بۇل كوپتەگەن اۋقىمدى ءىس-شارانى قامتيدى. سونىڭ ىشىندە اقتوبە فەرروقورىتپا زاۋىتىندا فەرروگاز قالدىقتارىنان ەلەكتر ستانساسىن قۇرۋدى دا جوسپارعا كىرگىزدىك. بۇل تاماشا جوبا ارقىلى ءوندىرىس قالدىقتارى گازىنان 55 مەگاۆاتت قۋات وندىرۋگە بولادى. الداعى بەس جىلدا قازىرگىمەن سالىستىرعاندا كاسىپورىننىڭ اۋا لاستاۋشى شىعارىندىلارىن 50 پايىزعا ازايتۋدى جوسپارلاپ وتىرمىز»، دەدى.

ERG كومپانياسى جاسىل ەنەرگەتيكاعا كوشۋ جوباسىنا دايىندىق جۇمىستارىن باستاپ كەتتى. ويتكەنى 2026 جىلدىڭ 1 قاڭ­تارىنان باستاپ ەۋرووداق، جاپونيا، اقش مەم­لەكەتتەرى كومىرسۋتەگىنە سالىق ەنگىزبەكشى. جاسىل تەحنولوگياعا كوشۋ، سايىپ كەلگەندە، شيكىزاتتىق كومپانيالار ءۇشىن قىمباتقا تۇسەتىن بولسا دا، باسقا جول جوق. سەبەبى ءتورت جىلدان كەيىن «جاسىل ءونىم» وندىرە المايتىن، ءوندىرىس بارىسىندا جاسىل ءونىمدى قولدانا المايتىن كومپانيالار حالىقارالىق نارىققا كىرە المايدى.

ا.ماشكەۆيچتىڭ حابارلاۋىنشا، ERG كومپانياسى وتاندىق نارىقتا جۇمىسىن باستاعان كەزدەن بەرى ەلىمىزدەگى قايىرىمدىلىق ءىس-شارالارىنا 1 ملرد دوللار قارجى جۇمساعان. ء«بىز ەشقاشان دا قايىرىمدىلىقتان باس تارتىپ كورگەن جوقپىز. ويتكەنى تەك باقىتتى ادام عانا جۇمىسىنا قۋانا بارىپ، جۇمىستا دا ءتيىمدى بولادى. ءبىز «قازاقستان حالقىنا» قايىرىمدىلىق قورىنا 30 ميلليارد تەڭگە قارجى اۋداردىق. ءبىزدىڭ ءىرى مەتاللۋرگيالىق كومپانيا ەڭبەك ادامىنا لايىقتى جاعداي جاساۋدى ءبىرىنشى ورىنعا قويادى. ەڭبەككەردىڭ سايلى جۇمىس كيىمى، تاماعى، جۇمىس اۋىسىمىنان شىققاندا جۋىناتىن جەرى، دەمالىپ-تىنىعاتىن ورنى دۇرىس بولۋى كەرەك. انىعى سول – جەر بەتىندە شاحتەر مەن مەتاللۋرگتەن اۋىر جۇمىس جوق. پرەزيدەنتىمىز 2060 جىلعا دەيىن قازاقستاننىڭ كومىرسۋتەگى بەيتاراپتىعىنا قول جەتكىزۋ مىندەتىن قويدى. ءبىر قاراعاندا بۇل الىس سياقتى، بىراق ءار جىلعا وسى ساياساتتى ىسكە اسىرۋعا جوسپارىمىزدى قۇردىق. ەلىمىزدە جاسىل ەنەرگەتيكانى دامىتۋ جوسپارى قولعا الىنعان سوڭ ونى ورىنداۋىمىز كەرەك»، دەدى ا. ماشكەۆيچ.

ERG كومپانياسىنا قاراستى ءدوڭ كەن بايى­تۋ كومبيناتى 40 مەگاۆاتت ەلەكتر قۋاتىن پايدالانادى. حرومتاۋداعى قاتتى جىنىستى حروم كەنىنىڭ الەمدە تەڭدەسى جوق. ERG وسى جەردە كەن وندىرەتىن ءدوڭ كەن بايىتۋ كومبيناتىنا 2 ملرد دوللار ينۆەستيتسيا سالىپ، الداعى ۋاقىتتا ءوندىرىس كولەمىن جىلىنا 7،5 ملن تونناعا جەتكىزبەكشى.

 

اقتوبە وبلىسى،

حرومتاۋ اۋدانى

سوڭعى جاڭالىقتار

ايتىپ كەلگەن اپات

ايماقتار • كەشە

«مىڭ بالا» جەڭىمپازدارى

رۋحانيات • كەشە

اقيقاتتىڭ اي ديدارى – ءباسپاسوز

ەگەمەن قازاقستان • كەشە

ىنتىماقتاستىق ىقپالى

ەكونوميكا • كەشە

جاڭا فورماتتاعى ساۋدا

ەكونوميكا • كەشە

جوتەلگە جەڭىل قاراماڭىز

مەديتسينا • كەشە

بىتىمگەرشىلىك ساردارلارى

قازاقستان • كەشە

جىپ-جىلى جۇرەك بۋىنداي

ادەبيەت • كەشە

داۋىستىڭ دا ءتۇسى بار

ادەبيەت • كەشە

ۇقساس جاڭالىقتار