بيىل قاڭتار-ماۋسىمدا قازاقستاننىڭ ەكسپورتى 56,3 پايىزعا ءوسىپ, 42,2 ملرد دوللاردى قۇراعان. «QazTrade» اق مالىمەتى بويىنشا, شيكى مۇناي ساتۋ – 84,7 پايىزعا, ۋران – 2 ەسەگە, فەرروقورىتپا – 57 پايىزعا, سۋبليماتسيالانعان, تۇندىرىلعان نەمەسە كوللويدتى كۇكىرتتەن باسقا كۇكىرت – 3,2 ەسەگە, بيداي – 54,1 پايىزعا, مىس جانە كاتودتى مىس – 16,5 پايىزعا جانە تاس كومىر تاسىمالى 2,1 ەسەگە ارتۋىنا بايلانىستى جالپى ەكسپورتتىق وسىمگە قول جەتكەن.
ءوز كەزەگىندە يمپورت 14,6 پايىزعا ءوسىپ, التى اي ىشىندە ەلىمىز 21,4 ملرد دوللاردىڭ ءونىمىن سىرتتان ساتىپ العان. نەگىزىنەن يمپورتتالعان تاۋارلار – اۆتوموبيلدەرگە ارنالعان شاناقتار (2,5 ەسە), بولشەك ساۋدا ءۇشىن ولشەنىپ سالىنعان دارىلىك زاتتار (36,9 پايىزعا), قارا مەتالداردان جاسالعان وزگە دە بۇيىمدار (2,2 ەسە), مىس كەندەرى مەن كونتسەنتراتتارى (5,3 ەسە), اۆتوموبيلدەر جانە تراكتورلارعا ارنالعان بولشەكتەر مەن كەرەك-جاراقتار (41,3 پايىزعا) جانە تەلەفون اپپاراتتارى (22,7 پايىزعا).
ينفوگرافيكانى جاساعان امانگەلدى قياس, «ەQ»
سونىمەن قاتار شيكىزاتتىق ەمەس تاۋارلار دا سىرت ەلدەرگە ءبىرشاما ءتاۋىر ساۋدالانعان. ونىڭ التى ايداعى اينالىمى – 31,6 ملرد دوللار جانە بىلتىرعى ۇقساس كەزەڭنەن 20,6 پايىز نەمەسە 26,2 ملرد دوللارعا كوپ. العاشقى جارتى جىلدىقتا شيكىزاتقا جاتپايتىن تاۋارلاردىڭ ەكسپورتى 33,5 پايىزعا ءوسىپ, 12 ملرد دوللارعا جەتكەن. ال سىرتتان قۇنى 19,6 ملرد دوللار بولاتىن شيكىزاتتىق ەمەس تاۋارلاردى ساتىپ الىپپىز. ارينە, بۇل تۇرعىدا ءالى دە بولسا تەرىس سالدودا ەكەنىمىزدى بايقاۋ قيىن ەمەس.
جالپى, ساۋدا ەكسپورتى بويىنشا نەگىزگى ساۋدا سەرىكتەس ەلدەردىڭ بەستىگىنە – رەسەي, قىتاي, يتاليا, تۇركيا جانە وڭتۇستىك كورەيا كىرەدى.
